Ди хэгъэрейхэр
ЦIыху гъащIэр телъыджэу зэхэухуэнащ. «Зыгуэрым хуэмыфI хьэдрыхэ кIуэркъым» жыхуиIэм хуэдэу дэтхэнэми иIэщ езыр дэзыхьэха, зыхэзэгъа Iуэху, щхьэтечу жыпIэмэ, зытеува гъуэгу. Абыхэм я лъэужь я бынхэми щаху мымащIэу урохьэлIэ. Ауэ щыIэщ и дуней тетыкIэм щымыгугъыххауи зыщихъуэжи. Ар къыпхуэгъэлъэгъуэнущ зэгуэр Налшык и «Спартак» футбол командэм хэта Роденков Юрэ и щапхъэмкIэ. Иджыблагъэ дэ къэтщIащ ар дин лэжьакIуэу къызэрыщIидзыжар.
Зи гугъу тщIы щIалэр Санкт-Петербург къыщалъхуащ икIи къыщыхъуащ. Пасэу футбол джэгун щIидзащ, мыIейуэ зэрехъулIам и щыхьэтщ а къалэм и «Зенит» командэ цIэрыIуэм и дублым зэрыхагъэхьар. Спортым и утыкушхуэр къызэрыпэплъэр наIуэ хъуащ дуней псом щыцIэрыIуэ Адвокат Дик гуп нэхъыщхьэм хэту гъэ джэгугъуэм зыхуигъэхьэзырыну иришэжьа иужь.
- Таурыхъым сыкъыхэхутам хуэдэт. Си хъуреягъкIэ слъагъурт Быстров, Денисов, Домингес, Малафеев хуэдэ топджэгу Iэзэ дыдэхэр. Къызата пэшым гъусэ сыщыхуащIат я нэхъ Iэзэ дыдэу къэслъытэм - Аршавин Андрей, - игу къегъэкIыж Юрий. - Андрей хуабжьу къызэрыгуэкI щIалэщ икIи губзыгъэщ. Дэ псынщIэу ныбжьэгъу дызэхуэхъуащ. Ар сыт и лъэныкъуэкIи къыздэIэпыкъурт.
Къэдгъэзэжа иужь Адвокат сэ занщIэу къызжиIащ гуп нэхъыщхьэм си лъэр щызгъэбыдэныр си дежкIэ гугъу зэрыхъунур. Къысхуигъэлъэгъуащ Налшык и «Спартакым» сыкIуэну. Аршавиным сэ мызэ-мытIэу сиущиящ: «Зенит»-м ухахухукIэ ухэмыкI. АдэкIэ деплъынщ. Абы жиIэрт ди командэм ехъулIэныгъэшхуэхэр къыпэплъэу. Апхуэдэуи хъуащ: илъэс нэхъ дэмыкIыу УЕФА-м и Кубокымрэ Суперкубокымри къихьащ.
АрщхьэкIэ щIалэм нэхъ къезэгъыу къилъытащ Адвокат Дик къыжриIам едэIуэныр. Абы мурад ищIат хэт къудей мыхъуу, гупым къыхэжаныкIыу зэрыщытыфынури къигъэлъэгъуэфыну. Ар нэхъыфIт джэгур иухыным дакъикъэ бжыгъэ фIэкIа имыIэжу губгъуэм укърагъэхьэ нэхърэ. Арати, Налшык къэкIуащ.
- Налшыкдэсхэр хуабжьу цIыхуфIщ, футболми зыIэпешэ. Уэрамхэм къыщысхуэзэкIэ срагъэблагъэрт: «Юрэ, накIуи шашлык къыддэшх». Абы щызгъэкIуа зэманыр зэи сщыгъупщэнукъым, - пещэ Роденковым. - Сэ сынасыпыфIэт! Лигэм и футболист нэхъыфIхэм садэджэгурт - Акинфеевым, Вагнер Лав, Жо, Павлюченкэ, Данни сымэ, нэгъуэщIхэми. Уеблэмэ, «Локомотив»-мрэ «Ростов»-мрэ топ яхудэзгъэкIат.
АрщхьэкIэ хуэмурэ щIалэр ирихьэжьащ. Командэхэр зэкIэлъыкIуэу ихъуэжу щIидзащ. Калининград и «Балтика»-м къыщыхутащ. Юрэ и улахуэр гупым къыдыхэт псоми яйхэм нэхърэ нэхъ инт. И жыпхэр ахъшэм иришэхырт. Машинэ лъапIэхэм ису къижыхьырт, тенджыз Iуфэм дыгъэ зыщригъэурт. Нэгузыужьу зэманыр игъакIуэрт джэгухэм емылIалIэу.
ЩIалэр гъуэгу тэмэмым теувэжынымкIэ къыдэIэпыкъуащ и анэм ар зыхуиша дин лэжьакIуэр. Ар езыри нэхъапэм спортсмену щытат. А тIум зызэхащIыкIащ.
- Сэ къызгурыIуащ иджыри къэс цIыху жьгъейуэ сыкъызэрекIуэкIар. Тхьэм сыхуэкIуэным и пIэкIэ абы сызэрыбгъэдэкIыр, - жеIэ Роденковым. - Абы щыгъуэми, гъусэ схуэхъуам сэ зыри къысхуигъэувакъым, зыми сыкъыхуриджакъым. Сепсалъэурэ, езым псори къызгурыIуэжащ. Си фIэщхъуныгъэр псынщIэу быдэ хъурт. ЯпэщIыкIэ сэ сащыукIытэрт командэм къыздыхэтхэм, члисэм сыщыкIуэкIэ абыхэм закъезмыгъэлъагъуным сыхущIэкъурт. ИужькIэ псори нахуэу сщIэуэ сыхуежьащ. ИкIи сыхущIегъуэжакъым.
Юрэ топджэгум 2015 гъэм къыхэкIыжащ и ныбжьыр илъэс 29-м фIэмыкIауэ. АдэкIэ зы команди хагъэхьэжакъым, сыт хуэдизрэ мылъэIуами. Хэбгъэзыхьмэ, нэхъ улахуэ цIыкIу дыдэкIи.
- Ди Щхьэщыгу итым си гъуэгу псори зэхуищIащ,- къыщыщIар апхуэдэу къелъытэ Юрэ. - Сэри супщIыIуат. Воронеж щыIэ дин еджапIэм лажьэрыеджэу сыщIэтIысхьащ.
ИлъэсиблкIэ абы щIэсащ, итIанэ дин лэжьакIуэхэм яхыхьащ. Махуэ къэс цIыхухэм яхэтщ. Футболри IэщIыб ищIыщакъым: абы егъасэ «Смена» спорт школым екIуалIэ ныбжьыщIэхэр.
Хуабжьу ди гуапэщ абы ди щIыналъэр фIыкIэ игу къызэринар. Дэ езыхэми тщыгъупщэжакъым зи джэгукIэмкIэ дэрэжэгъуэ къыдэзыту щыта а щIалэ лъагъугъуафIэр.
