Зыгуэр щыжаIэм - зыгуэр щыщыIэщ

ЕрыскъыхэкI нэхъыщхьэхэм ящыщу къалъытэ джэдыкIэм и уасэр хуэдитIкIэ зэрыдэкIуеям темыпсэлъыхьа къэнакъым. Сату зыщIхэр иджыпстуи пIащIэркъым ар и пIэм ирагъэувэжыну. Iуэхум дыщыкIэлъыплъа тыкуэнхэм а соми 150-р иджыри щызокIуэ. Тыкуэнхэр зыгъэлажьэхэм зэрыжаIамкIэ, ахэр къахуэзышэхэми къазэрыIэрыхьэр зэкIэ а уасэмкIэщ. ДызыщIыхьа къалэ тыкуэнхэм, уеблэмэ къахэкIащ уасэр зэрыдэкIуей лъандэрэ джэдыкIэр къеIытхыжыркъым, зэтщэхэм дащоукIытэри, жызыIахэри. АрщхьэкIэ ари хэкIыпIэкъым…

ИлъэсыщIэм ирихьэлIэу ерыскъыхэкI куэдым я уасэхэр зэрыдрагъэкIуейр куэд лъандэрэ хабзэу къокIуэкI, цIыхухэри есэжауэ. ИлъэсыщIэ дауэдапщэхэр зэфIэкIырти, уасэхэри я пIэм изэгъэжырт. Ауэ мы лъэхъэнэм Iуэхур нэгъуэщI мардэм тету къекIуэкIащ - джэдыкIэм и уасэм хэхъуащ 2023 гъэм и щэкIуэгъуэм, зэрыфлъагъущи, щIышылэр йокI, уасэри къехыркъым.

«Зыгуэр щыжаIэм - зыгуэр щыщыIэщ» псэлъафэр игъащIэм къокIуэкI. ИлъэсыщIэ жармыкIэхэр иджыри зэхэмыхьа щIыкIэу, абы тет сатуущIэхэм къызэпхыжаIыкIыу хуежьат дяпэкIэ джэдыкIэр Тыркум кърашын хуэдэу, ауэ абы щэхуакIуэхэм мыхьэнэшхуи ирата хуэдэтэкъым. «ЖаIэр къохъу» жыхуаIэри пэжу къыщIэкIынщ. ИкIэм-икIэжым мы махуэхэм сэтей къэхъуу хуежьащ Iуэхур ипэжыпIэкIэ зыхуэкIуэр. ЭкономикэмкIэ Евразие Комиссэм и Советыр арэзы техъуащ щIышылэм и 1-м щыщIэдзауэ, къуэды темылъу, джэдыкIэр Урысейм Тыркум къришыным.

- Ди къэралым КъуэкIыпIэ Гъунэгъум апхуэдэ сату 2020 гъэм лъандэрэ ярищIылIэжатэкъым, ди ерыскъыхэкIхэр зэрытхурикъужым къыхэкIыу. ДжэдыкIэр нобэ зэпэубыда щIэхъуам и щхьэусыгъуэр джэдкъаз пыхусыхурщ. Абы и зэранкIэ джэдкъазхэм я бжыгъэм хэщIащ, нобэкIэ цIыхур нэсу джэдыкIэмкIэ ягъэнщIын хуэдэу, Iуэхур иджыри зэтеувэжакъым. ЩIымахуэ-гъатхэ лъэхъэнэм къриубыдэу Iуэхур зэтес хъужыну догугъэ, - жиIащ ЕЭК-м сатумкIэ и министр Слепнёв Андрей. Урысейм мэкъумэш хозяйствэмкIэ и министерствэм иригъэкIуэкIа кIэлъыплъыныгъэхэм къызэрагъэлъэгъуамкIэ, щытыкIэм фIы и лъэныкъуэкIэ зихъуэжын хуейщ дызыхуэкIуэ мазэм. Апхуэдэ Iуэху еплъыкIэ иIэщ «Руспродсоюз» IуэхущIапIэми. Абыхэм къызэрыхагъэщымкIэ, уасэр езыгъэхыжынур къуэды темылъу джэдыкIэр нэгъуэщI къэралым къызэрырашынум и закъуэкъым, атIэ сату щIапIэхэми зэгурыIуэныгъэ иращIылIэнущ. Языныкъуэ кIэлъыплъакIуэхэм апхуэдэ зэпэубыдыныгъэр къызыхэкIауэ къалъытэр джэдыкIэр щынэхъыбэ гъэмахуэ лъэхъэнэм абыкIэ сату зыщIхэм ар зейхэм пудыIуэу къыIахыу зэрыщытарщ. Ар иджыпсту зекIуэ уасэр уафэм къехуэхакъыми, зевгъэзэгъ жаIэу къыбгурыIуи хъунущ. ТIум щыгъуэми, цIыхухэр щогугъ, ерыскъыхэкI нэхъыщхьэхэм ящыщу къалъытэ джэдыкIэм и Iуэхур Урысей и Iэтащхьэм и деж нагъэсауэ щыщыткIэ, хэкIыпIэ щхьэпэ къыхуагъуэтыну.