Мэ гуакIуэ къызыкIэрих тхылъхэр

 «Щэнхабзэ» лъэпкъ проектым хиубыдэу мы зэманым библиотекэхэм я лэжьэкIэм зэхъуэкIыныгъэшхуэхэр егъуэт. ЩIэныгъэлIхэм къызэралъытэмкIэ, щIэныгъэм и кIыщу къекIуэкI а щIыпIэхэм я теплъэри я лэжьыгъэри зэманым декIун хуейщ.

Иджырей модельнэ библиотекэхэр тхылъ псомкIи къызэгъэпэщауэ щытын зэрыхуейр гурыIуэгъуэщ, ауэ мы зэманымкIэ ар мащIэщ. Ахэр тхылъ хъумапIэ къудей мыхъуу, цIыхум и щIэныгъэмрэ и дуней еплъыкIэмрэ зыщиужь егъэджэныгъэ, щэнхабзэ центр нэсым хуэгъэкIуэнырщ зи яужь итыр.

Зи гугъу тщIа проектым и лъэныкъуэкIэ, жьы хъуа тхылъхэр, дапхъэхэр, карточкэхэр къызэранэкIыу, къалэ библиотекэхэм я пэш къэс зыми емыщхь дизайн зэпэщ иIэн хуейщ, ар здэщыIэ щIыналъэм и теплъэм и щIыуэпс щытыкIэм,уеблэмэ абы щыпсэу лъэпкъхэм къадекIуэкI хабзэхэм, лъэпкъ зэхущытыкIэхэм хуэщIауэ. Апхуэдэу тебгъащIэ хъунущ лъахэр зэрыгушхуэ цIыхухэм, ирехъу ар тхакIуэ, егъэджакIуэ, дохутыр, усакIуэ, спортсмен, узэщIакIуэ…

Пэшхэр интернетымкIэ, электроннэ тхылъхэмкIэ къызэрагъэпэщ, лъэпкъ библиотекэхэм я гъэтIылъыгъэхэр тыншу къагъэсэбэпыфын хуэдэу. УнэлъащIэ екIухэр щIагъэувэ, а щIыпIэм екIуалIэхэм я гукъыдэжыр къиIэтын, дэрэжэгъуэ къаритын хуэдэу.

Къапщтэмэ, иджырей библиотекэхэр  абы екIуалIэхэм я ныбжьым елъытауэ зэпэщхьэхуэ ящI. Сабий щIыкIэ тхылъым димыхьэхар иужькIэ тыншу пхуешэлIэжыркъым. Абы къыхэкIыу пэщIэдзэ классхэм щеджэ цIыкIухэмрэ ныбжьыщIэхэмрэ я пэшым тхылъхэм я дунейм ущыхагъэгъуазэ арт-утыку, лъэщапIэ цIыкIухэр хэтщ. Псори зытещIыхьыжар ахэр сабий щIыкIэ тхылъым дегъэхьэхынырщ. УнэлъащIэхэри абыхэм я ныбжьым тещIыхьауэщ къызэрыхахыр: шэнтжьей, шэнт мыинхэр, стIол, шэнт лъахъшэхэр. Языныкъуэ библиотекэхэм цIыкIухэм папщIэ кафе, кинозал къыщызэIуах. Сабийхэм папщIэ яIэ тхылъ гъэтIылъыгъэхэм къахэхъуэнущ мэ гуакIуэ къызыкIэриххэр. Абыхэм я фIыгъэкIэ цIыкIухэр щIыуэпсым зыщрихьэлIэ мэ зэмылIэужьыгъуэхэр зэхадзыфу есэнущ: пхъэщхьэмыщхьэхэм, хадэхэкIхэм, удз гъэгъахэм, къэкIыгъэхэм. Апхуэдэ дерсхэр щхьэхуэу драгъэкIуэкIынущ ныкъуэдыкъуагъ зыбгъэдэлъ сабийхэми. КъищынэмыщIауэ, ахэр къызэрагъэпэщ пщIэншэу къагъэсэбэп хъуну сурэттеххэмкIэ, проекторхэмкIэ, 3D-принтерхэмкIэ, синтезаторхэмкIэ, тхылъ еджэхэм электроннэ билетхэр ират, хъума хъун папщIэ тхылъхэм чипхэр якIэрылъщ, зыхуейр езыр-езыру къыхахыу унэм яхь хъууэ, уеблэмэ къалэшхуэхэм дэт библиотекэхэм  Iуэхутхьэбзэ зыщIэ роботхэм уащрохьэлIэ.

Ныбжь зиIэ щIэджыкIакIуэхэри гулъытэншэ хъуркъым. Абыхэм папщIэ кърагъэблагъэ фIыуэ ялъагъу тхакIуэхэр, усакIуэхэр, щIаджыкIа тхылъхэм щытепсэлъыхь зэIущIэхэр ирагъэкIуэкI.

Мы зэманым библиотекэхэр еджапIэу икIи зыгъэпсэхупIэу щытын хуейуэ къагъэув. Псалъэм папщIэ, еджакIуэхэр школ нэужьым къакIуэрэ щеджэу, я унэ лэжьыгъэхэр щащIыжу, рефератхэр щагъэхьэзыру, стIолыщхьэ джэгу зэпеуэхэм хэту

 Библиотекэ куэдым къыщызэIуахащ зэчий зыбгъэдэлъхэм щадэлажьэ школхэр. Абыхэм режиссурэм, анимацэм, 3D-графикэм и щэхухэм ныбжьыщIэхэр щыхагъэгъуазэ. Апхуэдэ библиотекэхэр къалэшхуэхэм ямызакъуэу, хуэм-хуэмурэ жылэхэми къыщызэIуах. Иджырей библиотекэхэм щылэжьэнухэм я щIэныгъэм хэгъэхъуэнымкIэ курс щхьэхуэхэр къызэIуах. ИпэкIэ дапхъэхэм телъ тхылъхэр щIэджыкIакIуэхэм къыхуэлъыхъуэнымрэ ахэр карточкэхэм къыщыгъэнэIуэнымрэ Iуэхум нэхъ хэмылъу лэжьамэ, иджы абыхэм хащIыкIыу щытын хуейщ къэунэхуныгъэщIэхэм, робототехникэм, 3D-мардэм тету мастер-классхэр зэребгъэкIуэкIынум, нэгъуэщIхэми.

Къэбэрдей-Балъкъэрыр къапщтэмэ, технологиещIэхэр къэгъэсэбэпынымрэ зэманым къигъэув щапхъэхэм тету лэжьыгъэр къехьэлIэнымкIэ лъабжьэфI зиIэ щIыналъэхэм ящыщщ: тхылъ гъэтIылъыгъэхэр яхъумащ, ди цIыхур сыт хуэдэ зэманми щIэныгъэм хуекъуу, ехъулIэныгъэфIхэри къэрал утыкухэм щагъэлъэгъуэфу къокIуэкI. Шэч хэлъкъым къэунэху зэхъуэкIыныгъэхэри фIы и лъэныкъуэкIэ къызэрагъэсэбэпынум. Ди жылагъуэхэм яхэткъым школ, къуажэ библиотекэхэр щамыхъума. А пхъумам зэхъуэкIыныгъэфIхэр хэплъхьэу щIэблэм къыхуэбгъэсэбэпыныр нэхъыфIщ, уиIэр хэбгуэшэжу щIэрыщIэу зэхуэпхьэсыжын хуей щыхъум нэхърэ. Нобэм къэс абы щIэкъуащ дэтхэнэ библиотекэ лэжьакIуэри курыт еджапIэри.

Жанхъуэт Зузэ.