Агънокъуэ Лашэ Шэрджэсым щыщ джэгуакIуэшхуэ Мыжей Сэхьид и хъыбар щызэхихым, ар зригъэцIыхуну ежьащ. ЩIэупщIэурэ Сэхьид и унэр къигъуэтащ, пщIантIэм дыхьэри, и шым щепсхым, Мыжейр къыпежьащ:
- Еблагъэ, гъуэгуанэ кIыхь къызэпыпча хуэдэщ, хьэщIэ утщIынщ, - жиIэри.
Лашэ зыкъригъэщIэну игу илъти, къыхидзащ:
- Бланафэ бгъэнри уи унэ кIуэцIу,
Уи кIуэцIыкIыщIэри гуэгушыхъу кIуапIэу,
УнапIэу узэрысри домбей укIыпIэу,
ПIейтеягъэкIи укъыхэмыщту,
Тетыгъуэр бащэу уи хасэу,
Куэдрэ Тхьэм уигъэпсэу!
- А-а! Къэбэрдейм я домбеижьыра мыр!
Уэрамым усэн щумыгъажьэ,
Бэрэжьейр пхуэмыфIми,
Ар сэркIэ фIэрафIэщ.
УдгъэфIэнщ, уи щэр диямэ, къэдгъэвыжынщ,
Уи нэр набгъэмэ, къэдгъэплъэнщ,
Уи лъэм узэримыхьэмэ,
Уи Iыхьэр къыпхущIэтхынщ,
Иныщи сэ пхуэзгъэшынкъым,
Къакъэм и шыпсым уи пэри хэлъу,
Уи лъатэм лъэтэфу адакъэр къыщыIуэу,
Си тхьэрыIуэщ узгъэхьэщIэнмэ, еблагъэ!
Ар жиIэри, Сэхьид Лашэр иригъэблэгъащ, нышри къыхуиукIри, игъэхьэщIэни щIидзащ.
Зыкъомрэ ефа-ешхауэ джэгури къызэхашащ. IуэрыIуатэ псалъэм хуэIэзэу зы бзылъхугъэ яхэтти, абы пылъын иригъэжьащ Лашэ. Зэрэ-тIэурэ къигъафащ, удж ящIати, абыи хыхьащ, хъыджэбзыр къыдихьэхынуи псалъэр иригъэжьащ:
- Уэ зи теплъэр жэщ нэху мазэгъуэу,
Жылэу Iэгъуэблагъэр зыхузэпещэ.
Гуащэм и щэну щIыкIафIэу,
МафIэ бзиифэу дарий джанэкIэ.
ИкIагъи зыхужамыIэу,
IуэрыIуатэм утыр зыхуагъэш!
Шэджэринэр зи нэжьгъуцитI,
Зи набдзитIыр мазэм и ныкъуэ.
Гуныкъуэгъуэр сэ къызумыту,
Тыгъэ къысхуэпщIтэмэ, уи лъагъуныгъэр,
Гъэмахуэр жьауапIэм щозгъэгъэкIуэнт,
ЩIымахуэм Iуэху щабэр тебгъэуфынт,
Уи нитIыр къызэтехи,
Дахэу зэ къызэплъыт.
Ар жиIэу хъыджэбзым щыпэувым, модрейми жэуапыр къритыжащ:
- Уэ ди хьэщIэ гумащIэ,
ЩIыпIэ жыжьи укъикIащ,
Жэщ зыбжани утетащ гъуэгуанэ!
Си нэ нагъуэм жагъуэгъу укъыхуэмыхъу,
Щытхъу гушыIэу сумыуб,
Сэ сызибынри Нартокъуэ Нартщ.
Нартыжь и хабзэуи хасэ егъэш,
БажапцIэ афэу,
Си фэм укъыщытхъуу сумыгъапцIэ,
Гъэш мыджэмыпцIэу,
Утыку пцIанэм сыкъибнэнщи, уежьэжынщ!
Лашэ и гум ирихьат хъыджэбзым и уэршэрыкIэри, аргуэру иридзащ:
- Си ныуэжьу кIэломпIыжьыр
Жьажьэ бдзаджэт,
Ар жьэ джатэт.
Щхьэ топыжьыр ужьэжьати,
Танищ щIызгъури ястыжащ.
Пщащэ дахэу хэкум щыцIэрыIуэм
И цIэр къиIуэт, Iуэху ухыным!
Хъыджэбзым псынщIэу къыпидзащ:
- ИкIи мыжэщу,
ИкIи мымахуэу,
Хуари утемысу,
Лъэсуи ущымыту,
Лъэтам укIэщIыхьэу,
Хьэ пцIащхъуэм удэжэфу,
Нэфым и нэр къэбгъэплъэжу,
Жэуап птыфу уэ уаIуатэмэ,
Гуимэ зэтеткIэ къакIуэ, хьэщIэ.
Лашэ абыи хуэжэуапыншакъым:
- Бацэмрэ щынэцымрэ зэхэбгъэзэрыхьщ,
Хьэрхуэрэгъууи укъысщыгугъыу
Си гурыгъырт узыщIэхъуэпсри –
Ауэ жэщуи махуэуи уэ умыгугъэ,
Жэуап мыхъумыщIэкIи умынэрыгъ,
Уи ныбжьэгъуитIым ечэнджэщыжи,
Жэщрэ щэхуу дызэхуэгъазэ,
Тэрэзу дыгумэщIэнщ.
ЯмыщIэ хабзэу дэ къэдублэнкъым,
Узикъанынум и цIэр къысхуиIуи,
Сэ тхьэ пхузоIуэ
СиIэм и нэхъыфIыр ууеймэ!
Абы хэту Сэхьид утыкум къилъэдащ гушыIэу:
- Уей-уей, гъуаргужь, гъуаргужь,
Гужь къутакIэ уезгъэшэнщ.
Нартыжьыпхъу!
Пхъэ гухъужькIи узгъэгуэнщи,
Жэщыбг хъумэ, зэхуивгуэж, гъурагужь!
Абы и гушыIэм хэтурэ нэхури къатещхьащ.