Сыт щыгъуи я нэIэ тетщ

УФ-м и Лъэпкъ гвардием и управленэу КъБР-м щыIэм ведомствэм щIэмыт и хъумакIуэ IэнатIэм и лэжьакIуэхэмрэ ветеранхэмрэ щыIащ  илъэс 18 ипэкIэ и къалэн игъэзащIэу хэкIуэда, милицэм и старшина Мысост Артур и адэ-анэм я деж. 
Росгвардейцхэм Артур и анэ Мысост Хужьпагуэ иратащ ерыскъыхэкIхэр, ахъшэкIи зыщIагъэкъуащ, апхуэдэуи, хуей хъумэ, я псэупIэр егъэфIэкIуэнымкIэ ядэIэпыкъунуи къагъэгугъащ. ЦIыхубзым и къуэм къулыкъу къыдезыхьэкIахэм фIыщIэшхуэ яхуищIащ я нэIэ къызэрытетым папщIэ. 
- ХэкIуэда ди ныбжьэгъухэм я унагъуэхэм защIэдгъэкъуэныр дэ тщыщ дэтхэнэм и дежкIи щIыхь зыпылъ къалэнщ. Ди лэжьакIуэхэр абыхэм я Iыхьлыхэмрэ благъэхэмрэ я деж макIуэ икIи сыт и лъэныкъуэкIи зыщIагъакъуэ, - къыхигъэщащ Урысей гвардием и управленэу КъБР-м щыIэм и ветеран организацэм и унафэщI,  полицэм и полковникыу къулыкъум къыхэкIыжа Хужьокъуэ Руслан. 
Мысост Артур хэкIуэдащ 2005 гъэм IэщэкIэ зэщIэузэда бзаджащIэхэр Налшык къалэм къыщытеуам. Къигъэлъэгъуа хахуагъэм папщIэ ЛIыгъэм и орденыр къыхуагъэфэщащ мыпсэужу. Абы и цIэр фIащащ Шэрэдж районым и Зэрэгъыж къуажэм и уэрамхэм ящыщ зымрэ курыт еджапIэмрэ.