ПщIыхьэпIэфIым хуэдэ илъэсхэр

Хэт хьэщIапIэ зымыхьар, зымышхар «Танцующая пара» кIэнфетым хуэдэ?! Ар къыдощтэ хамэ щIыпIэ дыщыкIуэм, ди лъахэм и дамыгъэ гуэру. Апхуэдизу дгъэлъапIэ кIэнфетыр зэрылъым и IуплъапIэм зэман кIыхькIэ зи сурэт тета къэфакIуэхэм ящыщщ «Кабардинка» къэфакIуэ гупым хэта цIыхубз щыпкъэ Шортэн Аллэрэ адыгэлIым и щапхъэ, къэфакIуэ цIэрыIуэу щыта Мамбэт Хьэсэнрэ.

Мы тхыгъэр зытедухуа Мамбэтыр 1949 гъэм мэлыжьыхь мазэу Къулъкъужын Ищхъэрэ къыщалъхуащ. Школ кIуэгъуэ хъури, щIалэр Сэрмакъ интернатым ягъэкIуащ. Къэфэн Iуэхуи зэримыхуэу, абы классийр къыщеух, училищэм щIотIысхьэ пхъащIэ IэщIагъэм хуеджэну. Бэрэбанауэ цIэрыIуэ иужькIэ къызыхэкIа Ало Арсени къыдеджэрт абы. ЩIалэм и къуэш нэхъыжь ПIотIэ а зэманым хэтт Уэрэдымрэ къафэмкIэ ансамблым. ПIотIэрэ Арсенрэ я гъусэу Хьэсэныр къэзылъэгъуа Ульбашев Мутай щIалэр гупым хыхьэну иригъэблэгъащ. А зэманым ансамблыр щIалэ жан, жыджэр хуэныкъуэт. Къуажэм къикIа щIалэ цIыкIум псори фIэгъэщIэгъуэну зригъэлъагъурт, зэгугъужырт, зыхыхьам яхуэфэщэн артист хъуным хущIэкъурт. 
«Гуп гъэса сыхэтащ, - жеIэ Мамбэтым. - Илъэс 15 - 16 зи ныбжьыну защIэт дыкъащтари, апхуэдэу цIэрыIуэ дыхъунуи, а лэжьыгъэм дыпэлъэщынуи тщIакъым. Щапхъэ тетхащ къэфакIуэ нэхъыжьхэм, гъуэгу захуэ дытрагъэувэным щхьэх ямыIэу елэжьащ ансамблым и унафэщIхэри. Ульбашев Мутай нэмыщI къыдэгугъуащ Гальперин Григорий. Щэнхабзэми утыку итыкIэми дыхуэзыгъэсар а лIы Iущырт. Нобэ утыку кърахьэ къафэ куэдым я лъабжьэр аращ зыгъэтIылъар. Пэжыр жысIэнщи, пщIыхьэпIэфIым хуэдэу блэлъэтащ «Кабардинка»-м сызэрыщылэжьа илъэс тIощIыр».
Къыхэгъэщыпхъэщ дзэм къулыкъу щыщищIэми (Пермь), абы щыIэ ансамблми и зэфIэкI Мамбэтыр зэрыщемыблэжари. 
Къэрал куэд илъэгъуащ Мамбэт Хьэсэн, езыми и къэфэкIэр дуней псом щигъэлъэгъуащ. Абы къызэрыхигъэщымкIэ, и щIалэгъуэм и лэжьыгъэм псэкIэ пэрытати, гугъуехь лъэпкъи зыхищIакъым. «1965 гъэм «Кабардинка»-м хыхьа гупыщIэм, щIалэхэми хъыджэбзхэми, къэфакIуэ нэхъыжьыфIхэм гъуэгу хашар зэрытхузэфIэкIкIэ едгъэфIэкIуащ. ЦIыхуфIхэт псори, уагъэлъэпэрэпэнутэкъым, уифIри къыбдаIыгъынут. Бэрэгъун Руслан, Мэрыш Заур, Балъкъэр Сашэ... куэдыр дызэныбжьэгъум нэхърэ дызэкъуэшыр нэхъ пэжу къыщIэкIынт. Дахуозэш къытхэмытыж КIэрэф Толэ, КIэш Федор сымэ», - жеIэ Хьэсэн. Хьэсэн и щIалитIым зыр юристщ, адрейр ухуакIуэщ. Мамбэтым зэрыжиIэмкIэ, щIалэ нэхъыжьыр къафэми уэрэд жыIэнми хуэIэкIуэлъакIуэщ, гъуазджэр зыхилъхьэ щыIэкъым, ауэ ар IэщIагъэ хуэхъуакъым.