Санкт-Петербург къикIыну хьэщIэхэр

Музыкэ театрым шыщхьэуIум и 29 - 30-хэм концерт щитынущ УФ-м щIыхь зиIэ и гуп цIэрыIуэ, Санкт-Петербург филармонием и академическэ симфоние оркестрым. Дирижёр нэхъыщхьэр УФ-м щIыхь зиIэ и артист Алексеев Николайщ. 

Санкт-Петербург и академическэ филармоние Шостакович Дмитрий и цIэр зезыхьэм и художественнэ унафэщI, дуней псом щыцIэрыIуэ дирижёр Темыр­къан Юрэ къыщалъхуа махуэр (дыгъэгъазэм и 10-м илъэс 85-рэ ирикъунущ) къызэрыблагъэм и щIыхькIэ, и унафэм щIэт оркестрым Налшык зыкъыщигъэлъэ­гъуэнущ. 
Оркестрым игъэзэщIэнущ урыс композиторхэм я лэжьыгъэ нэхъыфIхэу дуней псом щIэупщIэшхуэ щызиIэхэр. Япэ пшыхьым щагъэIунущ Чайковский Пётр и Япэ фортепианнэ концертымрэ Етхуанэ симфниемрэ. ЕтIуанэ пшыхьым - Рахманинов Сергей и ЕтIуанэ фортепианнэ концертымрэ Авст­рием и ком­позитор Брамс Иоганнес и ЕплIанэ симфо­ниемрэ.
Концертым хэтынущ  Петербург и пианист, Рахманинов Cергей и цIэкIэ 2022 гъэм къызэрагъэпэща лъэпкъ зэхуаку зэпеуэм и лау­реат, Чайковскиий Пётр и цIэкIэ мы гъэм екIуэкIа XVII международнэ зэпеуэм и III саугъэтыр зыхуагъэфэща Папоян Илья. 
Темыркъан Юрэ дуней псом пщIэ щызиIэ дирижёр цIэрыIуэщ. 1988 гъэм щыщIэдзауэ ар Санкт-Петербург филармонием и академичексэ симфоние оркестрым, УФ-м щIыхь зиIэ, дуней псом къыщацIыху гуп нэхъы­фIым и художественнэ унафэщIщ. Оркестрым зыкъыщигъэлъэгъуащ къэрал куэдым я утыку инхэм. Темыркъан Юрэ долажьэ Европэм (Берлин, Венэ, Лондон, Рим, Милан) и филармоние оркестр цIэрыIуэхэм, Амстердам и концерт залышхуэм - Консертгебау Пащтыхь оркестрыр щIыгъуу.
Концертым ирихьэлIэу Музыкэ театрым и пэIущIэ пэшым къыщызэрагъэпэщынущ Темыркъан Юрэ и гъащIэмрэ гуащIэмрэ теухуа гъэлъэгъуэныгъэ. 
ЩыщIидзэнур сыхьэт 19-рщ. УпщIэ зиIэхэр фыпсалъэ хъунущ мы телефонхэмкIэ: 77-42-08, 42-43-13.

ТЕКIУЖЬ  Заретэ.