КъБР-м и Iэтащхьэ КIуэкIуэ Казбек дзэ Iуэху хэхам хэтхэмрэ абыхэм я унагъуэхэмрэ дэIыгъынымкIэ комиссэм и зэIущIэ иригъэкIуэкIащ. Мазэ ипэкIэ лэжьэн щIэзыдза, «Хэкум и хъумакIуэхэр» къэрал фондым и щIыналъэ къудамэм зэкIэ зэфIагъэкIахэм. ЗэIущIэм хэтащ КъБР-м и Правительствэм и УнафэщIым и къуэдзэ Хъубий Марат (комиссэм и унафэщIщ), министрхэр, щIыналъэ администрацэхэм, социальнэ IэнатIэхэм, жылагъуэ, дин IуэхущIапIэхэм я унафэщIхэр.
КIуэкIуэ Казбек къыхигъэщащ Урысейм и Президент Путин Владимир и унафэкIэ къызэрагъэпэща фондым и щIыналъэ къудамэм и лэжьыгъэр зэпымыууэ и нэIэм зэрыщIэтыр. Метр зэбгъузэнатIэ 1000 зыубыд унэр мазитIым къриубыдэу сыт и лъэныкъуэкIи зыхуей хуэзэу зэрагъэпэщыжащ, абы и къудамэхэр районхэм къыщызэIуа-
хащ. Мы илъэсым и кIэ пщIондэ социальнэ унэтIакIуэхэу цIыху 80 лэжьыгъэкIэ къызэрагъэпэщынущ, абыхэм ящыщу 23-м я Iэзагъэм хагъахъуэри, я къалэным пэрыхьащ.
«Хэкум и хъумакIуэхэр» къэрал фондым и щIыналъэ къудамэм и унафэщI Дадэ МуIэед жиIащ мазэм къриубыдэу дзэ Iуэху хэхам хэтхэмрэ абыхэм я унагъуэхэмрэ къабгъэдэкIыу 135-рэ зэрызыкъыхуагъэзар. Ахэр теухуащ социальнэ дэIэпыкъуныгъэхэм, зауэ зэпэщIэтыныгъэм и ветерану зэрыщытым и щыхьэт тхылъыр къыдэхыным, социальнэ, психологие реабилитацэ ягъуэтыным, санаторэхэм кIуэным, коммунальнэ гугъуехьхэр зэфIэхыным. ЛъэIуу 120-рэ ягъэзэщIащ, 15-м яужь итщ. Зэрызыкъыхуагъэза зы Iуэхугъуи гулъытэншэу къагъэнакъым. А лъэIухэм ятеухуауэ адэкIэ къапэщыт къалэнхэр яубзыху.
КIуэкIуэ Казбек къыхигъэщащ фондым и лэжьыгъэр Iуэху псори а зы щIыпIэм щызэфIэкIыу зэтеухуэн зэрыхуейр. Абы папщIэ хэщIапIэм къыщызэIуах Медико-социальнэ экспертизэмкIэ бюром, къалэн куэд щызэфIах центрым, Сбербанкым я къудамэхэр, юрист, психолог IэнатIэхэр.
КъищынэмыщIауэ, КъБР-м и Iэтащхьэм и унафэкIэ республикэм узыншагъэр хъумэнымкIэ и IэнатIэм дзэ Iуэху хэхам и ветеранхэм психолого-психотерапевт дэIэпыкъуныгъэхэр щагъуэт IуэхущIапIэ щхьэхуэ къыщызэрагъэпэщынущ. КъБР-м узыншагъэр хъумэнымкIэ и министрым и къуэдзэ Къармэ Марат пщэрылъыр зэрагъэзащIэм и гугъу ищIащ: район поликлиникэхэм пэш къыщызэрагъэпэщ, республикэм и медицинэ IуэхущIапIэхэм ящыщ зым гъуэлъыпIэ 30 щIэту сымаджэщ къудамэ къыщызэIуахынущ. КIуэкIуэ Казбек министерствэм къалэн ящищIащ дзэ Iуэху хэхам хэтхэм я узыншагъэр санаторэхэм щрагъэфIэкIуэжыныр зэтраублэну.
КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим жиIащ дзэ Iуэху хэхам хэтхэмрэ абыхэм я унагъуэхэм щIэсхэмрэ псом япэу мазэ къэс ят ахъшэ пособиехэр, компенсацэхэр зэрыIэрагъэхьэр. Зыхуэныкъуэ дэIэпыкъуныгъэхэр ягъэбелджылын папщIэ унагъуэ къэс я социальнэ паспортхэр зэхагъэу-
ващ, дэтхэнэ зыми центр щхьэхуэхэм я IэщIагъэлIхэр егъэбыдылIащ. Дзэ Iуэху хэхам хэтхэм я унагъуэхэм щхьэщахащ зи школ кIуэгъуэ нэмысахэр зэкIуалIэ IуэхущIапIэхэм ират ахъшэр, мобилизацэм хиубыдауэ къулыкъу зыщIэхэм я сабийхэр пщIэншэу ягъашхэ, психолог-педагог дэIэпыкъуныгъэхэр хуащIэ. Мобилизацэм хиубыдахэм республикэ бюджетым къыхэкIыу мазэ къэс и чэзум сом мин 25-рэ яIэрохьэ.
«УФ-м и Президентым фондым пщэрылъ щищIахэр нэгъэсауэ дгъэзэщIыныр ди къалэнщ. ЩIыналъэхэр республикэ фондым жыджэру фыдэлэжьэн хуейщ. Хэкум и щхьэщы-
жакIуэу къэувахэм яхуэфэщэну дахущытыпхъэщ, социальнэ дэIэпыкъуныгъэрщ нэхъ мащIэ дыдэу абыхэм яхуэтщIэфыр. Дзэ къалэныр зыгъэзащIэхэм жылагъуэм пщIэ щаIэн папщIэ тхузэфIэкIыр длэжьын хуейщ. Ар фэрэ дэрэ ди къалэнщ», - жиIащ КIуэкIуэ Казбек.
* * *
КъБР-м и Iэтащхьэ КIуэкIуэ Казбек зэIущIэ нэужьым хуэзащ дзэ Iуэху хэхам хэтхэмрэ абыхэм я унагъуэхэмрэ дэIыгъынымкIэ «Хэкум и хъумакIуэхэр» къэрал фондым и щIыналъэ къудамэм и унафэщI Дадэ МуIэед. Ахэр тепсэлъыхьащ фондым и лэжьыгъэр къызэрызэгъэпэщам, ар зэрекIуэкIым. И гугъу ящIащ щIыналъэ къудамэм и лэжьакIуэхэр - социальнэ унэтIакIуэхэр - дэIыгъынымкIэ зэфIэгъэкIыпхъэ Iуэхухэми. «Ахэращ махуэ къэс жэуаплыныгъэшхуэ зыпылъ къалэнхэр зэфIэзыхынур, аращи лIыхъужьхэм ядэIэпыкъуну гупыж яIэн хуейщ, апхуэдэуи зыпэрыт Iуэхум и мыхьэнэр нэсу зэхащIыкIыпхъэщ», - къыхигъэщащ КIуэкIуэ Казбек.
Апхуэдэуи тепсэлъыхьащ дзэ Iуэху хэхам хэтхэмрэ абыхэм я унагъуэхэмрэ защIэгъэкъуэнымкIэ ведомствэхэр зэрызэдэлэжьэнум. КIуэкIуэ Казбек жиIащ фондым и къалэнхэр псынщIэу икIи фIагъ пылъу зэфIагъэкIын папщIэ Дадэ МуIэед и зэфIэкIхэм къыхигъахъуэу КъБР-м и Iэтащхьэм и чэнджэщэгъуу игъэувыну унафэ къызэрищтар.