Iуэхугъуэ нэхъыщхьэхэм къытеувыIэу

КъБР-м и Правительствэм и Уна­фэщI Мусуков Алий иригъэкIуэкIащ Iуэхугъуэ зыбжанэм щыхэплъа зэIущIэ.

ЗэхъуэкIыныгъэхэр халъхьэ­нущ  КъБР-м и Правительствэм и Регла­ментым. КъБР-м и Прави­тельствэм и проектхэр дяпэкIэ ягъэбелджылын хуейщ махуищым къриубыдэу. Хабзэу зытет махуийр куэдыIуэу къалъытэ. 
- Проектыр тещIыхьащ Прави­тельст­вэр зыхэплъэ Iуэхугъуэхэр нэхъ псынщIэу зэфIэха хъуным. ЗэIущIэхэр тхьэмахуэ къэс йокIуэкIри, дэфтэру зыхэплъэри куэд мэхъу. Ахэр зэт­ре­мыгъэхьэным тещIыхьауэ щытыпхъэщ пIалъэри, - жиIащ КъБР-м и Прави­тельствэм и Аппаратым и унафэщI Гъудэ Аслъэн. 
Урысей Федерацэм пилот зимыIэ авиацэ системэм зыщегъэужьыным теухуауэ Къэбэрдей-Балъкъэр Респуб­ликэм и Правительствэмрэ Москва и Правительствэмрэ зэраухылIа зэгу­рыIуэныгъэм и проектыр игъэбел­джылащ КъБР-м экономикэ зыужьы­ныгъэмкIэ и министрым и къуэдзэ ТIымыжь Хъусен. 
ЦIыху щхьэхуэхэм газ Iэмэпсымэ къащэхуным, ягъэувынымрэ падзэ­нымрэ теухуауэ субсидие зэратынум къытеувыIащ КъБР-м промышлен­нос­тымкIэ, энергетикэмрэ сатумкIэ и ми­нистр Iэхъуэбэч Щамил. ЗэхъуэкIы­ныгъэхэр къащтэмэ, цIыхухэм зэра­дэIэпыкъу щIыкIэр нэхъ тынш хъунущ. 
Министрыр къытеувыIащ КъБР-м и гипс заводым лэжьэн щIидзэжыным хэлIыфIыхьын гуп къызэгъэпэщы­ным теухуа проектым. Ар къыхалъ­-  хьащ республикэм и Iэтащхьэм и унафэкIэ. 
- Проектыр теухуащ «Къэббалъ­къ­гипс» IуэхущIапIэм и лэжьыгъэр зэте­­ублэжыным. 2018 гъэм ар мылъкуншэ хъури, зэхуащIыжауэ щытащ. Иджы ар къызэIуахыжынущ, «Эко-Золопродукт» IуэхущIапIэм и мылъку абы къы­зэрыхилъхьам и фIыгъэкIэ.  Мы гъэм шыщхьэуIум и 1-м и пэ къихуэу лицензие ягъэхьэзырынущ икIи фокIадэм ири­хьэлIэу IуэхущIапIэм лэжьэн щIи­дзэ­нущ, - жиIащ абы. 
Шэджэм къалэмрэ Щхьэлыкъуэ къуа­жэмрэ я гъуэгухэр зыхуей хуэгъэзэным КъБР-м и бюджетым щыщу сом мелуани 7 хухахынущ. Абы теухуауэ КъБР-м и Правительствэм и проектыр игъэнэIуащ КъБР-м транспортымрэ гъуэгу хозяйствэмкIэ и министр ДыщэкI Аслъэн. 
Министрым игъэбелджылащ Прави­тельст­вэм и гъэтIылъыгъэ фондым и мылъкум щыщ КъБР-м транспортымрэ гъуэгу хозяйствэмкIэ и министерствэм зэрыратынум и проектыр. 
КъБР-м ухуэныгъэмрэ псэупIэ-ком­мунальнэ хозяйствэмкIэ и министр Бэрбэч Алим зэIущIэм щигъэбел­джылащ республикэм кхъахэ хъуа и псэупIэхэм цIыхухэр 2022 - 2025 гъэхэм къриубыдэу къыщIэгъэIэпхъукIыным и проектыр. Iуэхум папщIэ къагъэ­сэ­бэпыну мылъкур зыхуэдизыр иубзыхуащ «Фонд развития территории» компа­нием. 
- Унэ кхъахэхэм цIыхухэр къыщIэ­гъэ­IэпхъукIыным теухуауэ щыIэ хабзэхэм тету, КъБР-м 2023 гъэм Iуэхум и етIуанэ Iыхьэм папщIэ къылъысыр сом мелуани 192-рэ мин 793-рэщ. Абы текIуэдэну къабжащ сом мелуан 276-рэ мин 803-рэ. Сом мелуани 192-рэ мин 793-р фондым и ахъшэщ, сом мелуан 84-р республикэм и мылъкум щыщщ, - жиIащ Алим. 
Программэм и етIуанэ Iыхьэм къызэ­ригъэувым тету, 2024 гъэм дыгъэгъазэм и 31-м и пэ къихуэу жьы хъуауэ къалъыта псэупIи 175-м щIэс цIыху 486-рэ къыщIэгъэIэпхъукIын хуейщ. Абы хиубыдэнущ Налшык, Май къалэхэр, Октябрьское, Учебное къуажэхэр.