«Лэгъупыкъум» и псы дахэхэр

Прохладнэ щIыналъэм щыIэ «Лэгъупыкъу» IуэхущIапIэм лэжьэн зэрыригъажьэрэ илъэсипщI хъуауэ аращ, ауэ а зэман кIэщIым къриубыдэу абы къыщIигъэкI, пхъэщхьэмыщхьэмрэ хадэхэкIхэмрэ къахищIыкI псы IэфIхэр щIыпIэ куэдым къыщацIыхуащ. «Морсок»-щ абыхэм зэреджэр. 

«Ди псы IэфIхэр къызыхэтщIыкIыр дэ езым ди губгъуэхэмрэ жыг хадэхэмрэ къыщыдгъэкIыжа пхъэщхьэмыщхьэхэмрэ хадэхэкIхэмрэщ. Псом япэ идгъэщыр абыхэм фIагъ лъагэ яIэнымрэ лIэужьыгъуэм къыхэдгъэхъуэнымрэщ. Ди деж щынэхъыщхьэщ темыгузэвыхьу сабийхэр дипсхэм ирагъэфэныр. Сыту жыпIэмэ, ди продукцэр къабзэщ, абы химие пкъыгъуэ гуэрхэр хэлъкъым, къызыхэтщIыкIыр экологие и лъэныкъуэкIэ зэран здэщымыIэ щIыпIэм къыщетхьэлIэжа къэкIыгъэхэрщ. Ди псы IэфIхэр Урысейм и къалэ куэдым къыщацIыху, ауэ абыхэм я бжыгъэр нэхъыбэ зэрытщIыным дыхущIэкъу зэпытщ. Апхуэдэуи ахэр зэрыдгъахъуэхэри дахэу, удэзыхьэхыу щытынми догугъу», - къыджиIащ «Лэгъупыкъум» коммерцэ IуэхухэмкIэ и унафэщI Когутанич Вадим. 
КъБР-м экспортыр щыдэIыгъынымкIэ и центрым и дэIэпыкъуныгъэ хэлъу IухущIапIэм запищIауэ щытащ Азербайджаным и хьэрычэтыщIэхэм икIи абы и фIыгъэкIэ, а къэралым яхуригъашэ и продукцэм и куэдагъым илъэс къэс хигъахъуэ зэпытщ. 
«Ди продукцэхэр щыдогъэлъагъуэ щIыналъэ, дунейпсо гъэлъэгъуэныгъэхэм. АбыкIэ фIыуэ сэбэп къытхуохъу КъБР-м экспортыр щыдэIыгъынымкIэ и центрыр. Дэтхэнэ зы сомри тхъумэным мыхьэнэшхуэ иIэщ ди дежкIэ, абы къыдэкIуэуи, цIыху нэхъыбэм закъедгъэцIыхунми, ди продукцэр зигу ирихьауэ щытахэм ягу зыкъэдгъэкIыжынми яужь дитщ», - жеIэ Когутанич Вадим. 
«Лэгъупыкъум» и псы IэфIхэр щигъэлъэгъуащ Мэзкуу щекIуэкIа «Продэкспо», Санкт-Петербург щызэхаша «Петерфуд», Азербайджаным и «Caspian Agro/World Food», Хьэрып Эмират Зэхэтхэм я «GulFood-2020» гъэлъэгъуэныгъэхэм, нэгъуэщIхэми. 
«Продэкспо-2020»-м щыхэтам щыгъуэ абы и продукцэхэм къыщIэупщIащ Индонезием и хьэрычэтыщIэхэр. Абы нэмыщI, Азербайджаным щекIуэкIа «Caspian Agro/World Food 20I9» гъэлъэгъуэныгъэм хыхьэу «Лэгъупыкъум» зэгурыIуэныгъэ ирищIылIауэ щытащ Италием и «ILAY-2016» компанием. 
IуэхущIапIэм и продукцэр Урысейм имызакъуэу, къэрал тпэгъунэгъуэхэми фIыуэ щащэху икIи и къалэн нэхъыщхьэу нобэ зэхуигъэувыжыр фIагъ лъагэ дыдэ зиIэ, лышхым щызыхъумэ, абы пэщIэт сокхэмрэ нектархэмрэ къыщIигъэкIынырщ.
«Къэрал дэIэпыкъуныгъэм хыхьэу КъБР-м «Си хьэрычэт IэнатIэ» и центрым гъэлъэгъуэныгъэм хэт IуэхущIапIэхэм мылъкукIэ защIегъакъуэ. Псалъэм папщIэ, абыхэм хэтын папщIэ щIатын хуей пщIэр, продукцэхэр щагъэлъэгъуэну къащтэ щIыпIэм и бэджэндыпщIэр, зыхуеину оборудованэхэм, стендым я уасэхэр яхует», - жиIащ КъБР-м «Си хьэрычэт IэнатIэ» и центрым и унафэщI Дудар Хьэдис. 
Къыхэдгъэщынщи, «Лагъупыкъур» жыджэру хэтщ центрым илъэс къэс иригъэкIуэкI псапащIэ Iуэхухэм.