Промышленнэ индексым хохъуэ

Кавказ Ищхъэрэм СтатистикэмкIэ и управленэм къызэритамкIэ, 2025 гъэм и щIышылэм – дыгъэгъазэм къриубыдэу Къэбэрдей-Балъкъэрым и промышленнэ индексыр проценти 110,3-рэ хъуащ.

Республикэм и экономикэ IэнатIэхэм къагъэлъэгъуа зэфIэкIхэр зэпэщхьэхуэу къатщтэмэ: щIыуэпс хъугъуэфIыгъуэхэр къыщIэхынымкIэ IэнатIэм – проценти 105,0-рэ, продукцэхэр къыщIэзыгъэкIхэм, абыхэм елэжь IэнатIэхэм – проценти 114,0-рэ, псы яхуэзыутIыпщхэм, къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зэлъыIузыххэм - проценти 108,3-рэ къагъэлъэгъуащ. ЭлектрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм ейр – проценти 4,7-кIэ нэхъ мащIэ хъуащ.

Къапщытэж пIалъэм къриубыдэу хадэхэкI-пхъэщхьэмыщхьэ консервхэм, гъэшым, крупам, кхъуейм, кхъуейлъалъэм, шатэм, хьэжыгъэм, Iусыпхъэм, IэфIыкIэм, лэжьыгъэм къыщагъэсэбэп щыгъыным, щэкI кIэстумхэм, цыхэкIым, лъэпэдым, вакъэм, кислородым, пластмассым, пластмассым къыхэщIыкIа бжэ-щхьэгъубжэм, унэлъащIэм кIэралъхьэ цIыкIуфэкIухэм, гъущIым къыхэщIыкIа продукцэхэм, медицинэ Iэмэпсымэхэм хэхъуащ.

Мыдрейуэ, лым, нэкулъ лIэужьыгъуэхэм, сэхуран дагъэм, маргариным, тхъуцIынэм, йогуртым, шхум, пыченэм, нарзаныпсым, псыIэфIым, тепIэнщIэлъыным, пыIэхэм, картоным къыхэщIыкIа ашыкхэм, тхылъымпIэ канцтовархэм, пластмассым къыхэщIыкIа ашыкхэмрэ коробкэхэмрэ, чырбыш гъэжьам, бетоным, асфальтрэ бетонрэ зэхэщIам, лэжьыгъэ Iэмэпсымэхэм, полупроводник приборхэм, автоматикэ Iэмэпсымэхэм, рентген аппаратхэм, кабелым, автотранспортым и пкъыгъуэхэм, унэлъащIэм кIэрыхуащ. А пIалъэм къриубыдэу электрокъарурэ хуабэу къалэжьари нэхъ мащIэщ.

   Кавказ Ищхъэрэм СтатистикэмкIэ и управленэм къызэритамкIэ, 2025 гъэм и щIышылэм – дыгъэгъазэм къриубыдэу фэтэр куэду зэхэт псэупIэу 73-рэ яухуащ, унагъуэхэм – унэ 3121-рэ. Фэтэрхэр псори зэхэту 6666-рэ хъуащ. ПсэупIэу псори зэхэту яухуам метр зэбгъузэнатIэ мин 642,5-рэ яубыдащ, 2024 гъэм яхузэфIэкIам нэхърэ проценти 5,2-кIэ нэхъыбэщ ар. А бжыгъэм щыщу метр зэбгъузэнатIэ 420,0-р унагъуэхэм къалъос икIи абы ипэ ита илъэсым щыIа бжыгъэхэм нэхърэ процент 13,5-кIэ ари нэхъыбэщ.

Ухуэныгъэ IуэхущIапIэхэм фэтэр куэду зэхэт псэупIэу яIэтар псори  метр зэбгъузэнатIэ 222,5-рэ хъуащ (2024 гъэм - метр зэбгъузэнатIэ 240,9-рэ). Къуажэ щIыпIэхэм щаухуащ метр зэбгъузэнатIэу 313,6-рэ е 2024 гъэм щыIа бжыгъэхэм нэхърэ проценти 6,3-кIэ нэхъыбэу.

ХЬЭЩЫКЪУЕЙ Олег.