«Пэрытхэм» я Iуэхугъуэ нэхъыщхьэхэр

«ТАСС Кавказ» щIыналъэ хъыбарегъащIэ агентствэм иджыблагъэ щекIуэкIа пресс-конференцым хэтащ «Пэрытхэм я зэщIэхъееныгъэ» урысейпсо зэгухьэныгъэм и Къэбэрдей-Балъкъэр щIыналъэ къудамэм и унафэщI Шыпш Аслъэн.

Ар теухуауэ щытащ зэгухьэныгъэм Кавказ Ищхъэрэм щиIэ къудамэхэм нэгъабэ зэфIагъэкIамрэ 2026 гъэм я мурадхэмрэ.

Конференцым къыщыхагъэща Iуэхугъуэ нэхъыщхьэхэм ящыщщ Кавказ Ищхъэрэм щыIэ къудамэхэм хэтхэм я бжыгъэм цIыху мин 225-рэ къазэрыхэхъуар, мы илъэсым волонтёр экспедицэхэр зэрырагъэкIуэкIынур, Къэбэрдей-Балъкъэрым щыщ сабий 40-м щIигъу НыбжьыщIэ пашэхэм я школым зэрыщеджэнур, «Пэрытхэм» я Федеральнэ Советым и 11 зэхуэсыгъуэм и етхуанэ иужьрей зэIущIэр ди республикэм зэрыщекIуэкIынур, Ставрополь къыщызэрагъэпэщ «Медиадвиж» Iуэхум школакIуи 160-рэ зэрыхэтынур, зэгухьэныгъэм Ингуш щIыналъэм щиIэ къудамэм зэхишэну фестивалыр лъэпкъ хабзэхэм зэрытраухуэнур, Къэрэшей-Шэрджэсым щрагъэкIуэкI «Нэхъыжь Iущ» Iуэхум ехъулIэныгъэ зэриIар, Дагъыстэн Республикэм щызэхэт зэщIэхъееныгъэр 2025 гъэм цIыху мини 100-кIэ нэхъыбэ зэрыхъуар, Осетие Ищхъэрэ-Аланием и щIыпIэ къудамэхэм щIэныгъэ клубхэр къызэрыщызэрагъэпэщынур, нэгъуэщIхэри.

«Мы гъэм Къэбэрдей-Балъкъэрым и щIыналъэ къудамэм лэжьэн щIедгъэдзащ ныбжьыщIэ пашэхэм я школым, «Первоклассные» зыфIэтщам. Абы хэтынухэр мазэкIэ къыхэтхащ икIи 6 - 7-нэ классхэм щIэсхэр къызэщIедгъэубыдащ. ЦIыху 30 зэхуэтшэсыну нэхъапэ ди гугъами, бжыгъэр 43-м нэдгъэсащ. Илъэс псокIэ абыхэм дадэлэжьэнущ», - къыхигъэщащ Шыпш Аслъэн.