Зыхуэсакъыжыныр нэхъапэщ

Къэбэрдей-Балъкъэрым и автомобиль гъуэгухэр илъэс къэс зэрырагъэфIакIуэм къыдэкIуэу, цIыхум и шынагъуэншагъэр абыхэм къыщызэгъэпэщыным хуэунэтIа лэжьыгъэхэри республикэм щрагъэкIуэкI зэпытщ. 
Абыхэм хохьэ иджырей уэздыгъэхэмкIэ ахэр къызэщIэгъэблэныр икIи 2025 гъэм апхуэдэ Iуэхугъуэхэр щрагъэкIуэкIащ республикэм и щIыналъэ гъуэгуу километри 62-рэ хуэдизым. Александровскэ, Дей, Курп Ищхъэрэ, Ташлы-Тала, Нейтринэ, Сэрмакъ, Каменкэ къуажэхэм я уэрамхэр къызэщIагъэнэхуащ: псори зэхэту километр 22-м щIигъу я кIыхьагъщ абыхэм. 
КъищынэмыщIауэ, адрейхэм ящIыгъуу зэгурыIуэныгъэ щхьэхуэкIэ лэжьыгъэхэр щрагъэкIуэкIащ псори зэхэту километр 40-м щIигъу хъу нэгъуэщI щIыналъэ автомобиль гъуэгухэми. Абыхэм хиубыдащ Терекскэ, Щхьэлыкъуэ, Аргудан, Котляревскэ, Шэрэдж Ищхъэрэ къуажэхэмрэ Тэрч, Нарткъалэ, Май къалэхэмрэ. 
 Республикэм и автомобиль гъуэгухэр къызэщIэгъэблэным хыхьэ лэжьыгъэу иджырей пкъохэр, трансформаторхэр, подстанцхэр, шкафхэр щагъэуващ, электрокъарур мащIэу зыгъэс LED-лампIхэм хуэдэхэр щыпадзащ, кIапсэ лъэщхэр щаукъуэдиящ. 
Ауэ цIыхухэм я шынагъуэншагъэмрэ тыншыпIэмрэ гъуэгухэм къыщызэгъэпэщыным ехьэлIауэ сыт хуэдэ Iуэхугъуэхэр республикэм щрамыгъэкIуэкIами, абыхэм я нэхъыщхьэр гъуэгум щызекIуэ хабзэхэр гъэзэщIэнымрэ зыхуэсакъыжынымрэщ, жаIащ лэжьакIуэхэм.