Социалист Лэжьыгъэм и ЛIыхъужь, РСФСР-м и Къэрал саугъэтым и лауреат, Къэбэрдей-Балъкъэрым и цIыхубэ усакIуэ КIыщокъуэ Алим дунейм щехыжа махуэм, щIышылэм и 29-м, ирихьэлIэу, гъэ къэси хуэдэу, пэкIу щекIуэкIащ абы и фэеплъым деж. УсакIуэшхуэр дунейм зэрехыжрэ илъэс 25-рэ ирокъу.
Хабзэ хъуауэ, усакIуэр къыщалъхуа, дунейм щехыжа махуэхэм ирихьэлIэу абдеж щызэхуэсурэ а цIыху щыпкъэр ягу къагъэкIыж, псалъэ гуапэхэр хужаIэ. КIыщокъуэ Алим и цIэр зезыхьэ уэрамым тет Налшык къалэ администрацэм и гупэм къит фэеплъым деж, щекIуэкI зэхыхьэм зыкърезыгъэхьэлIахэм яхэтт КъБР-м и Парламентым и депутатхэр, жылагъуэ, политикэ Iуэху зезыхьэхэр, гъуазджэмрэ щэнхабзэмрэ я лэжьакIуэхэр, щIэныгъэлIхэр, жылагъуэ зэгухьэныгъэхэм щыщхэр, тхакIуэр фIыуэ зыцIыхуу щытахэр, и благъэхэр, Iыхьлыхэр, ныбжьэгъухэр, и IэдакъэщIэкIхэр фIыуэ зылъагъухэр, студентхэр, еджакIуэхэр.
КъБР-м щэнхабзэмкIэ и министр Къумахуэ Мухьэдин пэкIур къыщызэIуихым къыхигъэщащ республикэм и щэнхабзэмрэ литературэмрэ зыгъэбея КIыщокъуэ Алим и цIэм республикэм исхэр зэрыригушхуэр, ар я гъуэгугъэлъагъуэу, щапхъэу, гъащIэ гъуазэу къызэрынэжыр, ди щIыналъэмрэ абы щыпсэухэмрэ фIыуэ тлъагъуну къалэн къызэрытщищIар цIыхубэм зэращымыгъупщэр, и тхыгъэ купщIафIэхэм я фIыгъэкIэ Къэбэрдей-Балъкъэрыр къалэ, къэрал куэдым щыпсэухэм къызэрацIыхуар.
КъБР-м и ТхакIуэхэм я зэгухьэныгъэм и правленэм и унафэщI Бейтуганов Исмэхьил Къэбэрдей-Балъкъэрым и литературэм КIыщокъуэм зэрызригъэужьам теухуауэ министрым жиIам къыпищэу къытеувыIащ тхакIуэм и макъыр ину икIи пэжу къэIуу, цIыхубэм ягу нэсу, усакIуэ къудей мыхъуу, и лъэпкъэгъухэр зыгъэгузавэ Iуэхугъуэхэм гулъытэ яхуищIу зэрыщытар, и тхыгъэхэр адыгэ литературэм и фIыпIэ зэрыхъуар, Урысейм и мызакъуэу хамэ къэралхэми абыхэм щIэупщIэ ин зэрыщаIэр, и тхыгъэхэр бзэ зэмылIэужьыгъуэхэмкIэ зэрызэрадзэкIыр.
- Фегупсысыт КIыщокъуэ Алим и щIэинхэм я кууагъымрэ абыхэм гъунапкъэ зэрамыIэмрэ. Сыту пIэрэ усакIуэм и псалъэм и къару мыкIуэщIым и щэхур? СатыриплI хъу и усэхэр шабзэм хуэдэу гум хохьэ, мыхьэнэ куу яIэщ, - жиIащ филологие щIэныгъэхэмкIэ доктор Гъут Iэдэм. - ЦIыху гъащIэр бгыщхьэм къежэха мывэм хуэдэу напIэдэхьеигъуэщ. А зэман кIэщIым къриубыдэу дунейр ди нэхумкIэ къызэщIэдгъэблэным дыхунэсын, лъэужьыфI къэдгъэнэн хуейщ, ди фэеплъыр лIэщIыгъуэкIэ ящымыгъупщэн хуэдэу. Апхуэдэ зэфIэкI иIащ КIыщокъуэ Алим.
КъБР-м и ТхакIуэхэм я зэгухьэныгъэм и унафэщIым и къуэ- дзэ, радиожурналист, зэдзэкIакIуэ Мэремкъул Ларисэ жиIащ КIыщокъуэ Алим мамыр гъащIэм щызэфIигъэкIа Iуэхушхуэхэм я мызакъуэу Хэку зауэшхуэм и пэм щыщIэдзауэ и кIэм нэсыху зэрыпхыкIар, и щIыналъэр фIыуэ зэрилъагъум, лъэпкъым и къуэ щэджащэу зэрыщытым и щыхьэту. Абы щIигъужащ КIыщокъуэ Алимрэ Кулиев Къайсынрэ я зэныбжьэгъугъэр лъэпкъхэм я зэкъуэтыныгъэмрэ зэкъуэшыгъэмрэ я щапхъэу зэрыщытыр.
Шэджэм щIыналъэм и лIыкIуэ Уэдыжь Хьэсанш пэкIум зыкърезыгъэхьэлIахэм яжриIащ КIыщокъуэ Алим усакIуэ, тхакIуэ цIэрыIуэу зэрыщытам къыдэкIуэу, жылагъуэ лэжьакIуэ пэрытуи, жэуаплыныгъэ зыпылъ къулыкъухэр иIыгъыуи къызэрыгъуэгурыкIуар, и псалъэхэр зыщIэлъ уэрэдхэр цIыхубэм фIыуэ зэралъэгъуар, къэрал дамыгъэ куэд къызэрыхуагъэфэщар, цIыхум я гум фIыкIэ къызэринар. Ар къытеувыIащ щIыналъэм и гъуазджэмрэ щэнхабзэмрэ зегъэужьыным КIыщокъуэр зэрытелэжьам, и псалъэм пщIэшхуэ зэриIам, Хэкум и къуэ пэжу зэрыщытам дамыгъэ лъапIэхэр къызэрыпэкIуам. Лъэпкъ литературэхэр зыгъэбея усакIуэхэу КIыщокъуэ Алимрэ Кулиев Къайсынрэ Хэку зауэшхуэм зэрызэришэлIам, зрихьэлIа гугъуехьхэр зэдагъэпсынщIэу псэуху ахэр зэныбжьэгъуу, унагъуэкIэ зэкIэлъыкIуэу, махуэшхуэхэр зэдагъэлъапIэу зэрыщытами тепсэлъыхьащ Хьэсанш.
- «Социалист Лэжьыгъэм и ЛIыхъужь» щIыхьыцIэр абы къыщыхуагъэфэщам, республикэм ис лъэпкъ псоми я махуэшхуэт. КIыщокъуэм и фэеплъымрэ абы и гуащIэмрэ зэи тщыгъупщэнукъым! - жиIащ Уэдыжьым.
КIыщокъуэ Алим и фэеплъым удз гъэгъахэр тралъхьа нэужь, пэкIум хэтахэр усакIуэр къыщалъхуа икIи щыщIалъхьэжа Щхьэлыкъуэ къуажэм, абы дэт и фэеплъ музейм кIуащ. Аращ щахъумэр къыщIэна хьэпшыпхэр, сурэтхэр, тхылъхэр. ТхакIуэм и гъащIэмрэ и гуащIэмрэ ягу къагъэкIыжа нэужь, и усэхэм адыгэбзэкIи, балъкъэрыбзэкIи, урысыбзэкIи къеджащ.
ТЕКIУЖЬ Заретэ.
Сурэтыр Къарей Элинэ трихащ.
