ЯгъэщIэращIэ, зэIузэпэщ ящI Иужь зэманым Налшык и уэрамхэр, пщIантIэхэр, хадэхэр хэпщIыкIыу ирагъэфIэкIуащ. Абы теухуауэ иджыблагъэ дэ депсэлъылIащ къалащхьэ администрацэм и лэжьакIуэ Хьэкъун Аскэрбий.
- Аскэрбий, щыгъуазэ дыхуэпщIам арат къалэн нэхъыщхьэу зыхуэвгъэувыжым.
- Къалэн нэхъыщхьэу дэ къытпэщылъыр ди къалащхьэм и уэрамхэр тэмэм щIынырщ, гъуэгухэмрэ лъэс лъагъуэхэмрэ къиуда ямыIэу. КIэрыхубжьэрыхур и чэзум дашыным, уэрамхэр къабзэу щыгъэтыным къинэмыщIауэ, щхъуантIагъэхэр хэсэнри дэращ зи къалэныр. Налшык, Хьэсэней, Белая Речкэ, Iэдииху, Вольнэ Аул – абыхэм ди нэIэ ятетщ зи гугъу сщIа Iуэхухэм теухуауэ. Абыхэм къищынэмыщIауэ, парк цIыкIухэр къызыдогъэпэщ, тетIысхьэпIэхэр, пхъэнкIий идзапIэхэр, уэздыгъэхэр догъэув, хадэхэр догъэщIэращIэ.
Мы гъэм къалэну зыхуэдгъэувыжауэ хъуар тхуэгъэзэщIэнукъым, ауэ и нэхъыбэр зэфIэдгъэкIыфынущ.
- Иужь илъэситIым лэжьыгъэшхуэ зэфIэвгъэкIащ, Аскэрбий. Абы гу лъумытапIэр иIэкъым. НобэкIэ нэхъ тегъэчыныхьауэ фызэлэжьыр, псом я щхьэу къэфлъытэр сыт?
- КъызэтедмыгъэувыIэу гъуэгухэм делэжьынущ, Тэрчокъуэм и уэрамым къыщызэIутхынущ цIыхухэм зыгъэпсэхупIэ яхуэхъун хадэ цIыкIу, щхъуантIагъэкIэ гъэнщIауэ. Абы пэмыжыжьэу удз гъэгъахэр, жыгхэр щыхэтсэнущ. Ахэр федеральнэ программэм ипкъ иткIэ зэфIыдогъэкI. Къалэм и мылъкум щыщкIэ дгъэдэхэнущ 115-нэ шууей дивизэм и фэеплъ утыкур. Абдеж парк къыщызэIуахынущ, абы итыпхъэ псори щыIэщ. Лениным и проспектымрэ Осетинскэмрэ, Къэбэрдей уэрамымрэ Осетинскэмрэ щызыпыхьэхэм деж дахэу гъэщIэрэщIауэ парк цIыкIухэр къыщызэIуахынущ.
Хьэкъун Аскэрбий зэрыжиIащи, къалащхьэр дэри зэрытлъагъущи, увыIэгъуэ имыIэу ягъэщIэращIэ. Къалэдэсхэри хьэщIэхэри зыгъэгуфIэщ дахагъэм ехьэлIа сыт хуэдэ лэжьыгъэри.
Поделиться:
Читать также:
10.05.2024 - 16:04 →
Медаль 59-рэ къахь!
08.05.2024 - 17:33 →
ТекIуэныгъэм и щIыхькIэ
08.05.2024 - 17:00 →
ТекIуэныгъэм хуэпабгъэу
08.05.2024 - 16:28 →
Тай боксым дихьэххэм къахохъуэ
08.05.2024 - 16:00 →
Шабзауэхэм я зэфIэкIыр
|