Спорт уардэунэр яухуэн яух

14 августа, 2023 - 14:01
Налшык къалэм Ашуровым и цIэр зезыхьэ и уэрамым фокIадэ мазэм къыщызэIуахынущ спортым хуаухуа унэшхуэр. Мыр ди спортсменхэм зэхьэзэхуэшхуэхэм зыщыхуагъэхьэзырыным хуэщIауэ сыт и лъэныкъуэкIи щытынущ, спорт IэмэпсымэщIэхэмкIэ къызэрагъэпэщынущ. Ар икъукIэ ущIэгуфIэ хъун Iуэхушхуэщ. Федеральнэ ахъшэу мыбы сом мелуан 275-рэ халъхьащ.
Мы ухуэныгъэм иубыдащ метр зэбгъузэнатIэ миний. Зэуэ мыбы цIыхуи 150-м зыщагъэхьэзырыфынущ. Зи узыншагъэм дерт иIэхэми гулъытэ щыхуащIынущ уардэунэм. 
 
БэнэкIэ хуит
 Къэжэрым домбеякъ медаль къехь
БэнэкIэ хуитымкIэ дунейпсо зэхьэзэхуэ щекIуэкIащ Тыркум.
ТхьэмахуэкIэ спортсменхэр лIэужьыгъуищкIэ зэбэнащ. Илъэс 18 зи ныбжь спортсменхэм я деж ди щIалэ Къэжэр Ислъам япэу къыпэщIэта бэнакIуищым щхьэкъэIэтыпIэ яримыту ятекIуащ. Ар зыхэтар килограмм 71-рэ зи хьэлъагъхэр щызэпеуа гупырщ. ЕплIанэм пэмылъэщу ар домбеякъ медалым щIэбэнын хуей хъуащ. КъыпэщIэтар Туркмением и спортсмен Бегенджов Арсланщ. Ислъам 5:1 бжыгъэкIэ абы текIуэри, ещанэ увыпIэр къихьащ.
 
Шэрий Иналбэч и текIуэныгъэ
Къэрал 22-м щыщ цIыху 2500-рэ зыхэт, СНГ-м и 2-нэ спорт зэхьэзэхуэхэр щокIуэкI Беларусь республикэм.
Къэбэрдей-Балъкъэрым щыщ спортсмен Шэрий Иналбэч бэнэкIэ хуитымкIэ япэ увыпIэр къыщихьащ килограмм 70 зи хьэлъагъхэм я гупым. ПэщIэдзэу къыпэщIэтахэм гугъу емыхьу ди щIалэр ятекIуащ. Япэ увыпIэр къихьын папщIэ кIэухыу ар текIуэн хуейт Азербайджаным и бэнакIуэ Евлоев Мурад. ДакъикъитIым къриубыдэу Иналбэч хузэфIэкIащ 10:0 бжыгъэкIэ япэ ищын икIи текIуэныгъэр къихьащ. 
 
Дзюдо
Урысейм и чемпионатым зыхуагъэхьэзыр
Налшык Ныр Сеф и цIэр зезыхьэ и спорткомплексым ди къэралым и дзюдоистхэм зыщыхуагъэхьэзыр дызыхуэкIуэ мазэм Кемеровэ къалэм щызэхэтыну урысей чемпионатым. Абы и лъэныкъуэкIэ ди спортсменхэр зыхуей-зыхуэфIхэмкIэ сыт и лъэныкъуэкIи къызэгъэпэщащ. АбыкIэ сэбэп хъуар КъБР-м СпортымкIэ и министерствэрщ. 
Мыбы къекIуэлIащ Урысейм и щIыпIэ зэмылIэужьыгъуэ 17-м къикIа, зи ныбжьыр илъэс 14-м къыщыщIэдзауэ нэхъыжьхэр - псори зэхэту цIыху 500-м нэблагъэ. Абыхэм Къэбэрдей-Балъкъэрым щыщ дзюдоисту 200 яхэтщ. Ди гъэсакIуэ нэхъ цIэрыIуэ псори спортсменхэм ядолажьэ.
 
 Шабзауэ
Кавказым щыпашэхэм ящыщщ
Ростов областым щекIуэкIащ Кавказ Ищхъэрэ, Ипщэ федеральнэ щIыналъэхэм я чемпионатрэ бжьыпэр убыдыным теухуа зэхьэзэхуэрэ. ЩIыпIэ зэмылIэужьыгъуэу 10-м къикIауэ, зи ныбжьыр илъэс 14-м къыщыщIэдзауэ 21-м нэс шабзауэу 80 хэтащ абы.
Къэбэрдей-Балъкъэрым щыщу спортсменитI чемпионатым хэтати, гуп зэпеуэм етIуанэ увыпIэр къыщахьащ. Ахэр Мурачай Исмэхьилрэ Щоджэн Салимэрэщ. Ди япэ ищар Ростов областым и командэрщ.
Зэхьэзэхуэм Кулюшинэ Янэрэ Мурачай Исмэхьилрэ ещанэ увыпIэр къыщахьащ. Мыбыхэм къефIэкIар Краснодар крайм къикIахэмрэ езы Ростов областым и спортсменхэмрэщ.
ШАФИЙ Аслъэн.
  • 43 просмотра
Поделиться:

Читать также:

10.05.2024 - 16:04 → Медаль 59-рэ къахь!
08.05.2024 - 17:33 → ТекIуэныгъэм и щIыхькIэ
08.05.2024 - 17:00 → ТекIуэныгъэм хуэпабгъэу
08.05.2024 - 16:28 → Тай боксым дихьэххэм къахохъуэ
08.05.2024 - 16:00 → Шабзауэхэм я зэфIэкIыр