Дзюдо
СНГ-м хыхьэ къэрал 22-м спортымкIэ я 2-нэ зэхьэзэхуэ щокIуэкI Белоруссием и Гомель къалэм. Ахэр спорт лIэужьыгъуэу 20-кIэ мы мазэм и 13 пщIондэ зэпеуэнущ.
Илъэс 15 – 17 зи ныбжьхэр дзюдомкIэ зэпеуащ шыщхьэуIум и 7-м. Абы хэтахэщ Белоруссием, Урысейм, Къэзахъстаным, Узбекистаным, Азербайджаным, Туркменистаным я командэхэр. Япэ увыпIэм щIэбэну кIэух зэIущIэм щызэхуэзат Урысеймрэ Къэзахъстанымрэ я командэхэри, ди спортсменхэм 7:0-у текIуэныгъэр къахьащ. Ещанэ увыпIэр Узбекистаным иубыдащ.
Пашэныгъэр къэзыхьа ди командэм хэтащ адыгэ щIалэ ТекIужь Астемыр. Щхьэзакъуэ зэпеуэр къапщтэмэ, абы дыжьын медаль къихьащи, адэкIи хигъахъуэу дигъэгуфIэну дыщогугъ.
Красноярски дыщыхуэмыхуакъым
ГъущIхэкI цIуугъэнэхэмрэ дыщэмрэ щелэжьу Красноярск къалэм дэт заводым и унафэщIу щыта Гулидов Владимир и фэеплъу дзюдомкIэ зэхьэзэхуэ щекIуэкIащ Ярыгин Иван и цIэр зезыхьэ спорт уардэунэм. Абыи ди спортсменхэр щыхуэмыхуакъым.
Мыбы пашэныгъэм цIыхухъууи цIыхубзуи 130-м щIигъу щIэбэнащ, Урысейм и щIыналъэ 18-м, Белоруссиемрэ Таджикистанымрэ къикIауэ.
Килограмм 73-рэ зи хьэлъагъхэр зыхэт гупым текIуэныгъиплI зэкIэлъыкIуэу къыщихьри, япэ увыпIэм щIэбэнащ Ало Мухьэмэд. Ауэ, ди жагъуэ зэрыхъунщи, ар пэлъэщакъым Белоруссием щыщ дзюдоист Трухан Егор икIи етIуанэ увыпIэрщ къихьар. Апхуэдэ ехъулIэныгъэщ килограмм 81-рэ зи хьэлъагъхэм я деж Байсиев Таулани щиIар. Ар къызэтезыгъэувыIар Москва щыщ Карапетян Давидщ.
Шэджэм БетIалрэ Циканов Ислъамрэ килограмм 66-рэ зи хьэлъагъхэм я деж ещанэ увыпIэр къыщахьащ.
Алыдж-урым бэнэкIэ
Сербием дыщэ медалитI къыщахь
Сербием и бэнакIуэ цIэрыIуэу щыта Иванович Любомир и фэеплъ зэхьэзэхуэ иджыблагъэ Белград щекIуэкIащ. Абы хэтащ ар къызэзыгъэпэща Урысеймрэ Белоруссиемрэ я командэхэм нэмыщI, къэралитхум къикIа спортсменхэр.
Ди къэралым и командэм хэтахэм медалу 8, плIыр дыщэу, къахьын яхузэфIэкIащ. Абыхэм ящыщу япэ увыпIэр яубыдащ Къэбэрдей-Балъкъэрым щыщхэу Кабалоев Виталийрэ (килограмм 55-рэ зи хьэлъагъхэм я деж) Бажэ Астемыррэ (килограмм 63-рэ хъухэм).
Иджыри ехъулIэныгъэхэр
А бэнэкIэ лIэужьыгъуэмкIэ иджыри ди спортсменитIым дагъэгуфIащ. Ахэр Гъуэныбэ Iэуесрэ КIэмпIарэ Маратрэщ.
Ди щIалэхэм Солигорск щекIуэкIа, илъэс 24-рэ нэхърэ мынэхъыжьхэр зыхэта зэхьэзэхуэм дыщэ медалитI къыщахьащ. Мы зэпеуэри СНГ-м пашэныгъэр къыщыхьыным хуэунэтIа джэгухэм ящыщ зы Iыхьэу щытащ. Мыбы къэрал 22-м щыщу бэнакIуэ 2500-м щIигъу зэрыхэтар къэплъытэмэ, мыхьэнэ иратамрэ пщIэ хуащIамрэ я инагъыу щытар гурыIуэгъуэщ. Килограмм 82-рэ зи хьэлъагъхэр щызэпеуа гупым, зэIущIэр иухынми нэмысу, текIуэныгъищ зыкIэлъыкIуэу къыщихьри, занщIэу бжьыпэр щиубыдащ Гъуэныбэ Iэуес.
ЕтIуанэ дыщэ медалыр къытхуэзыхьа КIэмпIарэ Марат зыхэтар килограмми 130-рэ зи хьэлъагъхэрщ. Ди щIалэхэр зыхэта Урысей командэми япэ увыпIэр иубыдащ.
Атлетикэ псынщIэ
Дыжьын медалитI
Челябинск щекIуэкIащ атлетикэ псынщIэмкIэ урысейпсо чемпионат.
Къэбэрдей-Балъкъэрым щыщхэу Добренький Александррэ (диск нэхъ жыжьэу дзынымкIэ) Орлов Николайрэ (бжыр дзынымкIэ) щхьэж зыхэта лIэужьыгъуэм 2-нэ увыпIэр щаубыдри, дыжьын медалхэр къахьащ.
