Си адэ Ацкъан ХьэсбийСи адэр куэдрэ си нэгу къыщIохьэ мыпхуэдэу: ар щIым хоплъэ, пхыплъыну хэт фIэкIа умыщIэну. ИужькIэ уафэм ходэIухь, зэми и нэр быдэу зэтрипIэу. Апхуэдэм деж сэри уафэм сыходэIухь, ву макъ гуэр зэхэсхыу къысфIэщIу. Нэхъыжьхэм къызжаIауэ сощIэ си адэр зауэм лIыгъэ зэрихьэу зэрыщыIар, кхъухьлъатэзехуэхэм зэрахэтар. Абы теухуауэ езым зыри къыбжиIэнукъым, сэ абы и гум щызэблэкI псор щызыхэсщIэнум сынэсакIэкъым. Ву макъ гуэр къэIуауэ къыщыхъуа – си адэр уафэм ходэIухь, и нэ къуэлэнышхуитIым, зэщIэлыдэу, зыгуэр щызолъатэ, зэми хьэндырабгъуэ къысщыхъуу. ЩIылъэмрэ уафэмрэ яку щызоуэ зым емыщхь абы и плъэкIэр. Иджыпсту зыгуэр жиIэнущ жысIэу соумэзэх, сыпоплъэ, ауэ зыри жиIэркъым, хэщэтыкI фIэкIа. ХощэтыкIри - зыщIыпIэкIэ егъазэ, зыхуэкIуэр езыми имыщIэу. Сэ сысабийщ, иджыри псори къызгурыIуэркъым, ауэ куэд псэкIэ зыхызощIэ, зэшыгъуэ мыгурыIуэгъуэ гуэр къыстригъауэу. ЗыхэсщIэ хуэдэщ си адэм и псэр зезыхуэр. Илъэсхэр макIуэ, сэ сыкъыдокIуэтей, си адэм и гум щызекIуэм нэхъри пыщIа сохъу. Мыпхуэдэ зы махуэ нобэ си гупсысэр хэтщ, усэм хуэкIуэжауэ. Адэм и гъусэу губгъуэм сыпхрокI. Езыр-езыру си щхьэм къохьэ мы сатыр- хэр: ЩхъуантIагъэр джабэхэм къожэх, Ар дуней псорщ. Иджы къызогъэзэж ди къуажэбгъум, мэз Iувым пыхьэж губгъуэм, си адэмрэ сэрэ дызытет лъагъуэм. КъокIуэ мыпхуэдэ сатырхэр: Гъатхэм и мафIэ зэщIэстам ИужькIэ си тхьэкIумэм къоувэ: ДыздэкIуэм сядэр сяпэ итщ, Ауэ щхьэж и нэкIэ деплъыжт Куэд дэкIа нэужькIэ сэ къызгурыIуэнущ мис а зэтемыхуэныгъэр си гъащIэм и IэфIыпIэхэм ящыщ зыуэ зэрыщытыр. АрщхьэкIэ ари игъащIэ псокIэ зэзгъэзэхуэн хуейхэм ящыщу къыщIэкIынущ. Бжыхь схурт си адэм щIыгъуу. Сабиигъуэр Мы Iуэхум зыкIи си гур химыгъахъуэт, Щызухуэрти си пщIыхьхэм сэ чэщанэ, Си адэ Ацкъан Хьэсбий Си адэм ибжт захуагъэм я нэхъыщхьэу Бжыхь тхурт, си сабиигъуэр хэдухуанэу, Чыхэр хуэсшийт си адэм, сигу пымыкIыу, Сэ сщIэжыркъым зи гугъу сщIа уситIым щыщу дэтхэнэр япэ къэкIуами, ауэ, дэнэкIэ къыщезгъажьэми, си адэм епха гупсысэхэр зы гурыщIэ иным хуокIуэж. Абы хэтщ си адэм пщIэуэ хуэсщIри, абы къикIуа гъуэгуанэ гугъум сызэрыпыщIари, дунейм сызэрытетым щхьэкIэ хуэсщI фIыщIэри, нэгъуэщI Iэджи. Абы игъащIэм ину псалъэ къызжиIакъым, ауэ псори зэхэсхащ. Абы зэи сигъэIущакъым, езым дэслъэгъуам и нэхъыфIыр зэрызыхэслъхьэнум и ужь ситащ. Сэ сщIэркъым ар сыт хуэдизу къысхуэарэзыуэ щытами - абыкIэ дауэ сеупщIынт. А упщIэр сыпсэуху илъыну си гум къинащ. А упщIэм и жэуапыр си адэм и нэм щIэслъэгъуэну сыхэтащ куэдрэ, арщхьэкIэ къызэхъулIакъым. Ар зауэлI хахуэт, адыгэлI нэст, гурыщIэр зыгъэпщкIуфхэм ящыщт. ГъащIэшхуэ къигъэщIащ абы. Илъэс бгъущIым фIыуэ щыщIигъуами, и акъылыр нэхут, и гупсысэр убзыхуат, и лъым хэт а и хьэл быдэри зызмыхъуэжт. Ди иужьрей зэIущIэхэм ящыщ зым къэкIуат мы сатырхэр: Хъуащ гъащIэр и пIэм иуджыхь. Къепсыха жьыгъэм иубыдащ Ар лIыгъэ зыхэлъ цIыхут. Абы и псэм пкъы быдэ иIэт, хуэмыхъуу и гущабагъэри къызэпхыщу. Ар сфIэгуэныхь мэхъуж, и гум щызэпекъуу щыта псор иджы зыхызощIэри. Си адэр дунейм ехыжа нэужь мы сатырхэр къэкIуащ: Уахътыншэу къысщыхъути, си адэ. Сыт-тIэ пщIэнур, дунейр мэкIэрахъуэ, СощIэ, жыжьэ IукIакъым уэ уи псэр, - Зэхихынум, жысIэнт зигъэпщкIуну Си адэр сфIэкIуэда нэужьщ сыкъэзыухъуреихь дунейр зэрыгущIэгъуншэр нэсу щызыхэсщIар. Ауэ а дунейр фIыуэ слъагъу сызыщIари си адэрт - ар дэнэ пхьыжын?..
Поделиться:
Читать также:
08.05.2024 - 13:05 →
ЩIэныгъэлI усакIуэхэр
07.05.2024 - 14:31 →
Къэбэрдейм цеипхъэжь джанэр зэрыщаха щIыкIэр
06.05.2024 - 16:22 →
ФIыуэ флъагъухэм закъевгъащIэ!
06.05.2024 - 13:00 →
ЛIыгъэр зыгъэунэхуар
03.05.2024 - 15:00 →
Гъатхэпежьэ удз гъэгъахэр
|