Ди къэралым и хабзэ нэхъыщхьэхэр зи лъабжьэ дэфтэрыр, УФ-м и Конституцэр, 1993 гъэм дыгъэгъазэм и 12-м къащтауэ щытащ. А махуэм цIыху мелуан 58-м щIигъу зэкIуэлIа цIыхубэ IэIэтыр екIуэкIат. Абы и щIыхькIэ КъБР-м и Жылагъуэ палатэм паспортхэр щратащ зи ныбжьыр илъэс 14 ирикъуа цIыху 21-м.
НыбжьыщIэхэм я паспортхэр иратащ КъБР-м и Жылагъуэ палатэм и УнафэщI Берд Хьэзрэталий, абы и къуэдзэ Федченкэ Людмилэ, КъБР-м и МВД-м Iэпхъуэшапхъуэ IуэхухэмкIэ и управленэм и къудамэм и унафэщI, полицэм и подполковник Гъубж Арсен сымэ.
Берд Хьэзрэталий жиIащ щысабийхэм щегъэжьауэ щIэблэр жыджэру, хэкупсэу, лъэпкъ зэхэщIыкI яIэу зэрыгъэсап-хъэр. «Нобэ махуэшхуэщ фи дежкIэ. Паспортым хуитыныгъэшхуэхэр къывет, ар лъапIэщ, жэуаплыныгъэ зы пылъщ. Абы и гъусэу, Урысейм и цIыхум и пщэ къыдэхуэ къалэнышхуэхэри къыфтохуэ. Фи Хэкур фIыуэ флъагъун хуейщ, фыкъыщалъхуа, фыкъыщыхъуа, щIэныгъэ щызэвгъэ гъуэт щIыналъэр, гъэсэныгъэ къыфхэзылъхьахэр зыщывгъэгъупщэ хъунукъым. Ахэращ зи фIыщIэр нобэ гъащIэм щывиIэ ехъулIэныгъэхэр. Насыпы-фIэ фыхъуну, зэфIэкI ин фиIэну сынывохъуэхъу», - жиIащ нэхъыжьым.
Федченкэ Людмилэ школакIуэхэм щехъуэхъум жиIащ ущыпсэу къэралым и паспортыр къыпIэрыхьэныр зэрыпщIэшхуэр.
- Дэ ди зэманым илъэс 16-м къыдату щытащ къэралым и дэфтэр нэхъыщхьэр. СощIэж а Iуэхугъуэм дрипагэу зэрыщытар. Сыт къикIыр Урысейм и цIыхуу ущытыным? Шэч хэмылъу, ар зи Хэкур фIыуэ зылъагъу, езыгъэфIакIуэ, абы папщIэ и къалэнхэр игъэзэщIэну, ихъумэну сыт щыгъуи хьэзыр цIыхущ. Сыхуейт фызы-щIэхъуэпсхэр къывэхъулIэну, щIыналъэм хуэфэщэн фыхъуну, - къыхигъэщащ бзылъхугъэм. Апхуэдэуи абы дыщIигъуащ, цIыхур и Iыхьлым зэрыхущытым хуэдэу, и Хэкуми бгъэдэтын зэрыхуейр.
Гъубж Арсен щIалэгъуалэм ехъуэхъуащ узыншагъэ быдэрэ зыхуагъэувыж къалэнхэм зэрыпэлъэщын къарурэ яIэну. «Ди къэкIуэнур зэлъытар, ди гугъэр зэтпхыр щIалэгъуалэращ. Дыфщогугъ хэкупсэ нэс, щапхъэ фыхъуну», - къыхигъэщащ Гъубжым.
НыбжьыщIэхэм иратащ КъБР-м и Жылагъуэ палатэм-рэ «Движение первых» урысейпсо щIалэгъуалэ зэгухьэныгъэм и Къэбэрдей-Балъкъэр щIыналъэ къудамэмрэ къабгъэдэкI тыгъэхэр.
КЪАНЩАУЭ Мэлычыпхъу.