«ХъуэпсапIэхэм я псей»

Къэбэрдей-Балъкъэрым дыгъуасэ щрагъэжьащ «ХъуэпсапIэхэм я псей» урысейпсо псапащIэ Iуэхур. Абы хэтащ КъБР-м и Правительствэм и УнафэщI Мусуков Алий, гъэзэщIакIуэ къулыкъущIапIэхэм я уна­фэщIхэр, щIыналъэ администрацэхэм я Iэтащхьэхэр.

«ХъуэпсапIэхэм я псей» урысейпсо псапащIэ Iуэхур 2018 гъэ лъандэрэ ирагъэкIуэкI. Илъэс къэс ар къызэрагъэпэщ ЩIалэгъуалэ IуэхухэмкIэ федеральнэ агентствэмрэ Волонтёр центрхэм я зэгухьэныгъэмрэ. Мы гъэм абы и къызэгъэпэща­кIуэхэм къахыхьащ «Пэрытхэм я зэщIэхъееныгъэ» зэгухьэныгъэри.
Iуэху щхьэпэм и къалэн нэхъыщхьэр гъащIэм щытыкIэ гугъу иригъэува, зеиншэ, зи узыншагъэм къимыхь сабийхэр гъэгуфIэнырщ, илъэсыщIэ махуэшхуэм и дахагъэр зыхегъэщIэнырщ.
Мы зэманым къриубыдэу республикэм къыIэрыхьащ КъБР-м и интернатхэмрэ социальнэ IуэхущIапIэхэмрэ щыIэ сабийхэм къабгъэдэкI, я хъуэпсапIэхэр къыщыгъэлъэгъуа тхыгъэу 1000-м щIигъу. Мы гъэм республикэм и сабийхэм я мызакъуэу, псапащIэ Iуэхум хэтщ Урысейм и щIыналъэщIэхэм ящыщу Къэбэрдей-Балъкъэрым и нэIэ щIэтхэм щыIэ социальнэ IуэхущIапIэхэм я са­бийхэри.
Нэхъапэхэм хэмытауэ, мы илъэсым Iуэхум зы щхьэхуэныгъэ игъуэтащ: «ХъуэпсапIэхэм я псей» онлайн-платформэ къызэрагъэпэщащ, абы и фIыгъэкIэ сабийхэм я хъуэпсапIэр игъэзэщIэфынущ апхуэдэ жэрдэм зыщI дэтхэнэ зыми. 
Абы папщIэ псапащIэ Iуэхум и сайтым уихьэу, узыхуей хъуэпсапIэр къыхэпхын хуейуэ аращ. Сабийм и хъуэпсапIэр щхьэусыгъуэ гуэркIэ цIыхум езым и закъуэ хуэмыгъэзэщIэнумэ, абы текIуэдэну мылъкур ­яхуиутIыпщ хъунущ, итIанэ волонтёрхэм абы и цIэкIэ Iуэхур зэфIагъэкIынущ.
Мы гъэм Къэбэрдей-Балъкъэрым и сабийхэм я хъуэпсапIэхэр ягъэзэщIэнущ къэ­рал къулыкъущIапIэхэм, егъэджэныгъэ IуэхущIапIэхэм я лIыкIуэхэм, хьэрычэ­ты­щIэхэм, апхуэдэуи сабийхэм гуфIэгъуэкIэ яхуэупсэну гупыж зыщI дэтхэнэ зыми.