IэнатIэм зрагъэужьынущ

Урысейм Узыншагъэр хъумэнымкIэ и министерствэм штатым хэмыт и хирург, Вишневский А. В. и цIэр зезыхьэ лъэпкъ медицинэ къэхутакIуэ центрым и унафэщI, академик Ревишвили Амиран лэжьыгъэ IуэхукIэ хуэзащ КъБР-м и Iэтащхьэ КIуэкIуэ Казбек.

Урысей Федерацэм узыншагъэр хъумэ­нымкIэ и министр Мурашкэ Михаил и унафэкIэ, Ревишвили Амиран и нэIэ щIэту Кавказ Ищхъэрэ федеральнэ щIыналъэм штатым хэмыт и хирургхэм я зэхуэс Налшык щокIуэкI, ар ­теухуащ Кавказ Ищхъэрэм хирург дэIэпы­къуныгъэр зыхуей хуэзэу къыщызэгъэпэ­щыным.
IэщIагъэлIхэр щыIащ Республикэ клиникэ сымаджэщымрэ Къалэ клиникэ сымаджэщ №1-мрэ. IуэхущIапIэхэр медицинэ Iэмэпсымэ­хэмкIэ хъарзынэу къызэрызэгъэпэщар къы­хагъэщащ хьэщIэхэм икIи хирург Iуэхум фIагъ лъагэ иIэу зэрыщызэтеублар жаIащ. 
КъБР-м и Iэтащхьэмрэ хирургымрэ тепсэ­лъыхьащ щIыналъэ медицинэ IэнатIэм и зыужьыкIэм. ЕтIанэгъэ Вишневский А. В. и цIэр зезыхьэ лъэпкъ медицинэ къэхутакIуэ центрым щIэныгъэ-практикэ лэжьыгъэ и лъэ­ныкъуэкIэ зэгурыIуэныгъэ дащIыну я мурадщ, республикэм щылажьэ хирургхэм я Iэзагъым щыхагъахъуэ егъэджэныгъэ курсхэр къызэрагъэпэщынущ.