Дызыщымыгъуазэ гъэщIэгъуэнхэр

Интернетым дыкъыщоджэ

1. Акулэм цIыхуу иукIым нэхърэ нэхъыбэ селфим (сурэт езыхэм зытезыхыжын зыфIэфIхэм) токIуадэ.

Псалъэм папщIэ, Индием щыIэ Тадж-Махал мэжджытым и щхьэм сурэт щызэтезыхыжыну 2015 гъэм дэкIуея, илъэс 66-рэ зи ныбжь туристыр лъагапIэм къехуэхри, зэшэзэпIэу иукIащ. Апхуэдэ насыпыншагъэхэр а илъэсым цIыху 12-м къалъысащ, атIэ абы къриубыдэу акулэм иукIар цIыхуи 8-щ зэрыхъур.

2. Кхъухьлъатэхэм нэхъ хуэму къалъэтыхь хъуащ, нэхъапэхэм елъытауэ.

Нью-Йорк уикIыу кхъухьлъатэкIэ Хьюстон къалэм укъэмыувыIэу укIуэн папщIэ сыхьэти 4 токIуадэ иджыпсту. АтIэ, 1973 гъэм а гъуэгуэнам сыхьэтищ нэхърэ нэхъыбэ ихьу щытакъым. Ар къызыхэкIар, кхъухьлъатэхэм къызэракIухь гъэсыныпхъэхэм я уасэм щIэмычэу зэрыхэхъуэ зэпытырщ. Авиакомпаниехэм абы и хэкIыпIэу къагъуэтар - нэхъ хуэму къэкIухьынырщ. Апхуэдэ щIыкIэми доллару мелуан бжыгъэкIэ фейдэ къахуещI.

3. Тутыным зэрану цIыхум къыхуихьым хуэдиз унэ зэщIэкъуэнми къыхуехь.

Ар къызыхэкIыр хьэкъущыкъухэр, унэлъащIэхэр зэратхьэщI, зэрагъэкъабзэ порошокхэм, нэгъуэщI-къинэмыщIхэм хэлъ химие пкъыгъуэхэрщ. Абыхэм я зэранкIэ, цIыхум астмэ къеуэлIэнкIэ шынагъуэ щыIэщ.

4. МыIэрысэ лIэужьыгъуэу дунейм тету хъуам щыщ зырыз махуэ къэс пшхыну яужь уихьэмэ, илъэс 20-м щIигъу абы пфIихьынущ.

МыIэрысэ лIэужьыгъуэу дунейм тетщ 7500-рэ. Илъэс 20-р - ар махуэ 7300-рэ мэхъу. Аращи, феплъ.

5. Жэмхэм, я цIэкIэ зэджэхэм, илъэсым къриубыдэу шэуэ литр 258-кIэ нэхъыбэу къат, цIэ гуэр зимыIэ жэмхэм нэхърэ.

ЩIэныгъэлIхэм ирагъэкIуэкIа къэхутэныгъэхэм къызэрагъэлъэгъуамкIэ, зи цIэ куэдрэ ираIуэ, зэдэхащIэ, зэпсалъэ жэмхэм шэ нэхъыбэ къащIокI, сыту жыпIэмэ, ахэр нэхъ Iэсэ мэхъу икIи нэхъ пIейтеиншэщ.

6. Зы къэрандащкIэ километр 56-рэ зи кIыхьагъ линие пхуитхъэнущ.

КъызэрыгуэкI, цIыхухэм нэхъыбэу къагъэсэбэп къэрэндащымкIи километр 56-м щIигъу линие пхуитхъэнущ е псалъэу мин 45-рэ пхуэтхынущ.

7. Китайм, илъэс 2500-кIэ узэIэбэкIыжмэ, ахъшэм и пIэкIэ сэ жанхэр щызекIуэу щытащ.

Домбеякъым къыхэщIыкIа сэ жанхэр ахъшэм и пIэкIэ зекIуэу щытащ ди эрэм щIимыдзэ щIыкIэ 600-200 гъэхэм. Абы щыгъуэ Китай къэралыгъуэр зыIэщIэлъар Чжоу пащтыхь лъэпкъырт.

8. Иджыпсту щыIэ телевизор пIащIэшхуэхэм къагъэлъагъуэ сурэтхэм, цIыхухэм хуэдэуи, хьэхэри йоплъыф.

Абы и щхьэусыгъуэр бжыгъэхэр зи лъабжьэу лажьэ иджырей телевизорхэм къагъэлъагъуэ сурэтхэр зэрынэхъ IупщIырщ. Ауэ хьэхэр телевизор щIемыплъыр ахэр лъагэу Iэтауэ зэрыщытырщ. Лъахъшэу ягъэуву щытмэ, фIэгъэщIэгъуэну хьэр еплъынущ абы къигъэлъагъуэ сурэтхэм.

9. Илъэс 5000-кIэ узэIэбэкIыжмэ, Мысырым боулинг щыджэгуу щытащ.

Мысырхэр боулинг щыджэгурт пэш инхэм - метриплI хуэдиз я зэхуаку дэлъу цIыхуитI зэпэувырти, зым топышхуэ, адрейм топ цIыкIу идзырт.

10. Иджырей къэралхэм ящыщу Европэм залымыгъэкIэ и дамэ щIимыгъэувауэ е ящIхэр ирамыгъэубыдауэ щыIар 5 къудейщ.

ХVI лIэщIыгъуэм къыщыщIэдзауэ 1960 гъэхэм нэсыху дунейм и дэтхэнэ щIы кIапэри, зэрыжаIэу, Европэм иубыдат, лъапсэрых зауэ абы щыпсэухэм ярищIылIэурэ. Ауэ абыхэм яхэтакъым Корее Ипщэмрэ Ищхъэрэмрэ, Япониер, Таиландыр, Либериер. Ахэр зэи зыми и бжьым щIэувакъым.

11. Nutella шыхыныгъуэу зы илъэсым къриубыдэу щIакхъуэм тецIэлъауэ яшхым топджэгу губгъуэу 1000-м щIигъу щIихъумэфынут.

Nutella-р къыщагупсысар 1940 гъэрщ, икIи сабийхэмрэ балигъхэмрэ ар апхуэдизкIэ ягу ирихьащи, нобэр къыздэсым мардэншэу ягъэкIуэщI.