МедалиплI къахьащ

                                                                                    Атлетикэ хьэлъэ                                               Шэшэн Республикэм и къэлащхьэ Грознэм  и «Олимпиада» спортIуэхущIапIэм атлетикэ хьэлъэмкIэ урысейпсо зэхьэзэхуэ щекIуэкIащ, Урысейм и ЛIыхъужь, мы щIыналъэм и япэ президент Кадыров Ахъмэт-Хьэжы и фэеплъу. Къэбэрдей-Балъкъэрым спортымкIэ и зэфIэкIыр зыгъэлъэгъуа ди щIалищымрэ зы пщащэмрэ медалиплI къахьащ, дагъэгуфIэу икIи дагъэгушхуэу.

         МахуиплIкIэ екIуэкIа зэхьэзэхуэшхуэм спортсмени 110-рэ хэтащ. Ди щIалищрэ зы хъыджэбзрэ абы щыIати, псоми ехъулIэныгъэ яIащ. Я цIэ къитIуэнщ ди республикэм и спорт щIыхьыр зыIэтахэм. Ахэр ХьэфIыцIэ Мурат (килограмми 109-м нэхъ мы нэхъ хьэлъэ гупым хэтащ), Къаскъул Аслъэн (килограмм 73-м нэс). Мы тIуми атлетикэ хьэлъэр зэрызэхэт лIэужьыгъуитIымкIи къагъэлъэгъуамкIэ япэ увыпIэр къахьащ. Нэгъуей Аниуар зыхэта гупым (килограмми 109-м нэс) ещанэ увыпIэр щиубыдащ. Килограмм 64-м нэхъ мы нэхъ хьэлъэ гуп зыхэтам абыи ещанэ увыпIэр къыщихьащ Мэлыхъуэ Алинэ.

         Апхуэдэ ехъулIэныгъэ зиIа ди спортменхэр я гъэсэнщ ХьэфIыцIэ Мухьэмэд, Щауэ МуIэед, Сусликов Артем, Нуждин Павел, Шикемов Михаил, Дэщ Анатолэ сымэ.

         Ди гуапэу дохъуэхъу апхуэдэ зэфIэкI къэзыгъэлъэгъуа спортсменхэми гъэсакIуэхэми.

                                                                                                      Тхэквондо

                                      Ди щIалэщIэр ещанэщ

         ШыщхьэуIум (августым) и 18-м щыщIэдзауэ и 26 пщIондэ Къэзахъстаным и къэлащхьэ Астана олимпиадэм хэмыхьэ тхэквондо спорт лIэужьыгъуэмкIэ дунейпсо зэхьэзэхуэ щекIуэкIащ. Къэрал 62-м къикIахэр я ныбжь елъытакIэ ягуэшат. МинитIым щIигъут зэхьэзэхуахэм я бжыгъэр.

         ТхэквондомкIэ Урысейм и Федерацэм къызэритымкIэ, илъэс 14 – 15 зи ныбжь, килограмм 65 нэс зи хьэлъагъ гупым хъарзынэу зыкъыщигъэлъэгъуащ Къэбэрдей-Балъкъэрым щыщ Дым Константин.

         Пэублэу абы къыпэщIэтахэщ Индиемрэ Монголиемрэ къикIа спортсменхэр. Ар тIуми текIуэри, и Урысей командэ къыхэхам хэт Польянов Степан IущIащ икIи, ди жагъуэ зэрыхъунщи, абы пэлъэщакъым. Ауэ ещанэ увыпIэри мыпхуэдэ дунейпсо зэхьэзэхуэ, апхуэдиз къэралым къикIа спортсмен куэдыкIей зыхэтам къыщыпхьынри ехъулIэныгъэшхуэщ.

         Ди щIалэщIэр зыгъэсар куэдым фIыуэ яцIыху, зэфIэкIышхуэ зиIэу къекIуэкI Кан Юрийщ.

                                                                                                              Дзюдо

                           Бабаевым и фэплъ зэхьэзэхуэ

         Налшык махуищкIэ щекIуэкIащ дзюдо спортымкIэ СССР-м и мастер Бабаев Къуанч и фэеплъ урысейпсо ныбжьыщIэ зэхьэзэхуэ. Ди щIалэхэм мыбы медалибл къыщахьащ.

         Егъэлеяуэ ину икIи екIурэ-ещхьу къызэгъэпэща хъуат мы зэхыхьэр. Ди къэралым и щIыналъэ зэмылIэужьыгъуэу 32-ум къищынэмыщIауэ, Осетие Ипщэм и спортсменхэри зэпеуэм хэтащ хъыджэбз, щIалэ цIыкIухэу. Я ныбжькIэ илъэс 15 - 17 хъу зэхьэзэхуахэр 800-м нэблагъэрт.

         Я хьэлъагъ елъытакIэ зыхэт гупым ди спортсмен хэтахэм япэ увыпIэр къэзыхьахэр – Мизиев Хьэжымусэ (килограмм 73-рэ). Ар блэ бэнати, хэм  зэманыр и кIэм нэмысу текIуэныгъэр къихьащ. Зэщ зэману хухахам къриубыдэу и хьэрхуэрэгъур щыхигъэщIар.

         Бер Руслан (килограмм 66-рэ), Мамий Астемыр (килограмм 81-рэ), Беслъэней Дамир (килограмм 90) сымэ етIуанэ увыпIэр къахьащ.

         Ещананэ хъуахэщ: Къуэдзокъуэ Иланэ (килограмм 40), Хъуран Каринэ (килограмм 48-рэ), КIуж Тамерлан (килограмм 55-рэ).

         Мы зэхьэзэхуэм Барнаул къалэ щыпащэнущ щэкIуэгъуэ (ноябрь) мазэм и 9 - 11-хэм. Абы хэтынухэр илъэс 18 нэхърэ мынэхъыжьхэмрэ мы екIуэкIа зэхьэзэхуэм къыхэжаныкIахэмрэщ.

                                                                                              ШАФИЙ Аслъэн.