ЕхъулIэныгъэ яIэу

ШыщхьэуIум 19-м къыщыщIэдзауэ и 31 пщIондэ Екатеринбург университет спортым и Дунейпсо фестиваль щокIуэкI. Мыбы хэтщ студент 2500-м щIигъу. Къэрал 36-м я еджапIэ нэхъыщхьэхэм къикIахэр спорт лIэужьыгъуэ 14-кIэ зэпоуэ.

Я хьэлъагъ елъытакIэ гуп 14-у гуэшауэ щыта цIыхухъухэмрэ цIыхубзхэмрэ дзюдомкIэ я зэхьэзэхуэм хэта Къэбэрдей-Балъкъэр къэрал университетым и студентхэм ехъулIэныгъэфIхэр къагъэлъэгъуащ.
Килограмм 90 зи хьэлъагъ гупым Къуныжь Ролан къыщыпэщIэтауэ хъуам ятекIуэри, япэ увыпIэр къихьащ. КIэух зэIущIэм абы къыпэщIэтар Кемеровэ къалэм щыщ Гербзомер Евгенийти, ар хигъащIэри бжьыпэр иубыдащ.
Килограмм 81-рэ зи хьэлъагъ гупым ди студент Хьэжмэт Къантемыр ещанэ увыпIэр къихьри, абы домбеякъ медалыр къратащ.