Ди щIалэм и текIуэныгъэ

  

ТхэквондомкIэ Урысейм и зэгухьэныгъэм и президентым и Кубокыр къэхьыным теухуа зэхьэзэхуэ Одинцовэ къалэм щекIуэкIащ.

Ди къэралым и щIыпIэ зэмылIэужьыгъуэу 26-м къикIа цIыхухъу, цIыхубз спортсмену 220-м щIигъу хэтащ мыбы.

ЗэфIэкI зэриIэр зэпеуэм щигъэлъэгъуащ Къэбэрдей-Балъкъэрым икIа Багъ Идар. Ар килограмм 58-рэ зи хьэлъагъ гупым хэтати, текIуэныгъищ зэкIэлъыпыту къихьри, кIэух зэхьэзэхуэм нэсыфащ. Абдеж ар щыхуэзащ Самарэ областым щыщ Магомедов Магомедгаджи. Мыбдежи ди щIалэр къикIуэтакъым, сыт и лъэныкъуэкIи ефIэкIащ къыпэщIэтам икIи япэ увыпIэр иубыдащ.

 Ахъмэт Амирщ Багъ Идар зи гъэсэныр.

 

 

Кэнжэ жылагъуэм спортымкIэ и «Пять колец» академием ветеран командэхэм я зэхьэзэхуэ щекIуэкIащ. Ар футболыр егъэлеяуэ фIыуэ зылъагъуу, республикэм щыджэгу футболистхэми пщIэшхуэ зыхуащIу щыта, гъэ блэкIам щIалэу гуузу дунейм ехыжа Хъурзокъуэ Анатолэ и фэеплъу къызэрагъэпэщат. 

Налшык и «Спартак» командэ пашэм и зы джэгугъуэ емыплъу къигъанэртэкъым Хъурзокъуэм. Абы щыджэгухэми фIыуэ къацIыхурт, пщIэшхуэ къыхуащIырт. Ар МВД-м и лэжьакIуэти, Бахъсэни, Шэджэми, Налшыки къулыкъу щищIат, полковникт. Анатолэ зыцIыхуу щытахэм жаIэ футболыр абы и лъым хэту псэуауэ жыпIэми ущымыуэну. Шэч хэмылъу, Налшыкым и «Спартакым» нэмыщI, ар и жылагъуэ «Кэнжэ» командэми хуабжьу дэщIырт – и текIуэныгъэр и гухэхъуэт, къыхагъэщIамэ, иринэщхъейт.

Футболыр фIыуэ зылъагъухэм ящыщ, ди командэ пашэм щыджэгуа, мы Iуэхур къызэзыгъэпэщахэм яз Мэшыкъуэ Аслъэн фIы дыдэу ицIыхурт икIи и ныбжьэгъушхуэу илъэс 35-кIэ къекIуэкIат Хъурзокъуэ Анатолэ. «Ар си гъэсакIуэу, ущиякIуэу щытауэ къызолъытэ. КъикIуэт умыщIэу текIуэныгъэм узэрыщIэбэныным, сытым щыгъуи захуагъэм утетын зэрыхуейм сыхуиущийрт лIыгъэрэ пэжыгъэрэ хэлъу дунейм тета си ныбжьэгъум», - жеIэ Мэшыкъуэм.

Ныбжьэгъухэми, благъэхэми, Iыхьлыхэми зызыщIагъакъуэри ирагъэкIуэкIащ мы зэхьэзэхуэр. Къэзылэжьым хуэпщIэр къызэромыхьэлъэкIым и щапхъэщ мы зэхьэзэхуэр зэрекIуэкIар.