Къуажэхэм спорт лэжьыгъэр зэрыщекIуэкIымкIэ дакъыхощ

Сочэ къалэм дэтщ Урысей Международнэ олимп университет. Иджыблагъэ абы къыщапщытащ ди къэралымрэ Китаймрэ спорт лIэужьыгъуэхэм зрагъэужьыным теухуауэ я лэжьэкIэр зыхуэдэр.
Ди гуапэу къыхэдгъэщыну дыхуейт къуажэхэм спортым зыщегъэужьыным, ныбжьыщIэрэ щIалэгъуалэу абы нэхъыбэ дегъэхьэхыным и лъэныкъуэкIэ ди республикэм щащIэр щапхъэу къалъытащ, Къэбэрдей-Балъкъэрым спортымкIэ и министр Хьэсанэ И. М. сертификатыр къратащ.

ЕхъулIэныгъэфI къагъэлъагъуэу

Кавказ Ищхъэрэм щыщу илъэс 13 - 14 зи ныбжь щIалэхэм боксымкIэ я зэпеуэ Налшык щекIуэкIащ. Абы хэтащ Къэбэрдей-Балъкъэр, Къэрэшей-Шэрджэс, Дагъыстэн, Ингуш, Осетие Ищхъэрэ - Алание, Шэшэн республикэхэм, Ставрополь крайм къикIахэу спортсмени 170-м щIигъу.
Ди щIалэхэм зэхьэзэхуэм ехъулIэныгъэфIхэр къыщагъэлъэгъуащ. Я хьэлъагъ елъытакIэ зыхэта гупым япэ увыпIэр къыщихьащ Батыр Ренат (килограмм 44-рэ). Ещанэ хъуахэщ Динаев Билал (килограмм 42-рэ), Мусуков Самат (килограмм 52-рэ), Къашыргъэ Азэмэт (килограмм 54-рэ), Даур Инал (килограмм 60), Шыкуэ Iэсхьэд (килограмм 70), Къудей Муртин (килограмм 75-рэ).
Зэпеуэм къыхэжаныкIахэр Урысейм пашэ щыхъуным щIэбэнынущ.