НэщэнэфI халъагъуэ

«Спартак-Налшык» (Налшык) - «Форте» (Таганрог) - 1:1 (0:0). Налшык. «Спартак» стадион. Мэлы­жьы­хьым и 22-м. ЦIыхуи 150-рэ еплъащ. 

Судьяхэр: Целовальников (Астрахань), Городовой, Пичугин (тIури Ставрополь щыщщ). 
«Спартак-Налшык»: Сиукаев, Далиев, Белоусов, Мэкъуауэ, Ольмезов, Топурие (ЛIыхъугу, 78), Хьэшыр, Жангуразов (ХьэцIыкIу, 63), Дэхъу, Торосян (Масленников, 63), ЛIуп.
«Форте»: Полянский, Машэжь, Мачилов (Балахонов, 83), Горюшкин, Муслуев, Володкин (Коржунов, 90+2), Могилев (Юрин, 83), Карташов, Саадуев, Малыш (Романов, 83), Лаврищев.
Топхэр дагъэкIащ: Лаврищевым, 81 (0:1). Ольмезовым, 90+2 (1:1). 
Дагъуэ къыхуащIащ: Мачиловым, Хьэшырым, Хьэ­цIыкIум, Лаврищевым, Полянскэм, Саадуевым.
Джэгум къыхахуащ: Саадуевыр (зэIущIэ нэужьым).

Урысей Федерацэм фут­болымкIэ и етIуанэ ли­гэм и Япэ гупым 2022 - 2023 гъэхэм щекIуэкI зэхьэзэ-хуэм и пэщIэдзэ Iыхьэм хыхьэ иужь зэIущIэр щэбэт кIуам Налшык щызэхэтащ. Ди щIалэхэм кърагъэблэ­гъат икъукIэ зыкъызэкъуэ­зыха Таганрог и «Форте»-р. ЖыпIэну ирикъунщ Къэ­бэрдей-Балъкъэрым и къалащхьэм къэкIуэным ипэ къихуэу хьэщIэхэм зэкIэлъ­хьэу­жьу зэIущIиплIым те­кIуэныгъэхэр къызэрыщахьар икIи а лъэхъэнэм къриу­быдэу топ дагъэкIахэмрэ къыхудагъэкIахэмрэ узэрагъэгужьейр: 22-1!
Апхуэдэу щыт пэтми, «Спартак-Налшыкым» и фут­­болистхэр джэгупIэ губгъуэм къихьащ я пщIэр ­лъагэу яIыгъыжыну хущIэкъуу. ГурыIуэгъуэт, япэ ­ли­гэм щIэбэныну командэ нэхъыфIихым ахэр зэры­хэ­- мы­хуэжынур, ауэ, гупым щы­пашэхэм ящыщ зым ­хуэ­­­фэщэну пэщIэтмэ, топ­джэгум дихьэххэм я гупэр нэхъ къыхуагъэзэжыным щыгугъырт. Ди жагъуэ зэ­ры­хъущи, а махуэм стадио­ным къекIуэлIар зырызурэ къыпхуэбжынут - цIыхуи 150-м нызэрыхьэсу арат.
Иужьрей текIуэныгъэ лъэщ­хэм игъэгушхуа «Фор­те»-м и футболистхэр зан­щIэу ипэкIэ кIуэтащ. Абы-хэм я капитан Пащты Руслан и фэбжьхэр иджыри зэр­имыгъэхъужам къыхэ­кIыу мы зэIущIэм хэтыфакъым. АрщхьэкIэ нэгъуэщI ди лъахэгъу Машэжь Ратмир тIуми я лэжьыгъэр ­щIигъуу кърихьэлIащ. Ар дэ­нэкIи къыщыщIидзырт икIи зэгуэр къыдэджэгуу щыта ди щIалэхэр хуабжьу гугъу иригъэхьырт.
Налшыкдэсхэри къикIуэ­тынутэкъым. Абыхэми къаруушхуэ трагъэкIуадэрт я ебгъэрыкIуэныгъэхэм. 
Апхуэдэу щыт пэтми а джэгум и хьэлэмэтагъ псори къы­щыхъуар кIэух да­къикъэхэращ. Адрей лъэхъэнэр зыщыбгъэгъупщэжми хъунущ. 
81-нэ дакъикъэм «Фор-те»-м и гъуащхьэтет Полянский Даниил топыр лъэщу къыдихуащ. Абы пэмыплъа ди гъуащхьэхъумэхэм яIэ­щIэ­кIащ ар напIэзыпIэм зы­Iэрыхьа Лаврищев Дмит-рий икIи бжыгъэр къызэIуха ­хъуащ. 
Къыпщыхъунут абдежым джэгур щыбгъэувыIэфыну. ФIэщщIыгъуейт хьэщIэхэм зи чэзу текIуэныгъэр зыIэ­щIагъэкIыну.
Налшыкдэсхэм къахуэ­нэжа къару псори зэщIагъэуIуащ, щытыкIэр ягъэ­зэкIуэжын папщIэ. Джэгум хухаха зэманыр иухыу ­судьям иджыри дакъи­къиплI къыщIигъуа нэужь­кIи, абыхэм я ебгъэрыкIуэ­ныгъэхэр ягъэувыIакъым. ИкIи 92-нэ да­къикъэм я насып къикIащ. Дэхъу Ис­лъам Iэзэу къыхита  угловойм иужькIэ, гъуащ­­хьауэ­хэм къадэIэпы­къуну къэкIуа Ольмезов Артур дахэ дыдэу бжыгъэр зэхуэдэ ищIыжащ.
ТекIуэныгъэр зи Iэ­рылъ­хьэу къэзылъыта хьэщIэхэр абы къигъэлыбащ. Абыхэм футбол хабзэр къызэпау- ду, судьям хуэмыфащэ ­ирапэсу хуежьащ, зэIущIэр зэриухами гу лъамытэу. Аращ къызыхэкIар Саддуевыр джэгум къыхахуу, щIалитI-щыми дагъуэ щIы­хуащIар. 
«Спартак-Налшыкымрэ» «Форте»-мрэ щызэдэджэгуа зэманым къриубыдэу стадионым пшэ фIыцIэхэр къыщхьэщыхьэри, уэ пIащэхэр хэлъу уэшхышхуэ къыщешхащ. ЗэIущIэм и кIэух дакъикъэхэм дыгъэр къыкъуэжри, лэгъупыкъури къахукъуэплъыжащ. Ди командэм и къэкIуэнум хуэгъэзауэ куэдым абы нэщэнэфI халъэгъуащ. Ауэ   ар къыщыхъуфынур мы гъэракъым - налшыкдэсхэр зэкIэ урысей футболым и лъащIэ дыдэм къыщынащ икIи адэкIэ нэхъыбэ ды­дэу зыщIэбэнынур етIуанэ ­ли­гэм и Япэ гупым и ебланэ увыпIэращ. 
Иджы щыгъуазэ фыхуэт­щIынщ иужьу зэхэта зэIущIэ­хэм къарикIуа бжыгъэхэм. Мис ахэр: «Биолог-Новокубанск» (Прогресс) - «Чайка» (Песчанокопскэ) - 0:2, «Алания-2» (Владикавказ) - «Динамо» (Ставрополь) - 0:2, «Легион» (Мэхъэчкъалэ) - «Мэшыкъуэ КМВ» (Псыхуабэ) - 5:1, «Кубань-Холдинг» (Павловскэ) - СКА (Дон Iус Ростов) - 2:0, «Дружба» (Мейкъуапэ) - «Черноморец» (Новорос­сийск) - 0:3.
КъыкIэлъыкIуэ джэгу­гъуэр «Спартак-Налшы­кым» Псыхуабэ щригъэ­кIуэ­кIынущ. Мэлыжьыхьым и 28-м ди щIалэхэр я хьэщIэнущ щIыпIэ «Мэшыкъуэ-КМВ»-м