Инджылызыбзэм уздынихьэсырМы тхыгъэр зытеухуа Хьэмыкъуэ Маринэ и IэщIагъэкIэ зэдзэкIакIуэщ. Нартан къуажэм щыщ бзылъхугъэр 2012 гъэм щыщIэдзауэ Нью-Йорк щопсэу. Псоми щIэдзапIэ яхуэхъуар 2009 гъэм КъБКъУ-м и педколледжыр диплом плъыжькIэ къиуха нэужь, ФилологиемкIэ институтым и щIэныгъэм щыпищэм, къэралхэр студенткIэ зэрызэхъуажэ программэм хыхьэу, Америкэм и Штат Зэгуэтхэм зэрагъэкIуарщ. Маринэ къыхуихуащ штат зэмылIэужьыгъуэхэм (Вирджиние, Калифорние, Нью-Йорк) щыпсэуну .Мы зэманым и хэщIапIэр Нью-Йоркщ. 2017 гъэм Нью-Йорк университетым Бруклин щиIэ колледжым инджылызыбзэмкIэ и къудамэм щIэтIысхьэри 2020 гъэм ехъулIэныгъэкIэ къиухащ. Иужьрей илъэсипщIым IэнатIэ 20-м нэблагъэ зэрихъуэкIащ Маринэ. Къэбгъэлъагъуэмэ, абы къыхуихуащ актёр Джекман Хьюрэ модельер Лорен Ральфрэ я деж щылэжьэну. Зэгуэр абы зыкъыхуигъэзат канцеляр Iэмэпсымэхэр къыдэзыгъэкI IуэхущIапIэм, рекламэ псалъэхэр зэхригъэгъэувэну. А лэжьыгъэр игу ирихьауэ, абы адэкIи зэрыпищэным хущIокъу. Хьэмыкъуэ Маринэ штатым хыхьэу здэщыIа щIыпIэхэм ящыщу игу нэхъ дыхьахэм ящыщщ Гавайе, Новый Орлеан, Гранд Каньлн, Сан-Францискэ, Чикагэ, Нью-Йорк, ауэ и гум нэхъ дыхьэр. - Ар Нью-Йорк нэгъуэщI щIыпIэхэм къащхьэщызыгъэкIыр лъэпкъ зэмылIэужьыгъуэ куэд абы зэрыщыпсэурщ. Куэдрэ урохьэлIэ зэгъунэгъуу щыт унэхэм, IуэхущIапIэхэм зи щэнхабзэкIэ, бзэкIэ зэпэжыжьэ лъэпкъхэр щыпсэууэ. Хэхэс адыгэхэм я зэгухьэныгъэ Америкэм и Штат Зэгуэтхэм къыщызэзыгъэпэща Натхъуэ Къадыррэ и щхьэгъусэ Натхъуэ Суадрэ мызэ-мытIэу сахуэзащ. ЦIыху щэджащэхэр, тхылъ щхьэпэхэр, ди лъэпкъ макъамэхэмрэ къафэхэмрэ зыхилъхьэ щыIэкъым Маринэ. Джекман Хью и кофе ефапIэм щыщылажьэм, ар епсэлъэну къыхуихуащ актёрхэу Леонардэ Ди Каприо, Найтли Кирэ, Смолдерс Коби, музыкант Джош сымэ. Кофе ефапIэхэм щIэсыну, абы щытхэну фIэфIщ Хьэмыкъуэм. Апхуэдэу щIэх-щIэхыурэ макIуэ Бродвей театрым и мюзиклхэм еплъыну, Карнеги-холл концерт залым щыжаIэ классикэ макъамэхэм едэIуэну. Къэбгъэлъагъуэмэ, Бродвей театрым и мюзиклхэр лъабжьэ яхуохъу Голливудым щытрах фильмхэм. «Тhe Daily Show» теленэтыныр езыгъэкIуэкI Ной Тревор зригъэлъэгъуну и нэ къикIырт Маринэ. КърихьэлIахэр хэт дэнэ къикIами щахэупщIыхьым, чэзур Маринэ къылъысащ икIи абы жиIащ Урысейм зэрыщыщыр. Абы щыгъуэм Нойрэ Маринэрэ дакъикъитхукIэ зэпсэлъащ. Ар 2017 гъэрт, президент Трамп хаха къудейт, къэралхэм я зэхущытыкIэр Iейтэкъым. Колледжым щыщеджа иужьрей илъэсыр уз зэрыцIалэм ирихьэлIэри, зэпэIэщIэу Маринэ иригъэджат американ, британ тхакIуэ цIэрыIуэ Харрисон Кэри. Нобэр къыздэсми ИнтернеткIэ зэрощIэ ахэр икIи Кэри Маринэ пхъу пэлъытэу, и интернет-адэу зелъытэж, зэи зэрызэхуэмызам къыхэкIыу. ТхакIуэм къыдигъэкI тхылъыщIэхэр Маринэ къыхуегъэхь.
Поделиться:
Читать также:
19.05.2024 - 11:18 →
Дахагъэм дихьэххэм я кIуапIэ
18.05.2024 - 12:48 →
Кинофестивалым и махуэхэр
18.05.2024 - 12:26 →
Дохутырхэр лэжьыгъэ и пIалъэкIэ зохъуажэ
18.05.2024 - 10:01 →
ЕджапIэ нэхъ ин дыдэр
15.05.2024 - 17:01 →
«ТекIуэныгъэм и щIэблэр»
|