Щыгъын дизайнымкIэ PROfashion Masters урысейпсо зэпеуэм и IэдакъэщIэкIхэр щигъэлъэгъуащ Къэрэгъэш къуажэ щыщ адыгэ щIалэ Мысрокъуэ СулътIан. Абы утыку ирихьа щыгъынхэм адыгэ фащэм и пкъыгъуэхэр гъэщIэгъуэну къыщыгъэсэбэпащ.
СулътIан Бизнесымрэ дизайнымкIэ институтым (Москва) и ещанэ курсым щоджэ. ЩIалэм жеIэ иджыри сабий дыдэу щыгъыным и теплъэм, дыкIэм зэрыдихьэхар. Ар еплIанэ классым щIэсу арат дэн IэщIагъэм зыхуигъэсэну щытриухуам. Дизайнер IэщIагъэ зэрыщыIэр абы иужькIэщ къыщищIар. Ебланэ классым щыщIэдзауэ абы къилъыхъуэн щIидзат а IэщIагъэм хухэха еджапIэ нэхъыфI.
Иджыблагъэ зыхэта зэпеуэм щилъэгъуахэм теухуауэ щIалэм жиIэр гъэщIэгъуэнщ. Апхуэдэу и гугъу ещI къежьапIэ хуэхъуам.
- Пэжщ, сэ къызгурыIуэрт ар цIыхъухъу IэщIагъэу зэрыщымытыр, абы къыхэкIыу си унагъуэм яфIэмыфIыну къысщыхъурт, - щыжеIэ Мысрокъуэм и интервьюхэм язым. - Ауэ сызэримыгугъауэ къыщIэкIащ. Уеблэмэ си унагъуэращ сытезыгъэгушхуар. Абы фIыщIэ яхуэсщI зэпытщ.
Шэч хэмылъу, къысщIэнакIэ куэдми срихьэлIащ. Си IэщIагъэр къыщащIэм ягъэщIагъуэу къыщIэупщIэжырт, емыкIу сыкъызэращIыр къыхагъэщу. Абы щыгъуэ си IэщIагъэр зищIысыр цIыху къэс щхьэхуэу яжесIэу щытащ, ауэ иджы зыми зыри къыгурызгъэIуэну яужь ситыжкъым.
Модэм ехьэлIауэ ди къэралым зэпеуэ мащIэ дыдэщ щыIэр. PROfashion Masters-м ди зэфIэкI дыщеплъыжыну ди егъэджакIуэхэм къыджаIати, сытегушхуащ. Адыгэ фащэм хэт пкъыгъуэхэр къыщыгъэсэбэпа щыгъын лIэужьыгъуэхэр сщIыри яхуезгъэхьати, зэпеуэм хэтыну къыхахахэм сыхэхуакъым. Ауэ си лэжьыгъэхэр ягу ирихьати, шоу иным щызгъэлъэгъуэну Iэмал къызатащ. Арати, Nelka** Компанием сригъэблэгъащ (Орёл къалэ дэтщ). Абы си сурэтхэм япкъ иткIэ макет ягъэхьэзырри, зыгуэрхэр зэзгъэзэхуэну къызэчэнджэщащ. Сызэрымыарэзыи сигу ирихьа гупсыси зэхызагъэхащ. Апхуэдэ производствэхэм уадэлэжьэныр икъукIэ Iуэху гугъущ, ауэ щыхъукIи куэдым ухуагъасэ.
Си фэилъхьэгъуэхэр гала-концертым и кIэух Iыхьэм щагъэлъэгъуащ. КъэпщытакIуэ гупым хэтхэр къызбгъэдыхьэурэ къызэхъуэхъуащ, зэпеуэм сыхыхьамэ, увыпIэхэм яз къызэрысхьынум шэч къызэрытрамыхьэр къызжаIащ. Гъэ къакIуэ Iэмал имыIэу зэпеуэм сыхыхьэну сытрагъэгушхуащ. Си фэилъхьэгъуэхэр зэрыщыту ящэхуну хьэзыру зыкъысхуэзыгъэзаи щыIэщ, ауэ здакъым, ар иджыри нэгъуэщI щIыпIэхэм щызгъэлъэгъуэну сыхуейщ. Сэ си мурадщ зэпеуэм сызэрыхэта щыгъынхэм, иджы сызэлэжьхэри дэщIыгъуу, Модэм и тхьэмахуэм щызгъэлъэгъуэну (Москва къалэ).
А зэпеуэм дизайнер, модель, сурэттех куэд къыщысцIыхуащ. А унэтIыныгъэмкIэ ехъулIэныгъэ зыIэрызыгъэхьа цIыху куэдым я телефон номерыр къызатри, сысейри сIахащ. Зы компание гуэрым утыку къисхьа фэилъхьэгъуэхэм хуэдэ куэду къыщIигъэкIыну зэгурыIуэныгъэ есщIылIэну къысхуигъэлъэгъуати, здакъым.
Мы щыгъынхэм адыгэ нагъыщэ ятелъщ. Сэ сфIэгъэщIэгъуэнщ адыгэ фащэм и пкъыгъуэхэр къызэрыбгъэсэбэп хъуну Iэмалхэр, абы къыпкърыпх хъуну Iыхьэхэр, ахэр иджырей фэилъхьэгъуэхэм зэрахэзэгъэнум.
ИджыкIэ сэ сызэлэжьыр куэдкIэ нэхъ къызэрыгуэкIыу къызолъытэ, сыт щхьэкIэ жыпIэмэ, еджапIэм къытхуагъэув жыпхъэм дытекI хъуркъым. Ауэ, дяпэкIэ сыхуейщ сыкъызыхэкIа лъэпкъым и Iэужьыр си фэилъхьэгъуэхэм къыщызгъэлъэгъуэну.
ЗэрыжысIащи, гъэ къакIуэ сэ сыхэтыну си мурадщ PROfashion Masters зэпеуэм, Модэм и тхьэмахуэм (Москва). Горькэм и цIэр зезыхьэ паркым ди деж щеджэхэм я IэдакъэщIэкIхэм я гъэлъэгъуэныгъэ ин щащIынущи, абыи сыхэтынущ. Апхуэдэу си мурадщ Москва къалэ и Дизайнерхэм я зэгухьэныгъэм къызэригъэпэщ зэпеуэм си зэфIэкI сыщеплъыжыну.
Сыт хуэдэу Iуэхури езыгъэфIакIуэр лэжьыгъэрщ. НэгъуэщIхэм я IэдакъэщIэкIхэм уахуеплъэкI зэпыту улажьэмэ, езым уи хъэтI пфIэкIуэдынкIэ зыхуэIуа щыIэкъым. Сэ дунейм си IэщIагъэращ сызэрепсэлъэфыр, сэркIэ мыхьэнэ ин иIэщ сыкъызыхэкIар, сыкъэзыухъуреихь дунейр зэрызыхэсщIэм, - жеIэ СулътIан.
Адыгэ щIалэм и зэфIэкIым хэхъуэну, ехъулIэныгъэ щымыщIэну ди гуапэщ.
Тэрчокъуэ Дисэ.