Дэфтэр зэрызелъафэ хэмыту

 «Справедливая Россия – за правду» партым и депутатхэу Къанокъуэ Тимуррэ Кузнецов Дмитрийрэ иджыблагъэ Къэрал Думэм и пащхьэм жэрдэмыщIэкIэ къихьащ. ЦIыхубэм я лIыкIуэхэм я мурадщ Урысейм щыщ лъэпкъхэм къахэкIауэ хамэщIхэм щыпсэу хэхэсхэм дяпэкIэ ди къэралым щыпсэуну хуитыныгъэ къезыт дэфтэрыр («вид на жительство») нэхъ тыншу къыдахыфу ящIыну.

          Зи гугъу тщIы жэрдэмыр «Урысей Федерацэм и цIыхуу хамэ къэралхэм щыпсэухэр хабзэкIэ зэрыт щытыкIэм теухуауэ» зыфIаща къэрал хабзэм и 8-нэ статьям и проектым гуэдзэн хуэхъуу аращ.

           Иджыпсту екIуэкI хабзэмкIэ, хамэ къэралым къиIэпхъукIыжу Урысейм щытIысыжыну хуей нэрыбгэм япэщIыкIэ пIалъэ пыухыкIа гуэркIэ къэралым щыпсэуну хуитыныгъэ къезыт дэфтэр къыIехри, а зэманыр дэкIа нэужьщ «вид на жительство» жыхуаIэм щIэлъэIуну щыхуитыр.  Къанокъуэ Тимуррэ Кузнецов Дмитрийрэ ягъэхьэзыра гуэдзэным ипкъ иткIэ, тхыдэ лъабжьэкIэ Урысейм щыщ лъэпкъым къыхэкIахэр е зи адэ-анэр апхуэдэм щыщыр ипэрей дэфтэрым емылIалIэу, занщIэу «вид на жительство» къыIихыну хуитыныгъэ иратынущ. Дауи, упщIэ псори зэкIуэлIэжыр а «Урысейм щыщ лъэпкъ» («коренные народы») жыхуаIэращи, абы хиубыдэнухэр УФ-м и Правительствэм иубзыхунущ.

       «Урысейм и щIыбкIэ урысыбзэкIэ псалъэу цIыху мелуан 20-м нэс щопсэу, - дыкъыщоджэ Къанокъуэмрэ Кузнецовымрэ я гуэдзэным. – Абыхэм я гъусэщ тхыдэкIэ УФ-м щыщ лъэпкъхэм ящыщхэри. Урысейм и цIыху хъун гукъыдэж къызыкъуахмэ, Iэмал имыIэу илъэсихкIэ екIуэкIыну дэфтэр зэрызелъафэм ахэр хэтын хуей мэхъу, иджыпстурей хабзэмкIэ. «Вид на жительство» дэфтэрыр нэхъ тыншу къыдахыфу хъумэ, я Хэкур нэхъ псынщIэу ягъуэтыжыфынущ абыхэм. 

        2023 гъэм дыгъэгъазэм и 4-м УФ-м и Президент Путин Владимир Граждан жылагъуэм зиужьынымрэ цIыхум и хуитыныгъэм зыщIэгъэкъуэнымкIэ советым и зэIущIэм къыщыхилъхьауэ щытащ  ди къэралым имыныбжьэгъу хэкухэм щыпсэу урысей хэхэсхэр УФ-м къэIэпхъуэжыным тегъэгушхуэн, а лъэныкъуэмкIэ екIуэкI хабзэ зэрыхъахэр зэрыхыжын зэрыхуейри. Къанокъуэмрэ Кузнецовымрэ къыхагъэщ мы иджыпсту зи ужь ихьа зэхъуэкIыныгъэхэр хабзэм халъхьэфмэ,  Урысейм  къэIэпхъуэж хэхэсхэр  нэхъ тыншу къэралым щыпсэу цIыхубэм зэрахэзэгъэнур, гражданствэ къезыт дэфтэрхэри нэхъ псынщIэу зэраIэрыхьэнур.

       «А псом ипкъ иткIэ, Урысейм щызекIуэ щэнхабзэм хэпщIа хъун,  къызыхэкIа и лъэныкъуэкIэ зи лъабжьэр УФ-м епха лъэпкъхэм ящыщхэу къэралым къэIэпхъуэжыну хуейхэм папщIэ, хабзэм а зэхъуэкIыныгъэхэр халъхьэныр тфIэигъуэщ», - ятх депутатхэм.

         Абыхэм къыхалъхьа жэрдэмым адыгэхэр къызэрымыкIуэу зэрыщыгуфIыкIам утемыпсэлъыхьми хъунущ. Iуэхур къезыхьэжьаитIым я зыр ди щIыналъэм и лIыкIуэу зэрыщытым нэмыщI, зэIущIэ лъагэм уи лъэпкъэгъухэм яхуэщхьэпэну гупыжкIэ укъыщыпсэлъэфыныр цIыхубэм уи пщэ къыдалъхьа къалэныр зэрыпхуэгъэзащIэм и щыхьэтщ.  Апхуэдэхэр нэхъыбэху, лъэпкъым и Iуэхури дэкIынущ, пщэдейрей махуэм хуич лъэбакъуэхэр кIуэ пэтми нэхъ быдэ хъууэ.

                                               ЧЭРИМ Марианнэ.