Урысей Федерацэм и Президент Путин Владимир къыхилъхьа жэрдэмымрэ къыдигъэкIа унафэмрэ тету, 2024 гъэр ди къэралым щагъэу-ващ Унагъуэм и илъэсу. Абы ипкъ иткIэ, дызытехьа илъэсым къриубыдэу къэралым щалэжьыпхъэ Iуэхугъуэхэм ящыщ куэд хуэгъэпсауэ щытынущ унагъуэхэм адэкIи защIэгъэкъуэным, абы илъ фIыгъуэхэр хъумэным.
Апхуэдэу гъатхэпэм и кIэухым щIидзауэ мэлыжьыхьым и 14 пщIондэ екIуэкIынущ «Унагъуэм илъ хабзэхэр» урысейпсо акцэр. Ар хеубыдэ «ШколакIуэхэм папщIэ щэн хабзэ» егъэджэныгъэ проекту Унагъуэм и илъэсым хуэгъэпсам, Урысей Федерацэм щыпсэу лъэпкъхэм я хабзэхэр, щэнхабзэхэр хъумэным хуэунэтIам.
А проектым къыщыгъэлъэгъуа Iуэхугъуэхэм япкъ иткIэ, тхьэмахуитIым къриубыдэу къэралым и школакIуэ псори, лъэпкъ хабзэмрэ щэнхабзэм-рэ щIэин лъапIэу зылъытэ унагъуэхэри къыхураджэ зыщыщ унагъуэм щекIуэкI гъащIэм, илъ хабзэхэмрэ щалъытэ лъапIэныгъэхэмрэ ятеухуа видео кIэщI цIыкIухэр трахыну. Ахэр тещIыхьауэ щытын хуейщ «Лъэпкъ уэрэд жыIэныр», «Лъэпкъ къафэ гъэзэщIэныр», «Лъэпкъ макъамэ Iэмэпсымэхэм еуэныр», «Лъэпкъ шхыныгъуэхэр гъэ-хьэзырыныр», «Лъэпкъ IэпщIэлъапщIагъэр» унэтIыныгъэхэм языхэзым.
Хьэзыр хъуа лэжьыгъэхэр иралъхьэ «Культура для школьников. РФ» урысейпсо порталым. Абыхэм хоплъэ еплъы- ныгъэ-зэпеуэм къыхузэрагъэпэща къэпщытакIуэ гупыр. Лэжьыгъэ псоми щыгъуазэ зыхуащIа нэужь, абыхэм къыхахынущ нэхъыфIу къалъыта фильм кIэщI цIыкIу 50-р икIи хэIущIыIу ящIынущ, ахэр зи IэдакъэщIэкI ныбжьыщIэхэм-рэ унагъуэхэмрэ пщIэ хуащIу.
Iуэхур хуэунэтIащ къытщIэхъуэ щIэблэм къызыхэкIа лъэпкъымкIэ иIэ щIэныгъэм хэгъэхъуэным, ныбжьыщIэхэм яIэ лъэпкъ зэхэщIыкIым зегъэужьыным, сабийхэм я лъэпкъым, унагъуэм къадэгъуэгу-рыкIуэ хабзэ дахэхэмкIэ гушхуэныгъэ яIэу къэгъэтэджыным. Ди къэралым и пашэм зэрыжиIащи, унагъуэ зэкъуэту ущытыныр ипэжыпIэкIэ гъащIэм ущиIэфынкIэ хъуну фIыгъуэхэм я нэхъыщхьэщ. Унагъуэращ лъагъуныгъэм, нэмысым, зэхуэпэжыным, адэ-анэм пщIэ яхуэщIыным, щIэблэм гъуэгу етыным я лъаб- жьэр здэщыIэр, къэралми жылагъуэми я тегъэщIапIэр. Аращ цIыхум дунейр къыщищIэр, зыужьыныгъэм и япэ лъэбакъуэхэр щичыр, къызыхэкIа лъэпкъым и хабзэр, щэнхабзэр щызыхилъхьэр, тхыдэм щыгъуазэ зыхуэщIыныр щиублэр, и Хэкур, унагъуэм исхэр фIыуэ илъагъун щыщIидзэр.
А Iуэхугъуэхэм мыхьэнэшхуэ езытхэращ, ар цIыху щхьэхуэу е унагъуэу щрет, лъэпкъыу е къэралу ирехъу, къэкIуэну дахэ зиIэнур, щIэблэ узыншэ къызыщIэувэнур. Аращ щIыжаIэр: «Унагъуэр къэралым и зы Iыхьэщ, жылагъуэм и быдапIэщ». Зи гугъу тщIа проектри зыхуэгъэпсар аращ.
Къыхэдгъэщынщи, «ШколакIуэхэм папщIэ щэнхабзэ» егъэджэныгъэ проектыр къэралым щагъэзащIэ, УФ-м ЩэнхабзэмкIэ, ЕгъэджэныгъэмкIэ я министерствэхэм я нэIэм щIэту. А Iуэхум жыджэру хэтщ Щэнхабзэ стратегиемрэ проектхэмкIэ центрымрэ Урысейм и Щэнхабзэ фондымрэ.
ТАМБИЙ Линэ.