Къэбэрдей-Балъкъэр къэрал университетым щоджэ къэралым и щIыпIэ зэмылIэужьыгъуэ куэдым къикIа щIалэгъуалэр. Васильченкэ Мирославэ Социально-гуманитар институтым и студентщ, ар ДНР-м щыщщ, ди университетым щекIуэкI гъащIэм жыджэру хэтщ.
Мирославэ и сабиигъуэр щыкIуар Донецк ЦIыхубэ Республикэм хыхьэ Снежное шахтёр къалэ цIыкIурщ. Абдеж къыщожьэ абы и унагъуэ дахэмрэ творчествэм, гуманитар щIэныгъэхэм хуиIэ лъагъуныгъэмрэ я хъыбарыр.
- Си адэ-анэр сыт и лъэныкъуэкIи си телъхьэу, си щIэгъэкъуэну зэрыщытым къыдэкIуэу, гъащIэм сыхуагъэIущащ, гъэсакIуэ нэхъыщхьэу си япэ итхэщ. Ахэр хэмытамэ, мы сызытет гъуэгум сытегушхуэнутэкъым, - къыддогуашэ Мирославэ.
Хъыджэбзым курыт школыр дыщэ медалрэ Щытхъу тхылъ бжыгъэншэхэмрэ и Iэрылъхьэу къиухащ. Ар фIыуэ зэреджэм нэмыщI, классымрэ еджапIэмрэ къызэрагъэпэщ сыт хуэдэ Iуэхуми жыджэру хэту щытащ. Зыуэ щыт къэрал экзаменхэм ерыщу зыхуигъэхьэзыращ абы: репетиторхэм я деж кIуащ, онлайн-курсхэм и щIэныгъэм щыхигъэхъуащ.
Журналист IэщIагъэр къызэрыхихамкIэ фIыщIэр зейуэ жиIэр сыт щыгъуи щапхъэу къилъытэ и дэлъху нэхъыжьырщ. Ар КъБКъУ-м и Журфакым щеджэрти, литературэр фIыуэ зылъагъу хъыджэбзми мурад ищIащ абы и лъэужьым ирикIуэну.
«Си дэлъхур си дежкIэ гъуазэщ жысIэмэ, сыщыуэнукъым. Сэри сыхуеящ, абы ещхьу, псалъэм срилэжьэну, цIыхухэм сепсэлъэну, а IэщIагъэ гъэщIэгъуэныр зэзгъэгъуэтыну», - жеIэ абы.
Мирославэ хэкум и къалащхьэм и еджапIэ нэхъыщхьэхэм хэплъакъым, къалэшхуэхэм ар дахьэхыртэкъым. Абы Къэбэрдей-Балъкъэрыр къилъытащ творческэ и лъэныкъуэкIэ тыншу зыщыбужьын щIыпIэ телъыджэу. «Мыбы мегаполисым щекIуэкI зэрызехьэм хуэдэ щыIэкъым, ауэ ущеджэнымкIэ, уи къэухьым, зэфIэкIым зыщебгъэубгъунымкIэ Iэмал псори къыщызэгъэпэщащ, - къыддогуашэ студентыр. - Университетым и япэ махуэхэр гъэщIэгъуэну, гуапэу сигу къинэжащ. Япэ дерсым сызыхэс гупым щыщ зыбжанэ си гъусэу дыкъыкIэрыхуат, шхапIэм зыщыдгъэгувэри. Ар мыхьэнэшхуэ зимыIэ къэхъугъэ цIыкIуфэкIущ, ауэ а Iуэхугъуэм ныбжьэгъу дызэхуищIащ», – пыгуфIыкIыу игу къегъэкIыж Васильченкэ.
Мыбы къыщIэтIысхьэн и пэ къихуэу хъыджэбзыр щыгъуазэ хъуат «Виват, студент» зэпеуэмрэ КъБКъУ-м щекIуэкI зэхыхьэ гъэщIэгъуэнхэмрэ. А проектхэращ ар дэзыхьэхари, ехъулIэныгъэ куэд къыпэплъэу къыщызыгъэхъури. Япэ курсым щыщIэдзауэ абы жыджэру хэтын щIидзащ студент зэхыхьэхэм.
- Псори къыщежьар Социально-гуманитар институтым еджэныгъэр зэрыщекIуэкIым дызэрыщагъэгъуэзарщ. Сэ си насып къикIащ абы ауэ сытми сыхэт мыхъуу, езгъэкIуэкIыну сыкъызэрыхахамкIэ, – игу къегъэкIыж Мирославэ. – Ауэрэ «Просвет», «Августенок», Урысейпсо студент гъатхэ… Абыхэм ящыщу си ехъулIэныгъэ нэхъыщхьэр «Виват, студент-2024» цIэр сэ къызэрысхуагъэфэщарщ. Школым иджыри сыщIэсу абы сыщIэхъуэпсу щытати, мис - къызэхъулIащ. Иджыпсту насыпыфIэ сещI си зэфIэкIыр си яужь ит щIалэгъуалэм естыну Iэмал сызэриIэм, игъащIэ псокIэ я гум къинэжыну махуэшхуэхэр къазэрыхузэзгъэпэщыфым папщIэ.
Мирославэ и мурадщ университетыр къиухмэ, журналист IэнатIэм пэрыувэну, творчествэ и лъэныкъуэкIэ и зэфIэкIхэм зригъэужьыну.
КъБКъУ-м и дипломыр пщащэм дежкIэ щIэныгъэ нэхъыщхьэ зэриIэм щыхьэт техъуэ дэфтэр къудейкъым. «Ар си гъащIэм щыщ лъэхъэнэ псощ: гукъэкIыж, ныбжьэгъу, гурыщIэ IэфIхэр тенджызым хуэдэу щыуэру. СыкъызэплъэкIыжмэ, къызгуроIуэ, нэгъуэщI щIыпIэ сыщеджэну сызэрыхуэмеяр. ЩIэрыщIэу къыщIэздзэжами, аргуэру КъБКъУ-р къыхэсхынут», - къыддогуашэ пщащэр.
