Илъэс 70 хуэдэкIэ узэIэбэкIыжмэ, ятха усэщ нобэ зи гугъу тщIынур. Ар илъэс 30 дэкIыжри, уэрэд цIэрыIуэ хъуащ. ДэнэкIи кърагъауэу щызэхэпхырт «Лъэмыж цIыкIум деж» уэрэдыр. Зи насып къэкIуэгъуэ пщащэ цIыкIуу абы дэпыхьам и гугъу умыщIыххэ!
АтIэ сыт и хъыбар апхуэдиз цIыху зытхьэкъуа уэрэдым? «Зы уэрэдым и хъыбар» нэтыным абы и гугъу щищIащ журналист КIунтIыщ-ХьэпцIэ Аннэ.
- Уэрэдым и хъыбар зэхуэсхьэсыну сыщежьэм, япэу сэ зыхуэзгъэзащ уэрэдус Джэдгъэф Хъусен. «Сыту зэман жыжьэм сыхэбгъэплъэжа, Аня, - жиIэри, пыгуфIыкIыурэ хъыбарыр къыщIидзащ Хъусен. - А уэрэдыр щыстхам си щIалэгъуэ дахэт, ауэ унагъуэ сыхъуат. ХьэIишэт и цIэу хъыджэбздэсу шыпхъу нэхъыщIэ гушыIэрейуэ сиIэт. Абы езым ещхьыркъабзэу зы ныбжьэгъу иIэт, ари ХьэIишэтт. ТIуми я насып къэкIуэгъуэт, я дахэгъуэт. А зэманым сэ егъэджакIуэу Зеикъуэ дэт школым сыщылажьэрт. Махуэ гуэрым лэжьапIэ сыкъикIыжу, унэм сыдэмыхьэж щIыкIэ, джабащхьэм тIэкIу сытесынщ, жысIэри абыкIэ сунэтIащ. Зызгъэпсэхуну сетIысэхауэ, солъагъу а хъыджэбзитIыр псыхьэ кIуэуэ. Псы къыздрахыр жыжьэт, Бахъсэныжьым псы гуэж цIыкIу иIэти, аддэ лъэгум нэс фIыуэ уехын хуейт. Сытми пхъэхькIэ псы пэгун тIурытI джабэм къыдахауэ загъэпсэхуу щытт. Соплъэри, ди унэкъуэщ щIалэ Хьэжмурат къыкIуэцIрыкIыу солъагъу. ХъыджэбзитIым Хьэжмуратыр къызэралъагъуу, я псы пэгунхэр иракIутыжри, аргуэру псыхьэ кIуэ хуэдэу ягъэзэж. Iуэхур зытетыр къызгурыIуат, ауэ сыкIуэжа иужькIэ си шыпхъум соупщI апхуэдэу щIащIамкIэ. «ЗэгуэкIуаитIыр зэхуэзгъэзэну арат», - жиIащ абы дыхьэшхыурэ. Аращ хэлъар, а пщыхьэщхьэ дыдэм усэр стхащ. Ауэ илъэс куэдкIэ щылъащ зыми езмыгъэлъагъуу. Сытми, зы гъэ гуэрым АфэщIагъуэ Зое естри, абы макъамэ дахэ дыдэ хуитхащ. ИужькIэ радиом къэсхьри, Къардэн Хьэсэнрэ Сэкрэк Хьэсэнрэ езгъэдэIуащ. «Мыр Аслъэн Iэсият и макъым фIы дыдэу хуэкIуэнущ», - жаIэри, абы естауэ щытащ. Нобэр къыздэсым яфIэфIу цIыхубэр йодаIуэ, ар зи фIыщIэр Iэсияту къызолъытэ».
* * *
Мазэ цIыкIур, бгыпэм къыкъуэкIауэ,
Пшэхэм зыщигъэпщкIуу докIуэтей.
Пшапэ зэхэуэгъуэм, сфIэемыкIуми,
Псыхьэ сокIуэ лъэмыж цIыкIум деж.
Псы Iущащэм сэ сыныщыхэплъэкIэ,
Мазэр къысхуэщыгъуэу къысхукъуоплъ.
Псалъэу къызжепIахэм уепцIыжами,
Псыхьэ сокIуэ лъэмыж цIыкIум деж.
Лъэмыж цIыкIум сакъыу уэ сынипшурэ,
Лъагъуныгъэр Iуащхьэу сыбгъэщIащ.
«ДэкIуэ», - жаIэм, сыдэкIуэн сымыдэурэ
НэгъуэщI уи лэгъунэм къыщIэпшащ.
Иджы лIыкIуэ схуощI, ибгъэкIыжауэ,
МафIэр жьэгум пхьыжкIэ мыхуэбэж.
Ауэ, бампIэр сщхьэщыуэн къысфIэщIурэ,
Псыхьэ сокIуэ лъэмыж цIыкIум деж.
