Республикэм и Iэтащхьэ КIуэкIуэ Казбекрэ УФ-м экономикэ зыужьыныгъэмкIэ и министрым и къуэдзэ Назаров Сергейрэ ирагъэкIуэкIащ къэралым и Правительствэм Кавказ Ищхъэрэ федеральнэ щIыналъэм гъэм и сыт хуэдэ зэманми лажьэ «Iуащхьэмахуэ» турист-рекреацэ комплексым зегъэужьыным хуэгъэпса и лэжьакIуэ гупым и зэIущIэ.
Абы хэтащ Кавказ.РФ компанием, Iуэхур зэхьэлIа къэрал министерствэхэм я унафэщIхэмрэ я лIыкIуэхэмрэ.
ЗэIущIэм щытепсэлъыхьащ «Iуащхьэмахуэ» зыгъэпсэхупIэм адэкIи зегъэужьыным, абы и инфраструктурэр егъэфIэкIуэным пыщIа Iуэхухэм.
Дунейр нэхъ хуабэ къэхъуу бгыщхьэхэм уэсыр зэрытекIыу щIадзауэ пащэ ухуэныгъэ лэжьыгъэхэм.
Мы гъэм мыбдежым щаутIыпщыну я мурадщ ухуэныгъитI: EL6 кIапсэ гъуэгущIэм сыткIи къызэгъэпэщауэ щащI, зыплъыхьыпIэхэр зиIэ и ресторанымрэ ратракхэм я гъэувыпIэмрэ. Иджыри ухуэныгъипщIым щIигъум лэжьыгъэхэр зэрыщыщIадзэнум зыхуагъэхьэзыр.
Инфраструктурэ проект нэхъыщхьэхэм, къагъэщIэрэщIэжыну щIыпIэхэм ящыщщ метр 4100 лъагапIэм щыIэ «ПщыкIузым я хэщIапIэр». Абы лэжьыгъэхэр жыджэру щокIуэкI: IэщIагъэлIхэр яужь итщ унэм и лъабжьэм халъхьэну гъущI зэкIэрыгъэвахэр гъэхьэзырыным, абы къыдэкIуэу Iуахыж абы и лъабжьэу щытар, трансформатор IэнатIэр къагъэщIэрэщIэж.
Спортсменхэм зыщагъэхьэзырыну щIыпIэ Гарабаши мылылъэм къыщызэрагъэпэщыну я мурадщ – абдеж щагъэувынущ спортсменхэр сноубордхэм тету е тIысыпIэхэр зиIэ хьэлъэIэтым ису бгым дэзышей Iэмэпсымэхэр. Абыхэм я фIыгъэкIэ спортсменхэм илъэс хъурейм загъэсэнымкIэ Iэмал ягъуэтынущ.
Мыхьэнэшхуэ зиIэщ курортым и къуэкIыпIэ лъэныкъуэмкIэ иджыри къежэхыпIэ гъуэгуий щаухуэным УФ-м и Къэрал экспертизэ нэхъыщхьэр арэзы зэрытехъуар. Райдерхэр къежэхыпIэщIэхэм дашынущ ди къэралым щащIа, цIыхуипщI зэуэ зэрыхуэ иджырей «Аэрис» кабинэхэмкIэ. Абыхэм аэродинамикэ теплъэ яIэщ икIи, зихуэдэ щымыIэу, метр зэбгъузэнатIэ 14-ри абджкIэ къещIэкIащ.
ЗэIущIэм апхуэдэу утыку къыщрахьащ станцхэм я навигацэ, рекреацэ щIыпIэхэр къэгъэщIэрэщIэжыным хуэунэтIауэ «Ярус» архитектурнэ бюром къыхилъхьа проектыщIэри. Абы псом хуэмыдэу мыхьэнэшхуэ щиIэщ метр 2000-м щIигъу лъагапIэхэм.
А псом къадэкIуэу метр 3800-м щащI «Къалэ цIыкIу» альпинист комплексыр яутIыпщыну ягъэхьэзыр. Ар мы гъэмахуэм и кIэм хьэзыр ящIыну я мурадщ. Абы хэтынущ сыткIи къызыхуэтыншэу зэгъэпэща унэ цIыкIухэр, цIыхур щыпсэун папщIэ зыхуеину псори, пщэфIапIэ зэпэщхэри иIэу.
«Зи гугъу тщIа жэрдэмхэр гъэзэщIэным Къэбэрдей-Балъкъэрым и туризм IэнатIэм зегъэужьынымкIэ мыхьэнэшхуэ иIэщ. ЗыгъэпсэхупIэр къэгъэщIэрэщIэжыным абы къакIуэхэм я бжыгъэм къызэрыхигъэхъуэнум, ар езым хуэдэхэм япеуэфын зыгъэпсэхупIэ зэрищIынум ямызакъуэу, илъэс хъурейм хьэщIэхэр кърагъэблэгъэн папщIэ зыхуеину псомкIи къызэригъэпэщынущ», - къыхигъэщащ КIуэкIуэ Казбек.
Абы апхуэдэу жиIащ лэжьыгъэхэр зэраубзыхуам тету зэрырагъэкIуэкIынур.
Республикэм и Iэтащхьэм Назаров Сергей фIыщIэ хуищIащ щIыналъэм зегъэужьыныр къызэрыфIэIуэхум, Къэбэрдей-Балъкъэрым къехьэлIа къалэнхэр гъэзэщIэным зэпымыууэ гулъытэ къызэрыхуищIым папщIэ.
КъыкIэлъыкIуэ махуэм Назаров Сергейрэ «Кавказ.РФ»-м зыужьыныгъэмкIэ и институтым и генеральнэ унафэщI Юмшанов Андрейрэ ящIыгъуу республикэм и Iэтащхьэр щыIащ Шэрэдж щIыналъэм и зыгъэпсэхупIэхэм.
Къапщтэмэ, абыхэм щыгъуазэ защIащ «Туризмэмрэ хьэщIагъэмрэ» лъэпкъ проектыр я щIэгъэкъуэну ящIа «Идарей» хьэщIэщ комплексымрэ «Аушыджэр сити» хьэщIэщымрэ я лэжьыгъэм.
УхуэныгъитIри хуозэ Аушыджэр псы хущхъуэ къыщIэжыпIэхэм. ЗыгъэпсэхуакIуэхэм мыбдеж щагъуэт ахэр зыщIэупщIэм хуэдиз цIыху бжыгъэ зыщIэхуэн псэупIэ щхьэхуэхэри, унагъуэкIэри я закъуэуи здэщыIэнухэри, псы хуабэхэри, псынэпсхэри икIи щIыпIэхэр сабий джэгупIэкIи къызэгъэпэщащ.
Мы зэманым апхуэдэ зыгъэпсэхупIэхэм щIэупщIэшхуэ яIэщ икIи IэнатIэм зиужьынымкIэ ахэр шэсыпIэ хъарзынэ мэхъу: абыхэм IуэхутхьэбзэфIхэр къыщыхуащIэ, хьэщIэхэм гумыхужу зэманыр щагъакIуэ икIи, мыхьэнэшхуэ зиIэращи, республикэм и экономикэми хэлъхьэныгъэ хуохъу.
Къапщтэмэ, дызэрыт илъэсым и мазихым цIыхухэм зыщагъэпсэху IуэхущIапIэхэм я бжыгъэр 645-м нэсащ. Шэрэдж щIыналъэм апхуэдэхэм я бжыгъэр 47-рэ щохъу: Балъкъэр Ипщэм - 19, Гуэл щхъуантIэхэм - 10, Аушыджэр - 9, апхуэдэуи Бабугент, Жэмтхьэлэ, Къэщкъэтау, Уштулу щIыпIэхэми щыIэщ.
«Дэ ди къалэныр а лэжьыгъэм адэкIи пытщэнырщ. Урысейм и Президент Путин Владимир и унафэкIэ къагъэщIэрэщIэжа лъэпкъ проектхэм Iэмал къыдат IэщIагъэлIхэр дгъэхьэзырыну, хьэрычэт IэнатIэр дэтIыгъыну икIи Къэбэрдей-Балъкъэрым къакIуэхэм тыншыпIэ псори яIэу, шынагъуэншэу зегъэгъэпсэхуну, ди деж щагъэкIуа зэманым гуимыхуж ящыхъуну.
АдэкIи пытщэнущ къытхуеблагъэ дэтхэнэми игу фIыкIэ дыкъэкIыжыным хуэгъэза лэжьыгъэм, абыхэм иужькIи къытрагъэзэжын папщIэ зыхуэфащэ щытыкIэхэр къахузэдгъэпэщынущ», - жиIащ КIуэкIуэ Казбек.
