Псынэдахэр япэ итщ, Алътудыр абы къыкIэлъокIуэ

Урысей Федерацэм и Кавказ Ищхъэрэ, Ипщэ щIыналъэхэм я топджэгу командэ нэхъ лъэщхэр зыхэт зэхьэзэхуэ ещанэ дивизионым щокIуэкI. Мэлыжьыхьым (апрелым) и 4-м щIэзыдза а зэ­пеуэм бжьыпэр щаIыгъщ Псынэдахэ и «Родник»-мрэ Алътуд и «Искра»-мрэ.

Къэбэрдей-Балъкъэр, Дагъыстэн, Ингуш, Къал­мыкъ республикэхэм, Ставрополь, Краснодар крайхэм, Астрахань областым щыщ командэхэм япэ къекIуэкIыгъуэр нагъэблэгъащ. Арщ­хьэ­кIэ нэхъ хьэлэмэт дыдэр - «Родник»-мрэ «Искра»-мрэ я зэIущIэр - иджыри къапэщылъщ. Ар мыгувэу зэ­хэтынущ, етIуанэ къекIуэкIыгъуэм шыщхьэуIум (августым) и 8-м щIимыдзэ щIыкIэ. 
Ди республикэм и щIыхьыр екIуу яхъумэ зи гугъу тщIа командэхэм. Къэбэрдей-Балъкъэрым и чемпионатми Урысей Федерацэм и ещанэ дивизионми зэ­дыхэтщ «Родник»-мрэ «Искра»-мрэ. Абы щхьэкIэ къэ­мынэу абыхэм я къарур зэхьэзэхуитIми хурокъу. Къапщтэмэ, псынэдахэдэсхэр иджыри къэс зыми къапикIуэтакъым, зэ закъуэ зэрытемыгъэкIуауэ джэ­гум къыхэкIыжауэ аращ. ОчкоитIыр «Род­ник»-м фIэзыгъэкIуэдыфар «Ставрополь­Агро­Союз»-ращ. Ардыдэращ алътуддэсхэм къегуо­уари, Невинномыск щыкIуам къыхагъащIэу. Адрей псоми «Искра»-р щытекIуащ. 
Псынэдахэрэ Алътудрэ я командэхэм къищы­нэ­мыщIауэ, ещанэ дивизионым щекIуэкI зэхьэзэхуэм хэтщ Нарткъалэ и «Нартымрэ» Къэбэрдей-Балъкъэрым и щIалэгъуалэ гуп къыхэхамрэ, «Налшык» футбол школымкIэ гъэлъэщауэ. Абыхэми удэ­зы­хьэх джэгукIэ къагъэлъагъуэ, ауэ, ди жагъуэ зэрыхъунщи, турнир таблицэм щыпашэхэм зэкIэ ящыщкъым. 
ШыщхьэуIум и 8-м щIэзыдзэну зэхьэзэхуэм и етIуанэ къекIуэкIыгъуэм щызэдэджэгунущ «Нарт» (Нарткъалэ) - «Анжи» (Мэхъэчкъалэ), «Искра» (Алъ­туд) - «Витязь» (Михайловск), «Родник» (Псы­нэ­дахэ) - «КъБР-«Налшык» ФШ (Налшык), «Став­ро­­польАгроСоюз» (Невинномысск) - «Вайнах» (Нэз­рэн), «РСШОР-Уралан» (Элиста) - «Куэсто Каль­чо» (Сочэ) командэхэр. 
Къэбэрдей-Балъкъэрым и щIыхьыр лъагэу зыIэт гупхэр зыхэхуа Урысей Федерацэм и Кавказ Ищхъэрэ, Ипщэ щIыналъэхэм я топджэгу командэ ­нэхъ лъэщхэр зыхэт зэхьэзэхуэу ещанэ дивизионым щекIуэкIым теухуа тхыгъэхэр дяпэкIэ ди газетым щIэх-щIэхыурэ тетынущ.
Хьэтау  Ислъам.