Ветераным илъэсищэр хуагъэлъапIэ

Урысей ФСИН-м и управленэу Къэбэрдей-Балъкъэрым щыIэм хыхьэ колоние №5-м и лэжьакIуэхэр ехъуэхъуащ  Хэку зауэшхуэм и ветеран Дегтяренкэ Василий и ныбжьыр илъэси 100 зэрырикъумкIэ.  

Ставрополь къыщалъхуа Дегтяренкэ 1943 гъэм и бжьыхьэм хыхьащ  Дзэ Плъыжьым. Илъэс 17 ныбжьым иту  арат  Дегтяренкэ  Василий  ЕтIуанэ Бело­рус фронтым и связист  щыхъуам.  Ар  яхэтащ  Белоруссиемрэ  Поль­шэмрэ хуит къэзыщIыжахэм,    Берлин ебгъэрыкIуахэм.  Василий   къыхуа­гъэфэщахэм ящыщщ  Хэку зауэ орденым и етIуанэ нагъыщэр, Жуковым и медалыр, «Белоруссиер хуит къызэрищIыжам папщIэ»,    «Варшавэ хуит къызэрищIыжам папщIэ», «Берлин къызэрищтам папщIэ», «1941 - 1945 гъэхэм екIуэкIа Хэку зауэшхуэм Германием зэрыщытекIуам папщIэ» медалхэр.
1950 гъэм щыщIэдзауэ ветераныр лэжьащ Тэрч районым хыхьэ Урожайнэ къуажэм дэт пощтым  и унафэщIым и къуэдзэу, адэкIэ Май районым Iэпхъуэри,  абы пощт зэпыщIэныгъэмкIэ и IуэхущIапIэм  и IэщIагъэлI ­хъуащ.   
ЛIэщIыгъуэ къэзыгъэщIа нэхъыжьыфIым ехъуэхъуну кIуахэм      Василий Иван и къуэм  фIыщIэ хуащIащ  фашист Германием пэщIэту къигъэлъэ­гъуа   лIыгъэмрэ къэмылэнджагъэмрэ папщIэ. 
Езыр  хьэщIэхэм ядэгуэшащ зауэ илъэсхэм теухуа и  гукъэкIыжхэмкIэ.  
УФСИН-м и лэжьакIуэхэр ветераным ехъуэхъуащ узыншагъэ быдэ иIэу псэуну.  ПщIэшхуэ хуащIу  офицерхэм  абы IэщIалъхьащ удз гъэгъарэ тыгъэрэ.