КъБР-м и Парламентым и УнафэщIым и къуэдзэ Жанатаев Сэлим 2026 гъэм и гъатхэ лэжьэгъуэм и иужьрей зэIущIэр иригъэкIуэкIащ. Абы республикэм и мылъкум, псэупIэ-коммунальнэ IуэхущIапIэм, щэнхабзэм, ухуэныгъэм, лэжьыгъэ IэнатIэхэм епха хабзэхэм щыхэплъащ, зэхъуэкIыныгъэхэри халъхьащ.
КъБР-м и республикэ мылъкуу 2026 гъэм, къэблэгъэну 2027 - 2028 гъэхэм тещIыхьам, зэхъуэкIыныгъэхэр хэлъхьэным теухуа проектыр игъэбелджылащ КъБР-м финансхэмкIэ и министр Лисун Еленэ.
- ЗэхъуэкIыныгъэхэр ехьэлIащ республикэм и мылъкур зэпэлъытауэ гъэбелджылыным. 2026 гъэм къриубыдэу республикэм и хэхъуэр сом 1 мелардрэ мелуан 372,5-кIэ дгъэбэгъуэну ди гугъэщ. Абы щыщу сом мелуан 969, 8-р налог-мыналог мылъкум къыхэкIын хуейщ, республикэм и зымыгъэзэж хэхъуэуи сом мелуан 402,7-рэ хэлъынущ, - жиIащ министрым.
КъызэрыхигъэщамкIэ, республикэм и мылъкум къыхэхъуэн хуейщ IуэхущIапIэхэм я хэхъуэм техьэ налогыу сом мелуан 315,6-рэ, цIыху щхьэхуэхэм я хэхъуэм техьэу сом мелуан 76,1-рэ, зэхуэзыгъэдэж мылъкум техьэу сом мелуани 111,1-рэ, щIыуэпсым и хъугъуэфIыгъуэ къыщIэхыным техьэ сом мелуани 3,1-рэ. 2027 гъэм щIышылэм и 1-м ирихьэлIэу республикэм и къэрал щIыхуэр сом меларди 6,7- рэ хуэдизыну хуагъэфащэ.
- 2026 гъэм къриубыдэу Къэбэрдей-Балъкъэрым и хэхъуэр сом мелард 73,7-рэ хуэдизщ. Зыхуеинур сом мелард 77, 683-рэ мэхъу. ЩIыхуэу къытенэнур сом меларди 3,9-рэ хуэдизынущ. 2027 - 2028 гъэхэм тещIыхьа республикэ мылъкум теухуа проектми зэхъуэкIыныгъэ зыбжанэ къыщыгъэлъэгъуащ, - жиIащ Лисун Еленэ.
КъБР-м и Парламентым мылъкумкIэ, налогхэмрэ финансхэмкIэ и комитетым и унафэщI АфэщIагъуэ Михаил жиIащ бюджетым теухуа проектым Правительствэм къыбгъэдэкI зэхъуэкIыныгъитху зэрыхалъхьар. Проектыр зэIущIэм къыщащтащ.
Къат куэду зэтет унэхэу республикэм щыIэхэр зехьэным теухуауэ къэпсэлъащ КъБР-м и Парламентым ухуэныгъэмрэ псэупIэ-коммунальнэ хозяйствэмкIэ, гъэсыныпхъэ-энергетикэ комплексымкIэ и комитетым и унафэщI Къумал Заурбэч. Къат куэду зэтет унэхэм щыпсэухэм зэдай мылъкур зехьэнымкIэ фондым и мылъкум щыщкIэ лифтхэр зэрахъуэкIынущ е зыхуей хуагъэзэнущ.
Лэжьыгъэ IэнатIэ зимыIэхэм икIи зымыгъуэтхэм квотэкIэ ядэIэпыкъуным теухуауэ къэпсэлъащ КъБР-м и Парламентым ЛэжьыгъэмкIэ, социальнэ политикэмкIэ, узыншагъэмрэ ветеранхэм я IуэхухэмкIэ и комитетым и унафэщI Къэжэр Хъусен.
КъБР-м и законым и 36-нэ статьям, Щэнхабзэм теухуам, зэхъуэкIыныгъэхэр хэлъхьэным тепсэлъыхьащ КъБР-м и Парламентым щэнхабзэмкIэ, жылагъуэ Iуэхухэмрэ хъыбарегъащIэ политикэмкIэ и комитетым и унафэщI Текуев Амырбий.
Щэнхабзэм теухуауэ щыIэ федеральнэ законым и мардэм тету къащта проектым ипкъ иткIэ, КъБР-м и Правительствэм дяпэкIэ Iэмал иIэнущ республикэм бэджэнду щат IуэхущIапIэхэм я уасэр игъэбелджылыну. Тхылъ, газет, журналхэр зыщэхэм я Iуэхур нэхъ тыншу ягъэкIуэтэнущ, щэнхабзэ зэIущIэхэри нэхъыбэрэ къызэрагъэпэщынущ. Мы хабзэм къару егъуэт 2026 гъэм и бжьыхьэм щыщIэдзауэ.
Урысей Федерацэм и Федеральнэ Зэхуэсым и Къэрал Думэм я жэрдэмыр Iэрагъэхьэным тепсэлъыхьащ депутатхэр. Ар ехьэлIащ «Унэ хьэщIэщ хуэIухуэщIэм хуэкIуэным теухуауэ» федеральнэ хабзэм и 1, 9 Iыхьэхэм зэхъуэкIыныгъэ хэлъхьэным.
- КъБР-м щыIэщ «хьэщIэ егъэблэгъапIэ» къалэныр тыншу щыпхуэгъэзэщIэну унэ 300 хуэдиз. ИтIани, ди щIыналъэр зи гугъу тщIы гъэунэхуныгъэм хэткъым, - жиIащ КъБР-м и Парламентым Экономикэ политикэмкIэ, туризмэмрэ хьэрычэт IуэхухэмкIэ и комитетым и унафэщI Iэпщэ Заур. Абы къыхигъэщащ щIыналъэм туризмэм зэрызыщиужьри.
КъБР-м и Парламентыр 2026 гъэм и бжьыхьэ лэжьэгъуэм хиубыдэу зыхэплъэну Iуэхугъуэ нэхъыщхьэхэм тепсэлъыхьащ КъБР-м и Парламентым КIэлъыплъыныгъэмрэ регламентымкIэ и комитетым и унафэщI Кансаевэ Еленэ.
Жанатаев Салим депутатхэм фIыщIэ яхуищIащ купщIафIэу зэрылажьэм, жэрдэм щIэщыгъуэхэр къызэрыхалъхьэм, республикэр егъэфIэкIуэным теухуа Iуэхухэр зэрызэфIахым папщIэ.
Гъатхэ лэжьэгъуэр зэхуащIыжащ Урысей Федерацэмрэ Къэбэрдей-Балъкъэрымрэ я гимнхэмкIэ.
