Псалъэ щабэр гущабэщIщ

Тхыдэм уриплъэмэ,  Урысеймрэ Тыркумрэ я зэхущытыкIэм куэдрэ зихъуэжащ. Ар мамыр зэпыту екIуэкIакъым, Тырку-урыс зауэ зыбжани тхылъ напэкIуэцIхэм къыщыбгъуэтынущ. 

Адыгэ лъэпкъым къыхэкIа лIыхъужь зыбжанэ цIэрыIуэ щыхъуащ зи гугъу тщIы зэпэщIэтыныгъэхэм. Щапхъэм и хьэтыркIэ, ХьэтIохъущокъуэ Исмэхьил-бей япэу тхыдэ напэкIуэцIхэм къыщыхэхуэр апхуэдэхэм язщ. Ауэ ди лъэпкъым Тыркум зэи и щIыб хуигъэзакъым, а дзыхьыр къыщамыгъэпэжа къахуихуами. 

 Мэкъуауэгъуэм и 17-м Урысейм щрагъэблэгъащ Тыркум къэрал щIыб IуэхухэмкIэ и министр Фидан Хакан. «Ди зэхущытыкIэр куэд щIащ узэрыцIыхун къудейм зэрыфIэкIрэ, ахэр зэныбжьэгъугъэм хуэкIуауэ, махуэ къэс нэхъ куу мэхъу, - жиIащ УФ-м и Президент Путин Владимир, дипломатым щыхуэза зэIущIэм. Эрдоган Тайип фIэхъус гуапэ хурихыжыну икIи  ар Урысейм щалъагъуным я нэ къыхуикI зэпыту зэрыщытыр жриIэжыну елъэIуащ.   

 Мэзкуу зэIущIэр иуха нэужь, тырку министрыр Къэзан щыхуэзащ УФ-м  хамэ къэрал IуэхухэмкIэ  и министр Лавров Сергей. Тырку каналхэр егъэлеяуэ щыгуфIыкIащ Фидан Урысейм пщIэ къызэрыщыхуащIам. ХьэщIэр фIыуэ зэралъагъум и нэщэнэу, Лавровыр протоколым къытекIри, министрыр  щIыхьэпIэм деж щригъэблэгъащ, езым и пэшым щыпэмыплъэу. 

Фидан и хьэщIэгъуэм и Iыхьэ нэхъ гъэщIэгъуэнхэм язт ар МГИМО университет  цIэрыIуэм зэрашар. Зи гугъу тщIы еджапIэ нэхъыщхьэм и ректор, академик Торкунов Анатолий езым и IэкIэ тырку министрым щитIэгъащ «щIыхь зиIэ доктор» цIэ лъапIэр зезыхьэм и фащэр.  ХьэщIэр еджакIуэхэм щаригъэцIыхум, Торкуновыр тепсэлъыхьащ  Фидан бгъэдэлъ щIэныгъэмрэ зэрихьа IэнатIэхэмрэ. Тыркум и дзэм зэрыхэтам къыдэкIуэу, президентыщIэ хъуну зыхуагъэфащэ щIалэр егъэджакIуэуи лэжьащ, къэхутэныгъэ лэжьыгъи иригъэкIуэкIащ. «Ди дежкIэ мыхьэнэшхуэ иIэщ министрыр хамэ къэралхэм щIэныгъэ IуэхукIэ  епха академикыу зэрыщытыр», - жиIащ Торкуновым.  Ректорым къыхигъэщащ МГИМО-м и студент 220-м тыркубзэр зэраджри.           

 Езы министрыр студентхэм я пащхьэм инджылызыбзэкIэ къыщыпсэлъащ. ЦIэ лъапIэ къызэрыхуагъэфэщам папщIэ Торкуновым фIыщIэ хуищIа нэужь, Фидан жиIащ  МГИМО  цIэрыIуэм и доктору щытыныр пщIэшхуэу къызэрилъытэр. Дипломат 80  къыщIэзыгъэкIа университетым къэрал лэжьакIуэхэр егъэхьэзыр, абы щеджахэм яубзыху Урысеймрэ хамэ къэралхэмрэ я зэхуакум дэлъыну зэхущытыкIэр.

 Тырку министрым игу къигъэкIыжащ  МГИМО-р къэзыуха, 2016 гъэм Тыркум щаукIауэ щыта, Урысейм и полномочнэ лIыкIуэ Карлов Андрей. «Дипломат лэжьыгъэр зэкъуэтыныгъэм и дамыгъэу зэрыщытыр уигу къегъэкIыж абы къызэринэкIа щIэиным, и щапхъэр и ужь къиувэнухэм щхьэпэ яхуохъу», - жиIащ Фидан.

 Министрыр тепсэлъыхьащ Урысейр лъэныкъуэкIэ езыгъэкIуэтэкIыну хэт Европэм и унафэщIхэм ящIэр зэрымыхъунуми: «Тыркум и еплъыкIэр сыт щыгъуи IупщIщ: Европэм и шынагъуэншагъэр Урысейр хэмыту  зэтеувэнукъым. ЗэхущытыкIэ узыншэм и лъабжьэр пIалъэ кIыхькIэ быдэу щытын папщIэ, Урысейм хуэдэ къэрал лъэрызехьэм абы и увыпIэ щиIыгъыжыпхъэщ».  

ЧЭРИМ Марианнэ.