Ди республикэм иджыблагъэ щекIуэкIащ цIыхухэр лэжьапIэ гъэувынымкIэ урысейпсо жармыкIэм и федеральнэ Iыхьэр.
ХьэтIохъущокъуэм и жыг хадэм и ихьэпIэм деж къыщызэрагъэпэща Iуэху иныр лIыхъужьхэм ятегъэщIауэ щытащ. КъБР-м и Правительствэм, Лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ министерствэм, КъБР-м и кадр центрхэм зэгъусэу зэхаша Iуэхур лэжьапIэ зытхэмрэ IэнатIэ къэзылъыхъуэхэмрэ я зэпсэлъапIэ утыку ин хъуат.
ЖармыкIэм социальнэ унэтIыныгъэ иIащ, къызэгъэпэщакIуэхэм нэхъ зытрагъэщIар IуэхущIапIэхэр зыхуэныкъуэ IэщIагъэлI къахуэгъуэтынракъым, атIэ къэралым и дэIэпыкъуныгъэ хуэныкъуэ цIыхухэм лэжьапIэ яIэнырщ. Япэ ирагъэщар, дауи, хэкум и хъумакIуэхэмрэ абыхэм я унагъуэхэмрэщ. Зауэм и ветеранхэм, дзэ Iуэху хэхам хэтахэм, хэкIуэда лIыхъужьхэм я унагъуэхэм щыщхэм гулъытэ щхьэхуэ хуащIащ. Абыхэм папщIэ чэнджэщакIуэ гуп лэжьащ. Ветеранхэм я узыншагъэм и щытыкIэм елъытауэ лэжьыгъэ къыхуалъыхъуэм и мызакъуэу, лэжьапIэ щыувкIэ, къыкъуэкI лъэпощхьэпохэр къызэнэкIынымкIи щIэгъэкъуэн хъуащ жармыкIэм щылэжьа IэщIагъэлIхэр.
КъищынэмыщIауэ, дзэ Iуэху хэхам щыIа щIалэщIэхэр здэувынур хуагъэлъагъуэ къудей мыхъуу, зыщиужьын, IэнатIэкIэ щыдэкIуэтеин IуэхущIапIэхэр къыхухахырт, зэгъусэу зэпкърахырт, кърикIуэнкIэ хъуну ехъулIэныгъэхэр яубзыхурт. АбыкIэ сэбэп хъуащ жармыкIэм и утыку щхьэхуэхэмрэ зэпсэлъэныгъэ зэIухамрэ.
Программэр Iуэхугъуэ куэду зэхэтащ: республикэм и завод пажэхэм, агропромышленнэ холдингхэм, IT-компаниехэм «микрофон зэIуха» жыпхъэм иту ягъэлъэгъуащ я производствэм и лъэщагъхэр, лэжьыпхъэхэр, социальнэ пакетхэр, корпоратив бонусхэр; юристхэмрэ лэжьыгъэ хуитыныгъэмкIэ IэщIагъэлIхэмрэ мастер-класс зыбжанэ ирагъэкIуэкIащ, Iуэхум епха къэрал хабзэхэм я иужьрей зэхъуэкIыныгъэхэм яхутепсэлъыхьащ, контракт системэм и купщIэр, хуэгъэкIуатэ зиIэ цIыхухэм папщIэ къэрал дэIэпыкъуныгъэу щыIэхэр гурагъэIуащ.
Апхуэдэуи утыку щхьэхуэ щыIащ IэщIагъэхэм ухэзышэ Iуэхугъуэхэр щекIуэкIыу. Псалъэ къудей мыхъуу, абдеж зи щIалэгъуэхэми нэхъыжьхэми гъущI зэпызыгъавэм къыщыщIэдзауэ агрономым нэс Iуэхум пэрыту фIэкIа умыщIэу IэщIагъэхэр «зрагъэпщэну» Iэмал яIащ.
Махуэ псом утыкум щылэжьащ «Хэкум и хъумакIуэхэр» фондым и къудамэу КъБР-м щыIэм и социальнэ координаторхэр. Абыхэм цIыхухэм IэнатIэ къыхуалъыхъуам и закъуэкъым, атIэ къызэхуэсахэм гурагъэIуащ я щIэныгъэм щыхагъахъуэ курсхэм кIуэну, IэщIагъэ щрагъэгъуэт программэхэм хэтыну, бжыгъэр зи лъабжьэ IэнатIэхэм пщIэншэу хуеджэну Iэмал зэрыщыIэр.
Лэжьыгъэм кърикIуахэр къыщипщытэжым, «Хэкум и хъумакIуэхэр» фондым и къудамэу КъБР-м щыIэм и унафэщIым и япэ къуэдзэ Бетыгъуэн Заур къыхигъэщхьэхукIащ жармыкIэм кърихьэлIахэм тхылъымпIэ Iэтэ яIыгъыу зэбгрыкIыж мыхъуу, пщэдей щыщIэдзауэ ящIэнур яубзыхуауэ кIуэжыным мыхьэнэ зэриIэр. ЩIалэхэм псори гурагъаIуэурэ езыхэм нэхъ ягу ирихьа IэнатIэм и унафэщIым ирагъэцIыхуащ. «Гу лъыттащ жармыкIэм кърихьэлIахэм ящыщ куэдыр я пщэдейм щымышынэжу, нэхъ тегушхуауэ зэрызэбгрыкIыжам. ХэкIуэдахэм я унагъуэхэри гулъытэншэу къэдгъэнакъым, абыхэми лэжьапIэ яIэнущ. Дэтхэнэ лIыхъужьми и унагъуэм удэIэпыкъуныр абы и фэеплъыр хъумэнырщ къикIыр», - жиIащ Заур.
Налшык щекIуэкIа жармыкIэмрэ абы цIыхуу къыщызэхуэсамрэ наIуэ къищIащ мы Iуэхур зэрыщхьэпэр. КъызэгъэпэщакIуэхэм къызэрыхагъэщамкIэ, лэжьыгъэр абдеж щиухыркъым, апхуэдэ зэIущIэхэр щIэх-щIэхыурэ екIуэкIынущ.
