ТхакIуэхэм я щIэнIуатэ

Грознэ къалэм къыщызэ­Iуахащ Кавказ Ищхъэрэм, Урысей Ипщэм, Кърымым я лъэпкъ литературэхэм хухаха щIэн­Iуатэ. Ар къызэригъэпэщащ Урысейм и ТхакIуэхэм я зэгухьэныгъэм. ЩIыналъэ ­12-м я лIыкIуэхэр тепсэлъы­хьащ лъэпкъ литературэхэм, тхэн щIэзыдзагъащIэхэм ­хуащI гулъытэм, щIыналъэ­хэм я лъэпкъыбзэхэр литуратурэм зэрехъулIэм, щIэджы­кIа­кIуэ­хэр нэхъ зыдихьэххэм, нэ­гъуэщI Iуэхугъуэхэми. 

ЩIэнIуатэм и пэублэ зэIущIэр къызэIуихащ Урысейм и ТхакIуэхэм я зэгухьэныгъэм жэуап зыхь и секретарь Иванов Николай. Абы ягу къигъэкIыжащ 1976 гъэм екIуэкIауэ щыта литературэ зэIущIэшхуэм тха­кIуэ Исмаилов Абу щыжиIауэ щытахэр: «Тхыдэ пэжыр зэ­рызэфIагъэувэр зэныкъуэкъу къудейуэкъым, атIэ абы къару щиIэщ псалъэм».
Iуэхум хэтыну Шэшэн Республикэм щызэхуэсахэр япэ­щIыкIэ ирагъэблэгъащ Гу­дермес къалэм дэт ди къэ­ралым и Президент Путин ­Владимир и цIэр зезыхьэ уни­вер­ситетым. ТхакIуэхэм я зэгухьэныгъэхэу республикэхэм щыIэхэм я уна­фэщIхэм университетым и библиотекэм иратащ художественнэ тхылъ­хэр. Университетым къыщы­халъ­хьэу къызэдащта Iуэху­гъуэ­хэм ящыщщ бжьы­хьэм ирихьэлIэу «Слово Донбасса» усэ пшыхь абы къы­щызэгъэпэ­щыныр. 
Урысейм и лъэпкъхэм я зэ­къуэтыныгъэм и гъэм и щIыхь­кIэ Грознэ къалэм щекIуэкIа литературэ зэхыхьэшхуэм ди республикэм и лIыкIуэу хэтащ ­КъБР-м и ТхакIуэхэм я зэгухьэ­ныгъэм и унафэщI Бейтуганов Исмэхьил, абы и къуэдзэ Мэ­ремкъул Ларисэ, филологие щIэныгъэхэмкIэ доктор, тхакIуэ ХьэкIуащэ Мадинэ, тхакIуэ Къудей Фаридэ сымэ. ЩIэнIуатэр Iыхьэ-Iыхьэу гуэшауэ щытащ. Прозэм, усыгъэм, драматур­гием, художественнэ зэдзэ­кIым, литературэ критикэм я ­гугъу щащIащ абыхэм. 
КъБР-м и ТхакIуэхэм я зэгухьэныгъэм и унафэщIым къыхигъэщащ апхуэдэ щIэнIуа­тэхэм я мыхьэнэр зэрыиныр, псом хуэмыдэу лъэпкъыбзэхэр гулъытэ щыхуэныкъуэ ди зэманым, абы къыхэпхын щIэныгъи щапхъи зэрыщыбгъуэтынур. Бейтугановым фIыщIэ ­хуи­щIащ Урысейм и ТхакIуэхэм я зэгухьэныгъэм икIи абы ща­гъэбелджыла Iуэхур къэра­- лым ис лъэпкъхэр нэхъри зэ­къуэувэнымкIэ зэрысэбэпыр жиIащ. 
Грознэм къыщызэрагъэпэща щIэнIуатэм IуэхуфIхэр кърикIуэнущ. ЩIыналъэхэм щыте­псэлъыхьыжынущ абы къыщаIэта Iуэхугъуэхэм. Псалъэм папщIэ, мэкъуауэгъуэм и 25 - 26-хэм Къэзан щызэхыхьащ Поволжьем, Уралым, Ищхъэ­рэ-КъухьэпIэм, Алтайм я литературэм щытепсэлъыхьа зэIущIэ. 
Урысейм и ТхакIуэхэм я зэгухьэныгъэм и жэрдэмкIэ къыхалъхьа Iуэхум мыхьэнэшхуэ зэриIэнум и щыхьэтщ къэралым и щIыналъэхэм я тхакIуэ­хэм я IэдакъэщIэкIхэр зэрыт альманаххэр къыдагъэкIыну зэрамурадыр.