СВО-м хэтхэм зыщIагъакъуэ

Урысей ФСИН-м и Управленэу КъБР-м щыIэм и лэжьакIуэхэм дзэ Iуэху хэхам хэтхэр нэхъ зыхуэныкъуэхэр хурагъэшащ. 

Дзэ къулыкъур езыхьэкIхэм папщIэ гуманитар дэIэпыкъуныгъэр зэхуахьэсащ пенитенциар ведомствэм и лэжьакIуэхэм, КъБР-м и Парламентым и депутат Алтуев Аслъэн, Шэджэм район администрацэм, ЦIыхубэ фронтым я лIыкIуэхэм  ящIыгъуу. 
Иджы хуаутIыпщахэм ящыщщ бензин генераторхэр, зезыгъакIуэр имысу лъатэ аппаратхэр, радиостанцхэр, зэрызыщIахъумэ хъыхэмрэ я щхьэкIэ къагъэсэбэпыну хьэпшыпхэмрэ. 
Ахэр иратащ гвардейскэ мотострелковэ полкым хэтхэм. Ирагъэшахэм халъхьащ УФСИН-м и лэжьакIуэхэм я сабийхэм сэлэтхэм хуатха письмохэмрэ ящIа сурэтхэмрэ. НыбжьыщIэхэм ахэр ягъэхьэзырат ТекIуэныгъэм и махуэм ехьэлIауэ икIи Хэкум и хъумакIуэхэм Iэрагъэхьэну хуейуэ. 
ФСИН-м и республикэ управленэм и унафэщIым жиIащ я гупым сыт щыгъуи зэрызыщIигъакъуэр Къэбэрдей-Балъкъэрым щыщу дзэ Iуэху хэхам хэтхэм, лъэпкъхэр зэрызэкъуэтыр къагъэлъагъуэу. 
Урысейпсо цIыхубэ фронтым и щыналъэ къудамэм и унафэщI Косумовэ Изабеллэ жиIащ ахэр къыщащэхум СВО-м дзэ къулыкъур щезыхьэкIхэр нэхъ зыщIэупщIэхэм зэрытрагъэщIар. 
 КъБР-м и Парламентым ЕгъэджэныгъэмкIэ, щIэныгъэмкIэ, физкультурэмкIэ, спортымрэ щIалэгъуалэм я IуэхухэмкIэ и комитетым хэт Алтуев Аслъэн къыхигъэщащ урысеидзэм къулыкъу щызыщIэхэм генераторхэмрэ радиостанцхэмрэ сэбэп зэрахуэхъунур зыхуагъэувыжа мурадхэм ялъэIэсынымкIэ икIи сабийхэм я тхыгъэхэми хуабжьу зэрыщыгуфIыкIынур.