Кавказ зауэм хэкIуэдахэм я фэеплъу дзюдомкIэ республикэ зэхьэзэхуэ Кэнжэ къуажэм иджыблагъэ щызэхашащ. Абы щызэпеуащ ди щIыналъэм щыщ спортсмену 118-рэ, я ныбжькIэ илъэс 11-м щIимыгъуауэ.
Я хьэлъагъ елъытауэ зыхэта гупхэм япэ увыпIэхэр къыщахьащ Жамбэч Алихъан (кг 26-рэ), КIыщ Замир (кг 30), Щоджэн Эмирхъан (кг 34-рэ), ТIэш Дамир (38-рэ), Хьэгъэжей Казбек (42-рэ), Векуа Тимур (46-рэ), Уянаев Артур (кг 50), Гергоков Щамил (кг 55-рэ), Гъуэныбэ Рэхьим (кг 55-м щIигъухэм я деж).
Спортсменхэр зэхьэзэхуэм хуагъэхьэзыращ Соблыр Рустам, Дзухэ Беслъэнрэ Залымрэ, Джолабов Къайсын, Мырзэ Казбек, Бэгъуэт Мухьэмэд сымэ.
Медалхэр къахь
Урысей Федерацэм боксымкIэ пашэныгъэр къыщыхьыным хуэунэтIа зэхьэзэхуэ Мэзкуу областым иджыблагъэ щекIуэкIащ. Абы кърихьэлIащ ди къэралым и щIыналъэ куэдым я спортсмену, щIалэхэри хъыджэбзхэри зэхэту, 500-м щIигъу, я ныбжькIэ илъэс 13-14 хъухэу.
Зэхьэзэхуэм хэтащ Къэбэрдей-Балъкъэрым и боксерхэри икIи медалищ абы къыщахьащ. Килограмм 54-рэ зи хьэлъагъэхэм я деж ХьэпцIэ Дамир, килограмм 57-рэ хъухэм я деж Тхьэгъэлэдж Эрланэ сымэ етIуанэ увыпIэхэр къыщахьащ. Кожашев Эмир ещанэ щыхъуащ килограмм 66-рэ зи хьэлъагъхэм я деж.
Ди спортсменхэм я тренерхэр Куэшмэн Аслъэн, Елгъэр Елдар, Занилэ Мурат, Вэрокъуэ Беслъэн сымэщ.
Дагъыстэным щохьэщIэ
УФ-м щIыхь зиIэ и тренер Джафаров Эмилрэ УФ-м спортымкIэ щIыхь зиIэ и мастер Абдурашидов Шамсудинрэ я саугъэтхэр киокусинкаймкIэ къэхьыным хуэунэтIа зэхьэзэхуэ Дагъыстэным и къалащхьэ Мэхъэчкъалэ щекIуэкIащ. Абы щызэпеуащ ди къэралым и щIыналъэхэм ящыщу 5-м я спортсмену 250-м нэблагъэ.
Къэбэрдей-Балъкъэрым и лIыкIуэхэм хъарзынэу зэхьэзэхуэм зыкъыщагъэлъэгъуащ икIи я хьэлъагъ елъытауэ зыхэта гупхэм япэ щыхъуащ Бещто Айдар, Нестеренкэ Давид, Тхьэзэплъыж Дамирэ сымэ. Абы нэмыщI, ди адыгэ пщащэм къыхуагъэфэщащ «Техникэ нэхъыфI зиIэ» саугъэтыр, абы иригъэкIуэкIа зэIущIэхэм хухаха зэманхэр и кIэм нимыгъэсу псоми зэратекIуам щхьэкIэ.
КъищынэмыщIауэ, зэпеуэм къыщыхэжаныкIащ Чернов Альберт, Къардэн Беслъэн, Уханов Александр, Хужрат Iэдэм сымэ.
Зэхъуэхъу Мурат, Ахъмэт Артур, Биткаш Давид, Насыплы ТIэхьир сымэ абыхэм я тренерхэщ.
Кумыщ Ибрэхьим псоми ятокIуэ
Европэм грэпплингымкIэ пашэныгъэр къыщыхьыным хуэунэтIауэ Армением и къалащхьэ Ереван щекIуэкIа зэхьэзэхуэм япэ увыпIэр щиубыдащ Бахъсэн къалэм и спорт еджапIэм и гъэсэн Кумыщ Ибрэхьим.
Ди щIалэр зэпеуэм щыIащ УФ-м зи ныбжьыр илъэс 17-м щIимыгъуахэр зыхагъэхьа командэ къыхэхам хэту, зыкъыщигъэлъэгъуари килограмм 85-рэ зи хьэлъагъхэм я дежщ.
Ибрэхьим зэхьэзэхуэм хуигъэхьэзыращ Тхьэкъуахъуэ Мурадин.
Шабзауэхэр зэхуос
Къэбэрдей-Балъкъэрым шабзэкIэ нэщэнэ еуэнымкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ Налшык къалэм щекIуэкIащ. Апхуэдэуи, абы щызэхэтащ зи Iэпкълъэпкъым сэкъат иIэ спортсменхэмрэ тэмэму зымылъагъухэмрэ я зэпеуэ.
Зэхьэзэхуэхэм хэтащ ди къэралым и щIыналъэхэм ящыщу 11-м я лIыкIуэу 72-рэ. Медалхэм зэхуэдэу щIэбэнащ Паралимп джэгухэм, дунейпсо, европей чемпионатхэм къыщыхэжаныкIахэмрэ спортым япэ лъэбакъуэхэр хэзычэ ныбжьыщIэхэмрэ, СВО-м и ветеранхэр.
Удэзыхьэхыу икIи гъэщIэгъуэну екIуэкIа зэпеуэхэм Къэбэрдей-Балъкъэрым и командэм медаль зэхуэмыдэу 14 къихьащ, гупхэм я зэпеуэми щытекIуащ.
Дыщэ медалхэр республикэм къыхуахьащ Кулюшинэ Янэ, Стрельниковэ Аннэ, КIыщ Ахьмэд, Балъкъэр Дисанэ сымэ.
Спортсменхэм я тренерыр Кулюшинэ Натальещ.
Гуп зэпеуэм щыетIуанэщ
«Кубок Шиханэ» фIэщыгъэр зэрихьэу киокушинымкIэ урысейпсо зэхьэзэхуэ Краснодар къалэм щекIуэкIащ. Абы щызэпеуащ ди къэралым и щIыналъэхэм ящыщу 29-м я спортсмену 900-м щIигъу.
Къэбэрдей-Балъкъэрым и командэм ехъулIэныгъэфIхэр зэхьэзэхуэм щызыIэригъэхьащ икIи гупхэм я зэпеуэм етIуанэ увыпIэр къыщихьащ. КъищынэмыщIауэ, я хьэлъагъ елъытауэ зыхэта гупхэм щытекIуащ Таттаевэ Iэминэ, Биткаш Ашшур, Григорьев Булат, Аслъэн Аслъэн, Самохвалов Захар, Зыков Ростислав, Теппеев Уэсмэн, Мэлъкъуэнды Темырлан сымэ.
Пагуэ Исмэхьил, Герусов Назар, Пархоменкэ Ростислав, Конторин Роман, Аккизовэ Ясминэ сымэ етIуанэ хъуахэщ. Ещанэ увыпIэхэр ди командэм къыхуахьащ Болий Эмиль, Курманаевэ Хъадыжэ, Комбеец Аннэ, Жамбей Айдэмыр, Миллер Еленэ, Сунш Лидианэ, Занкишиев Ансар, Мэлъкъуэнды Залымхъан сымэ.
Ди спортсменхэм я тренерхэр Биткашхэ Емельянрэ Давидрэ, КIэш Даут, Карпенкэ Даниил, Жамбей Астемыр сымэщ.
