Километр 43-м щIигъу

Налшык къалэ и автомобиль гъуэгухэмрэ уэрамхэмрэ егъэфIэкIуэным, ахэр щыIэ мардэм хуэгъэкIуэным мыхьэнэшхуэ республикэм щрат. ЖыпIэнурамэ, 2026 гъэм Къэбэрдей-Балъкъэрым Транспортымрэ гъуэгу хозяйствэмкIэ и министерствэм и дэIэпыкъуныгъэмрэ щIыналъэм и гъуэгу фондым къыхэкIыну мылъкумрэ я фIыгъэкIэ япэм щымыIауэ лэжьыгъэшхуэхэр абыхэм щызэхаублэнущ.

Псалъэм къыдэкIуэу, дызэрыт илъэсым къызыхуэтыншэу зэрагъэпэщыжынущ Байсултановым, ПащIэм, Руставели, Къэрэшейм, Мэзлом, Абыдэм (Тепличнэр дэщIыгъуу), Гоголым, Тэрчокъуэм я цIэхэр зезыхьэ, Калининградскэ, Убых уэрамхэр. Псори зэхэту абыхэм километр 12-м нэблагъэ я кIыхьагъщ икIи социальнэ мыхьэнэ зиIэ ухуэныгъэхэр: сымаджэщхэр, сабий садхэр, школхэр, пощтхэр, н.къ. тетщи, жэщ-махуэм къриубыдэу машинэ куэд а щIыпIэхэм щызэблокI. АпщIондэху гъуэгухэр йокIакIуэ, ущызекIуэну шынагъуэ къызыбгъэдэкIхэр яхэтщ, уеблэмэ цIыхухэм я гъащIэм, узыншагъэм зэран хуэхъункIэ хъунухэри щыIэщ.

Абыхэм щрагъэкIуэкIыну лэжьыгъэхэм хиубыдэу гъуэгухэр нэхъ бгъуэ ящIынущ, псы жапIэхэр хуащIынущ, асфальтрэ бетонрэ зэхэщIауэ тIуащIэу тралъхьэжынущ, иджырей уэздыгъэхэр щыпадзэнущ, лъэс лъагъуэхэр, абыхэм къедза щIыпIэхэр зыхуей хуагъэзэнущ, гъуэгу дамыгъэхэр щагъэувынущ.

КъищынэмыщIауэ, илъэсищ пIалъэкIэ лэжьэну программэ 2026 гъэм ирагъэжьэнущ. Абыхэм къызэщIаубыдэнущ къалэм и хьэблэхэм я зэхуэкухэм дэлъ автомобиль гъуэгухэр икIи щыIэ мардэм илъэс къэс хуагъэкIуэнущ псори зэхэту километр 20-м нэхърэ мынэ мащIэ.

Псалъэм къыдэкIуэу, мы гъэм апхуэдэ Iуэхугъуэхэр щызэхаублэнущ Кэнжэ къуажэм Бэрэгъуным, Ворошиловым, КIэш зэкъуэшхэм, Ахъуэхъум, Блэныхьым, Андреевым я цIэхэр зезыхьэ, Колхознэ, Каховскэ и уэрамхэм. Абыхэм псоми зэхэту километр 31-рэ я кIыхьагъщ.

Хьэсэней къуажэм Киевскэ (Аттоевым и цIэр зезыхьэ уэрамым деж къыщыщIэдзауэ Летняя уэрамым нэсыху), Летнэ (Киевскэм щегъэжьауэ Брестскэм нэсыху), Брестскэ (Летнэм къыщыщIэдзауэ Титовым и цIэр зезыхьэм нэсыху), Тогузаевым и цIэр зезыхьэм (Летнэм къыщыщIэдзауэ унэ №38-м нэсыху) и уэрамхэр зыхуей хуагъэзэнущ. Абыхэми зэхэту километри 2,3-рэ я кIыхьагъщ.

Налшык и «Стрелка» хьэблэм Б. Черкасскэм, Герценым, Гикалэ, Крыловым, Лазо, Мэсейм, Тельман, Шевцовэм, Лихачевым я цIэхэр зезыхьэхэм, Шэджэм, Тырныаузскэ и уэрамхэм (километри 5,4-рэ);

«Горная» хьэблэм Бехтеревым, Къэрэшейм, Мечиевым, Орджоникидзе, Ушаневым, Чкаловым я цIэхэр зезыхьэ, Винницкэ и уэрамхэм (километри 4,1-рэ);

«Александровкэ» хьэблэм Тимирязевым, Къардэным, Беслъэнейм, Туполевым, Цеткин, Отаровым, Чайкинэм, Космодемьянскэм, Тархановым я цIэхэр зезыхьэ, Российскэ, Ленинградскэ, Молодежнэ, Краснопартизанскэ и уэрамхэми (километри 10,5-рэ) апхуэдэ лэжьыгъэхэр щрагъэкIуэкIынущ.

Ахэр псори хуэунэтIащ цIыхухэм я псэукIэр егъэфIэкIуэнымрэ шынагъуэншагъэр къызэгъэпэщынымрэ, щыжаIащ Налшык къалэ администрацэм.

 ХЬЭЩЫКЪУЕЙ Олег.