Спорт хъыбархэр

Ереван щохьэщIэ

НыбжьыщIэхэм дзюдомкIэ я дунейпсо зэхьэзэхуэ Армением и къалащхьэ Ереван иджыблагъэ щекIуэкIащ. Хэгъэрейхэм нэмыщI, абы щызэпеуащ Къэзахъстаным, Грузием, Урысей Федерацэм я бэнакIуэу 750-м щIигъу, я ныбжькIэ илъэс 11-17 хъухэу.

УФ-м и командэм хэту зэхьэзэхуэм щыIащ Къэбэрдей-Балъкъэрым и гъэсэнхэр икIи медаль зэхуэмыдэу 11 абы къыщахьащ. Я хьэлъагъ елъытауэ щыбэна гупхэм щытекIуащ Мулай Алий, Ксанаев Муслим, Бегиев Джалил сымэ.

Балэ Темырлан, Бечелов Алихъан, Бжьахъуэ Искандер, Къардэн Амир сымэ етIуанэ увыпIэхэр къахьащ. Гъуэтыж Инал, Бычэ Къантемыр, Шыбзыхъуэ Басир, ПщыхьэщIэ Аслъэн сымэ ещанэ хъуахэщ.

Ди командэр зэхьэзэхуэм хуагъэхьэзыращ Таухэ Сэфарбийрэ Азэмэтрэ.

БоксымкIэ нэхъ лъэщхэр

Урысей Федерацэм и еджакIуэхэм я 13-нэ гъэмахуэ Спартакиадэм и 2-нэ Iыхьэм хыхьэу боксымкIэ КИФЩI-м и щIыналъэхэм я зэхьэзэхуэ иджыблагъэ щекIуэкIащ Ставрополь щIыналъэм и Суворовскэ къмуажэм. Абы щызэпеуащ илъэс 15-16 зи ныбжь щIалэхэмрэ хъыджэбзхэмрэ.

Къэбэрдей-Балъкъэрым и командэм щыщу я хьэлъагъ елъытауэ зыхэта гупхэм япэ увыпIэхэр къыщахьащ Конаков Амир, Дыкъынэ Ибрэхьим, Хъыбэзэр Кемран, Хьэрис Азнаур сымэ.

ПщыукI Дамиррэ Аршиев Аслъэнрэ зэхьэзэхуэм етIуанэ щыхъуахэщ. МахуэлI Зауррэ Хьэжумар Рустамрэ ещанэ увыпIэхэр къахьащ.

Ди щIалэхэм ядэлажьэр Куэшмэн Аслъэн, Жанатай Руслан, ХьэпащIэ Ахьмэд, Къудей Албэч, ФочыщIэ Албиян, Жантегуэл Виталик, Рэмэзан Аскэр, Елгъэр Елдар сымэщ.

Балбошин Николай и фэеплъу

Мэзкуу областым и Ногинск къалэм щекIуэкIащ алыдж-урым бэнэкIэмкIэ урысейпсо зэхьэзэхуэ. Ар и фэеплъу щытащ Монреаль къалэм щекIуэкIа Олимп джэгухэм я чемпион Балбошин Николай. Зэхьэзэхуэм хэтащ ди къэралым и щIыналъэ куэдым я спортсмену 200-м нэблагъэ.

Къэбэрдей-Балъкъэрым и щIыхьыр иIэту зэпеуэм щыIащ КIыщ Аслъэнбэч икIи килограмм 77-рэ зи хьэлъагъхэм я деж домбеякъ медаль къыщихьащ.

ЩIалэм и тренерхэр КIыщ Муратрэ Къардэн Анзоррэщ.

Клубхэр зэпоуэ

«Клубхэм я зэпеуэ» фIэщыгъэр зэрихьэу гимнастикэмкIэ зэхьэзэхуэ щекIуэкIащ Дагъыстэным и къалащхьэ Мэхъэчкъалэ. Абы щызэпеуащ ди къэралым и щIыналъэхэм я спортсмену 200-м нэблагъэ, ди республикэм икIа цIыхуихыр яхэту.

ГъэщIэгъуэну икIи удэзыхьэхыу екIуэкIа зэпеуэхэм Къэбэрдей-Балъкъэрым и командэм медаль зэхуэмыдэу 13 къыщихьащ, абыхэм ящыщу 7-р дыщэу.

Япэ увыпIэхэр яубыдащ Мэкъуауэ Иланэ (дыщэ медалу 3 къихьащ), Бэч Меллисэ, Къул Мелихъанэ, Бэч Арианэ сымэ.

Апхуэдэуи, зэхьэзэхуэм къыщыхэжаныкIащ Иванов Максимрэ Филатов Георгийрэ.

Ди спортсменхэр зэпеуэм хуагъэхьэзыращ Продуновэ-Исметовэ Еленэрэ Третьяковэ Эллэрэ.