Унагъуэм къыщожьэ

     Лъэпкъым срицIыхущ жыпIэныр мащIэщ, абы ухуэфащэу ущытын хуейщ. Дунейм тет лъэпкъ куэдым уахэмышыпсыхьыжын папщIэ, уи анэм къыпIурилъхьа бзэр пщIэуэ щытын хуейщ. Нобэрей гъащIэм ар Iуэхугъуэ гугъу щыхъуащ. Мытыншми, пщIэ зыпылъщ, уи бзэр пIурылъу, уи хабзэр пIыгъыжу упсэуныр. А Iуэхугъуэхэр хъума хъуным и къежьапIэр цIыхур  къыщалъхуа унагъуэрщ. Абы и жьэгум нэхъыжь дэсыныр фIыгъуэ мылъытэщ.

 Ди нанэ сыщепсалъэкIэ, сэ куэдрэ сигу къокI: «Дыщэ зиIэ нэхърэ, нэхъыжь зиIэ»  адыгэ псалъэжьыр.  ЖыIэгъуейщ сэ нанэ лъэпкъым и тхыдэу, и фIыгъуэу, и дахэу щыгъуазэ сызыхуищIым и фIагъымрэ и куэдагъымрэ. Сэ гурэ псэкIэ зыхызощIэ нанэ хэлъ адыгэпсэ щабэр. Абы удимыхьэхыныр, узыIэпимышэныр Iэмалыншэщ.  Абы и хъыбархэм, псалъэмакъ гъэщIэгъуэнхэм укъызыхэкIа лъэпкъыр фIыуэ зэрыуагъэлъагъум къищынэмыщIауэ,  абы и псэу щыт бзэм и мыхьэнэри куууэ зыхыуагъащIэ.

Бзэр нобэ куэдым IэщIыб ящIыным и щхьэусыгъуэ ин дыдэу къызолъытэ интернетыр. Абы и напэкIуэцI зэхуэмыдэ куэдым щIалэгъуалэм я гупсысэкIэри, я дуней еплъыкIэри зэрыхуейм хуэдэу яунэтIыф. Абы хэлъхьэж интернетым хуиту уисын папщIэ, урысыбзэм ухуэIэрыхуэу зэрыщытын хуейр. Дауэ хъуми, сабийр дунейм къызэрытехьэу урысыбзэм нэхъ пэгъунэгъу мэхъу. Языныкъуэ адэ-анэхэм нэхъ къащтэ хъуащ я щIэблэр урысыбзэкIэ псэлъэныр. Урысыбзэр ящIэмэ, адыгэбзэр яIурымылъми ягъэ мыкIыну къалъытэ. Ди адыгэ сабийхэм я деж нэхъыбэу щызэхэпхыр урысыбзэрщ. 

Сэ сызэреплъымкIэ, нобэрей махуэм псоми зыхащIэу щытын хуейщ къытщхьэщыхьауэ тщхьэщыт шынагъуэр - бзэр тфIэкIуэдынкIэ зэрыхъунур. Ди бзэр дэ дымыщIэжмэ, фIыуэ дымылъагъужмэ, ар нэгъуэщIми къыфIэIуэхунукъым.

 Бзэр лъэпкъым и хъумакIуэщ, апхуэдэуи ар езым хуэдэ адрейхэм къащхьэщызыгъэкI Iэмэпсымэщ. Лъэпкъым и блэкIар зыхъумэр, ди деж ахэр къэзыгъэсыр  бзэращ. Абы и фIыгъэкIэ дэ дыщыгъуазэщ пасэрей цIыхум и дуней еплъыкIэм, тхыдэм къыщыхъуа Iуэхугъуэ инхэм. Апхуэдэ къалэнышхуэ зыгъэзащIэ анэдэлъхубзэр зыфIэмыIэфIрэ зыфIэмыдахэу мы дунейм зы лъэпкъи тетын хуейкъым.

Бзэм и гъащIэр зи IэмыщIэ илъыр зэзыгъэпэща лъэпкъырщ, ар абы фIыуэ илъагъумэ, тэмэму игъэлажьэмэ, щхьэ лъапIэгъуэ ихуэнущ. Лъэпкъым ущыщу зыкъыщыплъытэжкIэ, абы и нагъыщэ нэхъыщхьэу щыт бзэри пщIэну   уи къалэнщ. Бзэр хъумэныр цIыху щхьэхуэм е IэнатIэ гуэрым и къалэнкъым, апхуэдэ щIыкIэкIи абы и гъащIэм къыпхупыщэнукъым. Бзэм псэуэ Iутыр ар зыIурылъ цIыхухэращи, ар къызэрагъэсэбэпым елъытащ абы и гъуэгум и кIыхьагъ хъунури.  ИщхьэкIэ къызэрыщыхэдгъэщащи, бзэр къыщежьэр унагъуэрщи, ди адыгэ жьэгухэм абы хуэфащэ гулъытэ щыхуэдвгъэщI!

Жыгун Эдуард.