Сабийхэр зимычэзум щахъумэ

  Австралиер сабийхэр интернетым имыгъэхьэнымкIэ хабзэ нэхъ ткIий щызекIуэ къэралхэм хохьэ. 2024 гъэм дуней псом япэ дыдэ мы къэралым унафэ къыщыдагъэкIащ илъэс 16 иримыкъуахэр хъыбарегъэщIапIэхэм ихьэну хуимыту. НыбжьыщIэхэр зэрыхьэ мыхъунухэм «Тик-ток»-мрэ «Ютуб»-мрэ яхэтщ. Ауэ, псалъэм папщIэ, «Стим» жыхуаIэ джэгупIэ тыкуэныр сыт хуэдэ ныбжьми къагъэщхьэпэну хуитщ. 

  Сабийхэр интернетым щыхъумэн хуейуэ зыгъэув хабзэубзыху IэнатIэхэмрэ тепщэгъуэмрэ тегъэщIапIэу ящIыр зыщ: апхуэдэ щIыкIэу цIыкIухэм зэран къахуэхъуну хэщIапIэхэм зэман нэхъ мащIэ щрахьэкIмэ, узыхуэмейуэ къапэщIэхуэнури нэхъ мащIэщ. 

  Зи ныбжь нэмысахэр интернетым щыхъумэнымкIэ жэуап зыхьыр адэ-анэхэракъым, атIэ езы хэщIапIэхэр зи IэмыщIэ илъхэрщ. Тезырыр доллар мелуан 35-м фIокI. 2025 гъэм къару зыгъуэта хабзэм ипкъ иткIэ, зы мазэ закъуэм къриубыдэу, цIыху мелуани 4,7-рэ интернет хэщIапIэхэм пэIэщIэ щащIащ Австралием. Ауэ щыхъукIэ, илъэси 8 -15 ныбжьым иту къэралым щыпсэур мелуани 2,15-рэщ. 

  Франджым ныбжьыщIэхэм папщIэ къыдигъэкIа интернет хабзэмкIэ, ахэр адэ-анэхэм ямыщIэу хъыбарегъэщIапIэхэм исыну хуиткъым. Иджыпсту франджы парламентым хабзэ щагъэхьэзыр, Австралием ещхьу, илъэс 15 иримыкъуахэм интернет аккаунт зэрагъэпэщыну хуимыту. Ауэ франджы хабзэубзыхухэм я тегъэщIапIэр нэгъуэщIщ. Интернетым сабийхэр щагъэкIуэдым и мызакъуэу, щыдакъузэ, щагъэпуд. Абы имыхьэфмэ, цIыкIухэр нэхъыфIу еджэнущ, уеблэмэ я Iэр зыхуамышииж тхылъхэм еджэн щIадзэжынущ, е, нэгъуэщI мыхъуми, жэщым жеинухэщ. 

  Латин Америкэм къэрал нэхъ ину итхэм яз Бразилием интернетым ихьэ мыхъуну сабийхэм я ныбжьыр I6-м деж къыщегъэувыIэ. Китайм апхуэдэ хабзэ зэкIэ щызекIуэркъым, ауэ сабийхэм интернетым щащIэ псоми хабзэхъумэхэр егъэлеяуэ ткIийуэ кIэлъоплъ, шэч къызытрахьэ хэщIапIэхэр зэхуащIыж. США-ми апхуэдэ хабзэ щызекIуэркъым, ауэ штат щхьэхуэхэм адрейхэм ятемыхуэу унафэ къыдагъэкIыну хуитщ. Зи гугъу тщIы хабзэм хуэдэ Японием 2027 гъэм ирихьэлIэу къищтэну и мурадщ. НыбжьыщIэхэр интернетым щыхъумэным хуэгъэза хабзэ псоми я щхьэусыгъуэр зыщ: зи ныбжь нэмысахэм уакIэлъымыплъмэ, ар щхьэрыуапIэ яхуэхъункIи зэрышынагъуэрщ. 

  Интернетым нэхъ ткIийуэ хущыт къэралхэм язщ Норвегиери. Мыбы илъэс I3 иримыкъуа сабийхэм хъыбарегъэщIапIэхэр къыщагъэщхьэпэну хуиткъым. Илъэсыр имыух щIыкIэ, сабийхэр интернетым изымыгъэхьэххэ хабзэ къыщыдагъэкIыну я мурадщ Норвегием. 

  «Сабийхэм сабиигъуэ еттыжын папщIэщ апхуэдэу щIэтщIыр. Ныбжьэгъугъэмрэ зэхущытыкIэ дахэм зыщиужь гъащIэмрэ сабийхэм яIэрыгъэхьэжауэ, ахэр бжыгъэр зи тегъэщIапIэ дунейм къегъэлын хуейщ», - жызыIэ Норвегием и премьер-министр Гар Стёре Йонас мызахуэу пхужыIэнукъым