ЛIэщIыгъуэкIэ лIакъуэхэм зэIэпах

КъБР-м и Iэтащхьэ КIуэкIуэ Казбек ТекIуэныгъэм и махуэм и щIыхькIэ цIыхухэм зэрехъуэхъур

Къэбэрдей-Балъкъэрым щып­сэу­хэу пщIэ зыхуэсщIхэ!
Ветеран лъапIэхэ!
Си гум къыбгъэдэкIыу сыныво­хъуэхъу ТекIуэныгъэм и МахуэмкIэ!
Илъэс 81-рэ дэкIащ Хэку зауэшхуэр зэриухрэ. Ауэ ТекIуэныгъэм и Махуэм и псэкупсэ-щэнгъасэ лъапIагъым ­хэхъуэ зэпытщ, ар, шэч хэмылъу, лIэ­щIыгъуэ мыхьэнэ зиIэ Iуэхущ икIи дэ абы дызэрыхущытым дяпэкIи зи­хъуэжынукъым. 
А махуэм папщIэ ди адэхэм, адэ­ш­хуэхэмрэ абыхэм я адэжхэмрэ лIы­хъужьу, зыщымысхьыжу зэуащ, къэ­ралым и щIыналъэр дэнэ лъэны­къуэкIи щахъумэу. ЗэпэщIэтыныгъэ гуащIэхэм хэтащ я псэр пытыху, Берлин нэсащ, бий бзаджэр зэтракъу­тэри, дуней псом мамырыгъэр къы­хуахьащ.
Дэ сыт щыгъуи дигу илъынущ нэ­мыцэ-фашистыдзэм и удын нэхъ ­гуащIэ дыдэхэр, зэхэкъутэныгъэш­хуэхэр къэзыхьахэр, Совет Союзым къызэрытехуар, апхуэдэу щытми, Гитлеррэ и IупэфIэгъухэмрэ псоми епэ­гэкIыу ирагъэжьа лъыгъажэ­ш­хуэмкIэ яIа мурадхэр къызэтракъутащ.
Дэ ди къалэнщ ЕтIуанэ дунейпсо зауэм и тхыдэм и пэжыпIэр зэред­мыгъэхъуэкIыныр, тхыдэр нэмыукIы­тагъэ хэлъу къизытхыкIыжыну хуейхэм зыкIи яхудэдмычыхыныр, нацизмэм и телъхьэу къэувхэмрэ текIуэ­ны­гъэр къэзыхьахэм пцIы ятезылъ­хьэну хущIэкъухэмрэ тегушхуауэ дапэ­щIэ­тыныр.
Хэку зауэшхуэр дэтхэнэ зы уна­гъуэми, лъэпкъми ялъэIэсащ. Къэ­бэрдей-Балъкъэрым и къуэрэ ип­хъуу зауэм дэкIахэм я Iыхьэ ща­ни­тIым щIигъур лIыхъужьу хэкIуэдащ абы. Республикэм ТекIуэныгъэм хэлъ­хьэныгъэшхуэ щыхуищIар ­фронтым и закъуэкъым, атIэ абы и щIыбми лэжьыгъэшхуэ щызэфIигъэкIащ, Дзэ Плъыжьым и зауэлIхэр IэщэкIэ, техникэрэ ерыскъыпхъэкIэ къызэригъэпэщу, санаторэхэм къы­щызэIуа­ха госпиталхэм уIэгъэ хъуа зауэлIхэм я узыншагъэр щызэфIагъэувэжу.
Хэку зауэшхуэм лIыхъужьу хэтахэм пщIэ къызэрымыкIуэ яхудощI. Те­кIуэныгъэм зи псэр щIэзыта дэтхэнэми ди щхьэр яхудогъэщхъ. Дунейм ехыжа ветеранхэмрэ щIыпIэхэм щы­лэжьахэмрэ я фэеплъыр догъэлъапIэ.
ЛIэщIыгъуэкIэрэ лIакъуэхэм зэIэпах хабзэ дахэхэр хъума щохъу ди деж! Хэкум къулыкъу хуэщIэным, абы и щхьэхуитыныгъэмрэ зыми и унафэ щIэмытынымрэ япыщIа къалэнхэр гъэзэщIэным ноби пащэ дзэ Iуэху ­ щыIэхэм. ЛIыхъужьыгъэ къагъэлъагъуэу, къэмылэнджэжу, къы­зэ­фIэ­мы­щIэу абыхэм яхэтщ Къэбэрдей-Балъкъэрым и къуэ пэжхэр. Дэ дрогушхуэ абыхэм икIи ди щхьэхэр яхудогъэщхъ захуагъэм къыщхьэ­щыжу къэралым папщIэ зи псэр зыта ди ­зауэлIхэм.
Ди зэкъуэтыныгъэр ди тегъэщIапIэу, зауэ IэнатIэм, лэжьыгъэм пыщIа хабзэхэр тхъумэкIэрэ, дэ хуэфэщэн жэуап идот къытпагъэув лъэпощхьэпохэм, ди Президентым Урысейм и зыузэщIыныгъэм, абы и лъэщагъым хэгъэхъуэным хуэгъэ­зауэ къигъэува къалэнхэр догъэзащIэ.
МахуэшхуэмкIэ сынывохъуэхъу! Узыншагъэ быдэ, фIыгъуэ, зэIузэ­пэ­щыгъэ фиIэну.
ТекIуэныгъэм и МахуэмкIэ!