УФ-м и Правительствэм и УнафэщIым и къуэдзэ, ЩIыналъэхэм зегъэужьынымкIэ комиссэм и унафэщI Хуснуллин Марат иригъэкIуэкIа президиумым и зэIущIэм видеозэпыщIэныгъэ IэмалкIэ хэтащ КъБР-м и Iэтащхьэ КIуэкIуэ Казбек.
«ГъащIэм хуэщIа инфраструктурэ» лъэпкъ проектым, «Ухуэныгъэ» къэрал программэм, къэрал проектхэу «Iуэху тегъэгушхуэкIэ», «Псы къабзэ» жыхуиIэхэм, жылагъуэ-коммунальнэ хозяйствэм и щытыкIэмрэ къинэмыщI Iуэхугъуэхэмрэ тепсэлъыхьащ къызэхуэсахэр.
ЩIыпIэ муниципалитетхэм я нэIэ щIэту, Къэбэрдей-Балъкъэрым цIыхубэм къигъэщхьэпэ инфраструктурэр къыщагъэщIэрэщIэж зэпытщ, пIалъэ зыхуагъэувыжахэм елъытауэ. «Унагъуэм зыщIэгъэкъуэн» къэрал проектым ипкъ иткIэ, Налшык дэт псэупIэхэм япэгъунэгъуу мы гъэм сабий IыгъыпIи 4 щаухуэн щIадзэнущ. Ардыдэхэр иджыпсту щаухуэ Гундэлэн, Старэ Шэрэдж, Бахъсэн.
Узыншагъэм кIэлъыплъынымкIэ IуэхущIапIэ пэрытхэм язщ цIыху 250-рэ зыщIэхуэ, Лышхым щеIэзэу Налшык дэт диспансерыр. Безенги, Зэрэгъыж къуажэхэм спортзалхэр щаухуэ, Налшык Лъэпкъ центрым и уардэунэ дащIыхь. Егъэджэныгъэм епха ухуэныгъэ 54-рэ зэIузэпэщ ящIынухэм хагъэхьащ.
Гъуэгу ухуэныгъэхэм епха лъэпкъ проектым сом меларди 2,8-рэ трагъэкIуэдэнущ, абы щыщу сом мелард 1,5-р къэрал мылъкум къыхокI. Километр 72,8-м нэс гъуэгущIэ яукъуэдиину я мурадщ.
«Коммунальнэ инфраструктурэр къэгъэщIэрэщIэжын» къэрал проектым ипкъ иткIэ, унэхэм псы езышалIэ-къыщIэзыш объект 12-м щекIуэкI лэжьыгъэхэр и кIэм нагъэсынущ.
ЗэIущIэм щытепсэлъыхьащ бюджетым и лэжьэкIэми. УФ-м финансхэмкIэ и министр Силуанов Антон къыхигъэщащ щIыналъэхэм я бюджетхэр нэхъ щхьэпэ, яхуэчэмымрэ щIыхуэ ятелъымрэ зэрыхъукIэ нэхъ мащIэ ящIын зэрыхуейр.
«Мэкъуауэгъуэм и 1-м ипэ къихуэу, щIыналъэхэмрэ муниципалитетхэмрэ я бюджетыр нэхъыфIу зыгъэлэжьэну программэщIэ къащтэн хуейщ. ФинансхэмкIэ министерствэм езым и жэрдэмхэр щIыналъэ унафэщIхэм яхуигъэхьащ. Къыхэзгъэщыну сыхуейщ щIыналъэхэм мылъку нэхъ зытрагъэкIуэдапхъэр цIыхубэм я дежкIэ мыхьэнэ нэхъ зиIэ лъэныкъуэхэрауэ нобэми зэрыщытыр. Президентым унафэ къищтащ 2026 - 2030 гъэхэм къриубыдэу, кредит щIыхуэхэм я щанэр япшыныжыпхъэу, ар сом меларди 100-м нос. Хабзэм и проектыр Правительствэм ягъэхьакIэщ. Ар къащтэмэ, щIыналъэхэм я бюджетхэм нэхъ зыщIагъэкъуэфынущ, щIыхуэу къащтэн хуей хъухэми хэщIынущ», - жиIащ Силуанов Антон.
КIуэкIуэ Казбек зэрыжиIам тету, республикэм и бюджетым мазиплIым къриубыдэу къыхэхъуар сом мелард 23,8-м нос, илъэс блэкIам и хэхъуэкIэм елъытауэ ар проценти 107,7-рэ мэхъу. Езы щIыналъэм и хэхъуэхэр 2025 гъэм иIахэм нэхърэ мелардкIэ нэхъыбэщ, нобэкIэ ар мэхъу сом меларди 8,6-рэ. Къэралым и щIыхуэу телъми хэщIащ. «А псом я фIыгъэкIэ, ди пщэ дэтлъхьэжа цIыхубэ къалэнхэр зэфIэдгъэкIыну Iэмал догъуэт: зи улахуэр бюджетым къыхэкIхэм я лэжьапщIэм хэдгъэхъуэну, сымаджэхэм хущхъуэ лъапIэхэр къахуэтщэхуну, сабий зеиншэхэр унэ зыт программэхэм етпхыну, псынщIэу зэфIэгъэкIыпхъэ лэжьыгъэхэм икIэщIыпIэкIэ яужь дихьэну», - жиIащ КъБР-м и Iэтащхьэм.
