ЩIыпIэ зэпэщхэр

8 мая, 2026 - 13:00
«Къалэдэсхэм я псэукIэр егъэфIэкIуэн» къэрал программэм и фIыгъэкIэ Шэджэм щIыналъэм и Лашынкъей, Звездный жылэхэм цIыхухэм зыщагъэпсэхун, щызэхуэсын, спортым зыщыхуагъэсэн щIыпIэ зэпэщхэр яIэ хъунущ мыгувэу.
Лашынкъей къуажэм Нэгумэм и цIэр зезыхьэ уэрамым пэгъунэгъуу щыIэ псы IущIам и Iуфэм теплъэ дахэ ирату, жыг хадэ цIыкIу щагъэтIысынущ, лъэс лъагъуэхэр щаукъуэдиинущ, иджырей уэздыгъэхэмкIэ къызэщIагъэнэхуэнущ, къуажэдэсхэм зыщагъэпсэхун щIыпIэ хуащIынущ.
Звездный жылэм тренажерхэр иIэу спорт утыку щаухуэнущ, сабийхэм я джэгупIэ щыхуащIынущ, топджэгу губгъуи хэту. Шэджэм къалэ администрацэм и пресс-IуэхущIапIэм зэрыщыжаIэмкIэ, спортым дихьэххэм, къуажэдэсхэм, щIэми жьыми, ар кIуапIэ яхуэхъуну къалъытэ. 
Лэжьыгъэхэм пэрыхьэнущ дунейм зэрызиIэтыжу.
 
Зыхуей хуагъазэ
Къэбэрдей-Балъкъэрым щIыналъэ мыхьэнэ щызиIэ Вольнэ Аул – Хьэсэней – Джэрпэджэж – Къэщкъэтау автомобиль гъуэгур къызыхуэтыншэу зэрагъэпэщыжын щIадзащ. Лэжьыгъэр щрагъэжьащ Джэрпэджэж жылэм километр 1,1-рэ зи кIыхьагъ и Холамская уэрамым.
Иджыпсту лэжьакIуэхэм гъуэгущхьэм телъ асфальтыжьыр тратхъунщIыкI, лъабжьэр ягъэбыдэ. ИужькIэ, асфальтыщIэ зэрытралъхьэу, гъуэгубгъур мывэхэмкIэ кърагъэбыдэкIынущ, къэухьхэр, пкъохэр щагъэувынущ, уэздыгъэхэр щыпадзэнущ, гъуэгу дамыгъэхэр, зэхыхьэпIэ-зэхэкIыпIэхэр къыщыхагъэщхьэхукIынущ.
КъищынэмыщIауэ, щыIэ мардэм кърагъэтIэсэнущ а гъуэгум хуэзэу псы ежэхым телъ, метр 20 хуэдиз зи кIыхьагъ лъэмыжыр. 
Лэжьыгъэхэр дызэрыт илъэсым и кIэхэм ирихьэлIэу зэфIагъэкIынущ. Абы трагъэкIуэдэну мылъкур щIыналъэ гъуэгу фондым къыхэкIынущ.
 
  Гъатхасэ лэжьыгъэхэр
Къэбэрдей-Балъкъэрым и щIыналъэ администрацэхэм Мэкъумэш-промышленнэ комплексымкIэ я управленэхэм къызэратамкIэ, республикэм гъатхасэ лэжьыгъэм щоужьэрэкI икIи, нобэкIэ, гектар мини 9,3-м ар хащIащ. Абы щыщу гектар мини 7,3-р хьэцэпэцэмрэ джэш хъуреймрэ ирагъэубыдащ. 
Мэкъумэш къэкIыгъэу хасар зэпэщхьэхуэу къэдгъэлъагъуэмэ, гектар мини 4,8-р хьэм, гектар мини 2-р джэш хъурейм, гектар 0,7-р зэнтхъым, гектар 1,2-р джэш къызэрыгуэкIым, гектар 0,1-р горчицэм хухахащ. 
Гуэдзыр, кIэртIофыр, Iэщым ирагъэшхэну къэкIыгъэ щхъуантIэхэри республикэм жыджэру щыхащIэ мы махуэхэм.
ЗэрытраухуамкIэ, нэгъабэ хуэдэуи, хьэцэпэмрэ джэш хъуреймрэ зэхэту гектар мин 214-рэ ди щIыналъэм щыхухахынущ мы гъэм. 
 
      Унагъуэ 1744-м 
«ГъащIэм хуэщIа инфраструктурэ», «ПсэупIэмрэ къалэ щыIэкIэмрэ» лъэпкъ пэхуэщIэхэм, жьы хъуа псэупIэхэм я бжыгъэр гъэмэщIэнымкIэ щыIэ къэрал программэм япкъ иткIэ ди республикэм и къалащхьэм лэжьыгъэ пыухыкIахэр щрагъэкIуэкI ущыпсэуну шынагъуэу кхъахэ хъуа унэхэм щIэсхэр къыщIэгъэIэпхъукIыным хуэунэтIауэ. 
2019 гъэм къыщыщIэдзауэ я псэупIэхэр ирагъэфIэкIуащ унагъуэ 400-м е цIыху 1084-м. ЖыпIэнурамэ, унагъуэ 393-м фэтэр зэпэщхэр къащыIэрыхьащ щIэуэ яухуа псэупIэхэм, унагъуиблым ахъшэ иратащ, ахэр зыщыпсэуахэм пагъакIуэу. 
КъищынэмыщIауэ, къалэ муниципалитетым лэжьыгъэхэр щрагъэкIуэкI уней лъапсэ щаухуэну щIы Iыхьэхэр къалэдэсхэм етыным ехьэлIауэ. Апхуэдэ Iэмалхэр ягъуэтащ унагъуэ быныфIэу 938-м, дзэ Iуэху хэхам хэтахэм я унагъуэу 8-м, абыхэм щхьэкIэ пщIэ щIамыту.
Лэжьыгъэм пащэ.
ХЬЭЩОКЪУЭ Алыдж.
  • 18 просмотров
Поделиться: