ЩАУЕЙ НЭКУРЭ И УЭРЭД

 - Адыгэ уэрэдыжьхэм ди деж къахьэсащ лIэщIыгъуэ куэдым я хъыбар. Илъэсищэм нэблэгъа уэрэдым и хъыбарым лъыхъуэн щыщIэздзэм, япэу зыхуэзгъэзащ композитор ХьэIупэ ДжэбрэIил, - жеIэ «Зы уэрэдым и хъыбар» нэтыныр езыгъэкIуэкI КIунтIыщ-ХьэпцIэ Аннэ 
 - Щауей щыIэкъым, щыIэр Щауэхэщ, - жиIащ ДжэбрэIил. - Ахэр лъэпкъкIэ Бахъсэн щыщщ. ЛампIэжьхэ я лIыжь гуэрымрэ си малъхъэ ЛампIэжь БетIалрэ мы хъыбарыр къызэрызжаIэжар зэтохуэ. Еуэри, Щауэ Нэкурэрэ ЛампIэжьхэ МацIушрэ гухэлъ зэхуащIат. МацIуш къызэрыгуэкI щIалэт, мэлыхъуэт. Нэкурэ зыхузэфIэкI дэлъхухэр иIэти, ткIийуэ яукъуэдиящ я шыпхъур а щIалэм ирамытыну. Сытми, Нэкурэ нэгъуэщI щIалэ ират. Ар зи гум щIыхьа МацIуш Лэтокъуэ Iэсхьэд деж кIуащ: «Нэкурэ сэрэ ди лъагъуныгъэм теухуауэ зы уэрэд тхуэус», - жиIэри. ЗэрыжаIэжымкIэ, Лэтокъуэхэ пшынауэ я куэдт, Iэсхьэди уэрэдусу яIэт. Сытми, ЛампIэжь МацIуш и лъэIукIэ уэрэдыр дунейм къытехьащ. Ар къыщыхъуар 1920 гъэхэрауэ хуагъэфащэ. Щауэ Нэкурэ Джэрмэншык къуажэм щыпсэуауэ, абы щыщIалъхьэжауэ жаIэ. МацIушрэ Нэкурэрэ я лъагъуныгъэр жьым ирихьэжьэжащ, уэрэдыр игъащIэ псокIэ дунейм къытенащ.

***
Уэредэ, гъатхэри мэхъури, сэрмахуэ, жыгхэр мэгъагъэ.
Сэ сыныпкIэлъыгъыурэ, рэ-у-уей, дуней,
Уэ Къущхьэхъумэ уокIуэ, мыгъуэ, уо.

Уэредэ, уи мэлыхъуэгъури, сэрмахуэ, уи бгырыпх лалэмэ,
Сэ сыхъыджэбз щIалэти, рэ-у-уей, дуней,
Сэ сыделэгъуафIэ мыгъуэт, уо.

Уэредэ, уи мэлыхъуэгъуэри, сэрмахуэ, гуэбэныч фIыцIэмэ,
Сэ мэл фIыцIэ слъагъумэ, рэ-у-уей, дуней.
Пшынэ сахуоуэ, мыгъуэ, уо.

Уэредэ, данэ бэлътокури, сэрмахуэ, Къущхьэхъумэ ныпхузогъэхь,
КIапэ лейр къыщысхуебгъэхь(ы)ми, рэ-у-уей, дуней,
Тхьэ зызгъэнщIыжа, мыгъуэтэм, уо.

Уэредэ, уи мылыхъуэвхэри, сэрмахуэ, зэрыбжьэисэрэ,
Сэ фи унэм исхэми, рэ-у-уей, дуней,
Сэ захыслъыта, мыгъуэт, уо.